Krymskaje pradpryjemstva «Masandra», viadomaje svajoj historyjaj i kaliści jakasnym vinom, paśla pieradačy ŭ pryvatnyja ruki pieražyło rezkaje paharšeńnie situacyi. Brend pieražyŭ šerah źmien, ale heta nie pryniesła jamu pośpiechu — vytvorčaść apynułasia ŭ kryzisnym stanie, piša telehram-kanał VČK-OHPU.
Inviestycyj ciapier praktyčna niama, efiektyŭnaść nizkaja, a prybytak pradpryjemsva mocna skaraciŭsia. Składy dla vytrymki vina napałovu pustyja, bočki zapoŭnienyja tolki na tracinu. Heta śviedčyć pra zaniadbańnie technałohij i kiepski markietynh.
U 2023 hodzie čysty prybytak «Masandry» ŭpaŭ u piać razoŭ — z 906 miljonaŭ rasijskich rubloŭ (kala 13,46 miljona dalaraŭ pavodle tahačasnaha kursu) u 2022 hodzie da 180 miljonaŭ (kala 2,30 miljonaŭ rubloŭ). Vyručka źmienšyłasia na 23%, a vałavy prybytak — na 43%.
Pradpryjemstva sprabavała prasoŭvać siabie praz zajavy pra pracaŭładkavańnie ŭdzielnikaŭ vajny va Ukrainie, ale heta jamu, jak vyhladaje, nie dapamahło.
Pryvatyzacyja «Masandry» adbyłasia ŭ śniežni 2020 hoda — jaje vykupili za 5,3 miljarda rubloŭ. Pavodle infarmacyi ŚMI, sapraŭdnaj metaj uhody była nie vytvorčaść vina, a ziamla: učastki mohuć być pieradadzieny pad budaŭnictva, a nie pad raźvićcio vinarobstva.
Pa słovach krynic z administracyi horada Jałta, rašeńnie pra novy prodaž užo pryniata. Pytańnie tolki ŭ tym, ci trapić «Masandra» da sapraŭdnych vinarobaŭ, ci jaje pieradaduć fiederalnym zabudoŭščykam.
Kamientary