Staršynia pravaabarončaha centra «Viasna» Aleś Bialacki znachodziŭsia za kratami z 14 lipienia 2021 hoda. Jaho asudzili na 10 hadoŭ pazbaŭleńnia voli.
Aleś Bialacki ŭvajšoŭ u hrupu z palitviaźniaŭ, jakija byli vyzvaleny 13 śniežnia.
Staršyniu najbujniejšaj pravaabarončaj arhanizacyi Biełarusi zatrymali 14 lipienia 2021 hoda. U toj dzień siłaviki pryjšli ź pieratrusami nie tolki da jaho dadomu i ŭ ofis «Viasny», ale i da dziasiatkaŭ inšych aktyvistaŭ hramadzianskaj supolnaści pa ŭsioj krainie.
Sud pa «spravie Viasny» pačaŭsia tolki ŭ pačatku 2023 hoda. Razam ź Bialackim sudzili jaho namieśnika Valancina Stefanoviča i kaardynatara kampanii «Pravaabaroncy za svabodnyja vybary» Uładzimira Łabkoviča. Jašče adnaho fihuranta, Źmitra Sałaŭjova, sudzili zavočna, bo jon znachodziŭsia za miažoj.
Pa viersii abvinavačvańnia, pravaabaroncy ŭvozili ŭ Biełaruś hrošy dla dapamohi paciarpiełym ad represij i apłaty advakataŭ.
3 sakavika 2023‑ha pravaabaronca byŭ asudžany na 10 hadoŭ pazbaŭleńnia voli pa častcy 4 artykuła 228 KK (kantrabanda arhanizavanaj hrupaj) i častcy 2 artykuła 342 KK (finansavańnie hrupavych dziejańniaŭ, jakija hruba parušajuć hramadski paradak).
Pakarańnie Aleś adbyvaŭ u kałonii №9 u Horkach, jakaja viadomaja svaimi žorstkimi ŭmovami ŭtrymańnia. Letam 2025‑ha Alesiu zrabili apieracyju na nahach u turemnym špitali ŭ Kaladzičach.
Na voli jaho čakali žonka Natalla Pinčuk i syn Adam.
Aleś Bialacki naradziŭsia ŭ pasiołku Viartsila (Karelija, Rasija) 25 vieraśnia 1962 hoda. Paźniej siamja viarnułasia ŭ Biełaruś, u Śvietłahorsk. Skončyŭ historyka-fiłałahičny fakultet Homielskaha dziaržaŭnaha ŭniviersiteta.
Jašče ŭ studenckija hady Aleś braŭ udzieł u moładzievym nacyjanalna-demakratyčnym ruchu. A padčas navučańnia ŭ aśpirantury Instytuta litaratury Akademii navuk BSSR u 1986—1989 hadach byŭ adnym sa stvaralnikaŭ Tavarystva maładych litarataraŭ «Tutejšyja», staŭ siabram arhanizacyjnaha kamiteta hramadskaj arhanizacyi Biełaruski narodny front. Bialacki byŭ i siarod arhanizataraŭ pieršych aficyjnych u BSSR mitynhaŭ, u tym liku słavutaha na Dziady ŭ 1988 hodzie.
Paśla zakančeńnia aśpirantury pracavaŭ małodšym navukovym supracoŭnikam Muzieja historyi biełaruskaj litaratury, zatym u 1989 hodzie staŭ dyrektaram Litaraturnaha muzieja Maksima Bahdanoviča. Na hetaj pasadzie jon pracavaŭ da žniŭnia 1998 hoda.
U 1996 hodzie Aleś stvaryŭ Pravaabarončy centr «Viasna» (pieršapačatkova «Viasna-96»). Na toj momant arhanizacyja paŭstała ŭ adkaz na masavyja zatrymańni ŭdzielnikaŭ vuličnych akcyj. Faktyčna, Bialacki staŭ adnym z zasnavalnikaŭ sučasnaha pravaabarončaha ruchu ŭ Biełarusi.
Rašeńniem Viarchoŭnaha suda Respubliki Biełaruś u kastryčniku 2003 hoda za ŭdzieł u nazirańni padčas prezidenckich vybaraŭ 2001 hoda Hramadskaje abjadnańnie «Pravaabarončy centr «Viasna»» było pazbaŭlena dziaržaŭnaj rehistracyi i z taho času pracuje biez rehistracyi.
Aleś Bialacki nieadnarazova padviarhaŭsia pieraśledu z boku ŭładaŭ. Pieršy raz jon byŭ aryštavany 4 žniŭnia 2011 hoda pa spravie ab «uchileńni ad vypłaty padatkaŭ». Tady padstavaj dla kryminalnaj spravy stali źviestki pra zamiežnyja bankaŭskija rachunki, na jakija pastupali srodki dla pravaabarončaj dziejnaści.
U listapadzie 2011‑ha jaho asudzili na 4,5 hoda kałonii ŭzmocnienaha režymu z kanfiskacyjaj majomaści pa častcy 2 artykuła 243 Kryminalnaha kodeksa Biełarusi (utojvańnie dachodaŭ u asabliva bujnym pamiery). Pakarańnie pravaabaronca adbyvaŭ u babrujskaj kałonii, dzie pracavaŭ u šviejnym cechu.
Jon vyjšaŭ na volu pa amnistyi ŭ červieni 2014 hoda, pravioŭšy za kratami amal try hady.
Druhi raz Aleś Bialacki patrapiŭ za kraty 14 lipienia 2021-ha. U 2022 hodzie, znachodziačysia ŭ źniavoleńni i čakajučy suda, pravaabaronca atrymaŭ Nobieleŭskuju premiju miru.
U harach Kyrhyzstana z drona adšukali cieły źnikłych biełaruskich alpinistaŭ8
Kamientary