«Upeŭnieny Senior z 4000 i kvateraj». Jak moładź płanuje žyćcio da 2030+

Kataklizmy — ekanamičnyja, technałahičnyja, palityčnyja — nakryvajuć IT z hałavoj, i ŭžo sama prafiesijnaja budučynia ajcišnikaŭ, zdajecca, nie takaja cudoŭnaja. Vakansij i tak mała, a tut jašče AI. Jak adčuvaje siabie ŭ 2025 moładź, jakaja vyvučaje dakładnyja navuki i choča źviazać svaju prafiesiju z technałohijami? A moładź u Biełarusi?

My źviarnulisia da maładych ludziej u Biełarusi, jakija vučacca ci tolki źbirajucca pastupać na fizika-matematyčnyja/techničnyja śpiecyjalnaści, z prośbaj raskazać ab tym, jak jany bačać svaju budučyniu. I zp. Klikali nie tolki budučych ajcišnikaŭ, ale pryjšli tyja, chto tak ci inakš choča źviazać svajo žyćcio ź IT. Voś što jany raskazali.

«Praz 5 hadoŭ chaciełasia b 1,5K, praz 10 patraplu ŭ jeŭrapiejskuju kampaniju»

Aleh, vučycca pa śpiecyjalnaści «elektronnyja sistemy biaśpieki» ŭ rehijanalnaj VNU.

Pastupaŭ umoŭna ad biezvychodnaści, bo bałaŭ na žadanuju śpiecyjalnaść (ASAI) nie chapała. Jak takoj «prohi» ŭ nas vielmi mała. Ciapier zakančvaju kursy pa frantendzie, chacieŭ by pracavać niedzie ŭ hetaj śfiery.

Jak takoha płana ŭ mianie niama, ale paśla kursaŭ lepšych chočuć zabrać na pazicyi džunaŭ biez stažyroŭki ŭ Innovise. Abiacajuć płacić 200$ biez prajekta i 400$ — na prajekcie. Dumaju heta narmalna, možna adkładać na pierajezd. Kali nie patraplu ŭ lik lepšych, pajdu stažyravacca. Asabista mnie kursy padajucca karysnymi, bo vykładčyki vyłučajuć samaje važnaje i aktualnaje. Aproč Innovise, na prykmiecie jość kampanija Modsen.

Zrešty, kancentravacca na «froncie» nie chaču — budu pa mahčymaści vyvučać bek. Było b supier stać «fułstekam».

Kali być maksimalna ščyrym, to praz 5 hadoŭ ja baču siabie ŭ toj ža kampanii, dzie pačaŭ karjeru. Chaciełasia b da hetaha času zarpłatu midła — napeŭna, 1 500$.

Praz 10 hadoŭ, mahčyma, patraplu ŭ niejkuju jeŭrapiejskuju kampaniju. Viedaju, što na sumoŭjach na takoje pytańnie lepš adkazvać u duchu «baču siabie ŭ vašaj kampanii», ale my ž nie na sumoŭi?

U idealnym scenary mianie čakaje rełakacyja ŭ Polšču z dalejšym pierajezdam va ŭmoŭnuju Francyju ci Bielhiju. Spadziajusia, atrymajecca: bo kab žyć u Jeŭropie, treba i zarablać jak jeŭrapiejec. Kampanii mary pakul niama, napeŭna, jana budzie z novych, jakija tolki buduć źjaŭlacca. Nakont zarpłaty skazać składana — hałoŭnaje, kab na žyćcio chapała.

Zamieny čałavieka štučnym intelektam nie bajusia: u lubym vypadku ŠI budzie asistentam čałavieka, a nie naadvarot. Dumaju, za kibierbiaśpiekaj — budučynia.

U bližejšy hod — kvatera ŭ Minsku, praz try — upeŭnieny Senior-hrejd i 3,5-4K

Hanna, skončyła kaledž pa śpiecyjalnaści «prahramavalnyja mabilnyja sistemy», pastupaje ŭ BDUIR na «inžynierna-piedahahičnuju dziejnaść». Vydatnica.

— Čamu na piedahoha? Tamu što hetaja śpiecyjalnaść — u śpisie najbolš zapatrabavanych ekanomikaj i z čyrvonym dypłomam na jaje voźmuć biez konkursu. Tym bolš što ja ŭžo viadu kursy pa sistemnamu analizu dla stažoraŭ u svajoj kampanii, i piedahahičnaja adukacyja była b vielmi darečy.

U hetaj aŭtsors-kampanii ja pracuju ŭžo amal dva hady biźnies– i sistemnym analitykam (prajekt bujnoha rasijskaha rytejła). Pa raźmierkavańni paśla kaledža. Šukała jaho sama — spačatku prajšła tam stažyroŭku, a potym vyjšła na prajekt.

I toje, što raźmierkavacca atrymałasia ŭ hetuju kampaniju — amal cud: tracina majoj hrupy pracuje na zavodach, tracina — u departamientach achovy hladzić zapisy z kamier nazirańnia.

Mianie ŭmovy pracy ŭ dadzieny momant zadavalniajuć. Padčas stažyroŭki atrymlivała «stypiendyju» kala 60 dalaraŭ. Z vychadam na prajekt spačatku było kala 700 dalaraŭ, ciapier, praz amal dva hady — 1500 dalaraŭ.

Liču, što dla vypusknika/pačynajučaha śpiecyjalista heta vielmi dobraja zp. Biantežyć tolki toje, što ŭ cełym roznyja kampanii biaruć sabie rozny «pracent», tak što litaralna za adnu i tuju ž pracu płata moža adroźnivacca ŭ paŭtary-dva razy.

Pa zakančeńni raźmierkavańnia viendara ja płanuju źmianić: tak, dla raźmierkavańnia zp — vydatnaja, ale ŭsio roŭna. Praz try hady płanuju daraści da ŭpeŭnienaha Senior-hrejda — dumaju, heta 3,5-4K.

Paśla vypusku z kaledža ja spačatku dumała nie praciahvać vučycca, ale ŭ pierśpiektyvie baču, što adsutnaść vyšejšaj adukacyi moža pieraškodzić pierajści na peŭnyja (u tym liku i kiraŭničyja) pazicyi, tamu vybrała dla siabie samy prosty i chutki varyjant: zavočnaje skaročanaje ŭ BDUIR. Paśla zavočki raźmierkavańnia niama.

U bližejšy čas płanuju pracavać jak BA/SA, ale z časam, dumaju, chacieła b pierajści na mieniedžarskuju pazicyju — naprykład, stać Product Owner-am. Taksama płanuju praciahnuć vykładać sistemny i biźnies-analiz. Z majoj śpiecyjalnaściu, viadoma, i nastaŭnikam infarmatyki možna stać. Nie ŭpeŭniena, što chaču pracavać u škole, ale jak alternatyŭny varyjant na vypadak niepradbačanych abstavin — całkam.

Kryzisu ja nie bajusia, bo samy składany etap ajcišnaj karjery — pošuk pieršaj pracy — užo projdzieny. Majučy dośvied na roznych prajektach, zastacca biez pracy nie bajusia. Choć mnohija kampanii i skaračajuć kolkaść vakansij, inšyja praciahvajuć aktyŭna najmać. Nie vieru, što AI całkam zamienić IT-śpiecyjalistaŭ.

U pierśpiektyvie chaciełasia b syści ad aŭtstafa i pracavać naŭprost z zamoŭcam. Kampanii razhladaju ŭ asnoŭnym rasijskija, bo płanuju žyć i pracavać ź Biełarusi, a ŭ rasijskich kampanijach — lepšaja zp, niama moŭnaha barjera i šmat cikavych i kłasnych pa technałahičnamu steku prajektaŭ.

U bližejšy hod my z maładym čałaviekam płanujem nabyć kvateru ŭ Minsku. Chaciełasia b čaściej chadzić u adpačynak i padarožničać, ale z majoj zahružanaściu na pracy heta, napeŭna, nie chutka atrymajecca.

«Praz 10 hadoŭ, chutčej za ŭsio, žyvu ŭ Polščy. Tam mahčymaści i svajaki»

Taćciana, vučycca na miechanika-matematyčnym fakultecie, płanuje karjeru BA

Ź pieravahami ja vyznačyłasia lohka: padčas navučańnia možna pasprabavać roznyja błoki — matematyku, prahramavańnie, analiz — i zrazumieć, što tabie bližej. Ciapier ja chacieła b stać biźnies-analitykam u jakim-niebudź banku ci IT-kampanii, naprykład, Andersen. Čamu mienavita tam? Prosta mierkuju pa dośviedzie siabroŭ/znajomych. Tak, u Andersen vialikaja ciakučka kadraŭ, ale dla atrymańnia dośviedu heta dobraje miesca.

Ale dzie nasamreč budu pracavać, pakul nie viedaju. Raźmierkavańnia ŭ mianie nie budzie, bo vučusia płatna.

Pa adčuvańniach, miescaŭ, dzie možna začapicca, vielmi mała. Niekatoryja znajomyja pačynajuć pracavać na kampanii ź inšych krain i potym pierajazdžajuć. Taki varyjant ja taksama razhladaju.

Ciapier ja pracuju asistentam analityka (nie ŭ Andersen). Čamu ja vybiraju mienavita BA, a nie, dapuścim, prahramavańnie? Prosta vykładčyk tak cikava padaŭ pradmiet, što jon mnie tak spadabaŭsia.

Praz 5 hadoŭ baču siabie ŭ IT-kampanii na stabilnaj zarpłacie 2000-2500 u. je. U mianie raznastajnyja rabočyja kiejsy, dośvied na roznapłanavych prajektach. Ciapier na majoj pracy ŭsio źviazana z 1S i buchhałteryjaj. Chaciełasia b da hetaha času pašyryć śpiektr prajektaŭ.

Adpačyvaju raz na hod — spadziajusia, što ŭ krainach ES (Italija, Hiermanija, Francyja). Žyllo pakul zdymaju, ź ciapierašnimi cenami na kvatery pakupka svajoj pakul tolki ŭ marach. Zapytaŭ na siamju praź piać hadoŭ, badaj, pakul niama — mnie budzie tolki 25.

Praz 10 hadoŭ u mianie dakładna ŭžo jość siamja i chutčej za ŭsio adno dzicia. Na pracy ŭ hety čas usio budzie zaležać ad dekretnaha adpačynku, muža i mnohich inšych faktaraŭ. Ale baču siabie ŭ toj ža śfiery. Dumaju, dośviedu ŭ mianie ŭžo budzie bolš i zmahu pretendavać na zp ad 3000 u. je.

A jašče da hetaha času ja chutčej za ŭsio žyvu nie ŭ Biełarusi, vierahodniej za ŭsio — u Polščy. Tam bolš mahčymaściej, a jašče ciapier tam šmat svajakoŭ. Na samaj spravie, pierajedu pry pieršaj mahčymaści, ale «praz 10 hadoŭ» hučyć byccam realistyčna.

Na samaj spravie, ja nikoli nie była za miažoj — chto viedaje, moža, mnie i nie spadabajecca, ale pasprabavać vielmi chaciełasia b.

A ciapier mnie prosta patrebny dośvied — sapraŭdy dobryja kiejsy, kab zacikavić pracadaŭcu.

«Miedycyna nie majo, a dzie budu pracavać u IT, pakul nie razumieju»

Viktar, vučycca pa śpiecyjalnaści «inžynier-prahramist», nie choča praciahvać karjeru miedyka

Vyznačycca z ajcišnaj śpiecyjalnaściu było nialohka, i niejkaha kankretnaha płana, na žal, u mianie pakul niama.

Prosta ja kručusia adrazu ŭ dźviuch śfierach, maja pieršaja adukacyja — miedycynskaja, siaredniaja śpiecyjalnaja. Ale z ulikam taho, jak žyvie siaredniestatystyčny miedyk u nas u krainie (na žyćcio chapaje, ale jak zaŭsiody chočacca bolšaha) i z ulikam usich intaresaŭ (bolš-mienš u kampjutarach razumieju) ja vyrašyŭ vybrać dla siabie IT-śpiecyjalnaść. Vučusia na zavočnym, pracuju jak miedyk.

U jakoj śfiery chaču pracavać i dzie kankretna, pakul taksama nie razumieju, bo ŭvohule pakul nie baču karciny IT u Biełarusi, nie byvaju ŭ ofisach IT-kampanij — prosta pakul nie paśpiavaju. Ale niejki dośvied jość: dyzajn rabiŭ, niejkija rečy z kodam taksama, ale taski byli niesurjoznyja: a-la napišy kalkulatar na pitonie ci vykanaj najpraściejšuju zadačku na S++.

Ź miedycynaj źviazvać budučyniu dakładna nie chaču (adpracoŭka ŭžo zakryta, z hetym nijakich prablem), bo zrazumieŭ z časam, što heta nie majo.

• 1
• 1
• 3
• 1
• 0
• 0
• 0
• 0