«Kružlaŭ nad Homielem paŭtary hadziny». Što paviedamlali ludzi pra rasijskija drony, što zalacieli padčas načnoj ataki Ukrainy
Hamialčanie paviedamlali pra palot rasijskich udarnych dronaŭ nad horadam nočču 10 lipienia, kali RF ździejśniła čarhovuju masiravanuju ataku šachiedami i rakietami pa niekalkich rehijonach Ukrainy, piša «Fłahštok». Pavodle papiarednich padlikaŭ, na terytoryju Homielskaj vobłaści ź viečara 9 lipienia zalacieli bolš za 20 rasijskich BpŁA.
Pieršyja bieśpiłotniki na terytoryi Homielskaj vobłaści źjavilisia ŭžo ŭviečary 9 lipienia, kali rasijskaja armija zapuściła niekalki hrup BpŁA z Branskaj vobłaści. Jak infarmavaŭ «Fłahštok», nad paŭdniovymi ŭskrainami Homiela pačali čuć huk, padobny da huku «mapieda», paśla poŭnačy.
Kala 01:26 prahrymieŭ hłuchi vybuch na paŭdniovy zachad ad Homiela — mahčyma, heta było źbićcio abo padzieńnie drona z nastupnaj detanacyjaj.
U čacie adnaho z homielskich telehram-kanałaŭ hamialčanie apisvali toje, što adbyvajecca, u režymie realnaha času. Ranicaj paviedamleńni byli vydalenyja.
Žychary Homiela paviedamlali, što čuli huk «mapieda» nad Navabielickim, Sielmašaŭskim i Vołataŭskim mikrarajonami. Vidavočcy adznačali niaroŭnuju pracu ruchavika.
U kamientaryjach abmiarkoŭvali kolkaść BpŁA nad horadam — niekatoryja naličyli šeść šachiedaŭ, ale heta moh być adzin i toj ža dron, jaki kružlaŭ vakoł Homiela. U cełym huk bieśpiłotnika byŭ čutny ŭ abłasnym centry ciaham paŭtary hadziny.
Na praciahu taho ž času žychary Rečycy taksama čuli paloty BpŁA i śćviardžali, što bieśpiłotnikaŭ było jak minimum try.
U cełym, pavodle papiarednich padlikaŭ, na terytoryju Homielskaj vobłaści ź viečara 9 lipienia zalatali bolš za 20 rasijskich BpŁA. Pry hetym viarnulisia va Ukrainu tolki kala 5 dronaŭ, astatnija, vierahodna, upali abo byli źbityja na terytoryi Biełarusi. Pieršy ŭvajšoŭ u pavietranuju prastoru respubliki ŭ 20:18 9 lipienia, apošni — u 02:03 10 lipienia.
U apošni čas zaloty rasijskich dronaŭ na terytoryju Biełarusi pačaścilisia — u vyniku pavieličeńnia maštabaŭ atak.
Usiaho, pavodle paviedamleńniaŭ ukrainskich aficyjnych krynic, u noč na 10 lipienia RF atakavała Ukrainu bolš čym 400 dronami. Asnoŭnaj metaj byŭ Kijeŭ, dzie, pavodle danych na ranicu, u 8 rajonach horada paciarpieła žyllovaja, miedycynskaja, adukacyjnaja, handlovaja i transpartnaja infrastruktura. Viadoma pra dvuch zahinułych mirnych žycharoŭ.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam11
Kamientary