Biełaruska paśla płatnaj miedycyny pajšła ŭ dziaržaŭnuju i raskazała svaje ŭražańni
Dziaŭčyna ŭsio žyćcio naviedvała ŭ asnoŭnym pryvatnyja kliniki. A niadaŭna vyrašyła źviarnucca ŭ dziaržaŭnuju ŭstanovu. Jana raskazała «Točka», što jaje pryjemna ździviła, a što mocna rasčaravała.
Biełarusy niaredka skardziacca na ŭzrovień dziaržaŭnaj miedycyny, asabliva ŭ rehijonach.
Hałoŭny tezis — daloka nie ŭsie pasłuhi možna atrymać biaspłatna, a prajści narmalny čekap u zvyčajnaj paliklinicy niaprosta, časam prychodzicca iści ŭ pryvatny miedcentr.
Svaju historyju raskazała minčanka. Jana niadaŭna vyrašyła pravieryć: ci možna raźličvać u dziaržaŭnaj ustanovie na niešta bolšaje, čym kansultacyja terapieŭta i zvyčajny analiz kryvi.
U hetym materyjale subjektyŭny pohlad na dziaržmiedycynu ź jaje plusami i minusami. Pahladzieli, ci takaja biaspłatnaja miedycyna biaspłatnaja, kolki ŭdasca sekanomić na pachodzie ŭ palikliniku i kolki jašče pryjdziecca vydatkavać pa-za jaje ścienami.
Strachoŭka ŭsio vyrašała
Alenie 32 hady. Dośviedu chadžeńnia pa paliklinikach u jaje nie tak i šmat: kaža, što ŭsio darosłaje žyćcio karystałasia miedycynskaj strachoŭkaj.
«U dziacinstvie — zvyčajnaja rajonnaja paliklinika, dzie zaŭsiody šmat čerhaŭ i viečna stomlenyja, tamu i hrubavatyja ŭračy. U studenctvie — piekła ŭ 33-j paliklinicy, dzie z taboj abychodziacca žudasna (prajšło bolš za 10 hadoŭ, moža, što i źmianiłasia). A potym — usie cudy pryvatnaj miedycyny», — kaža Alena.
Dziaŭčyna abaznačaje: chvareje jana niačasta, surjoznych pytańniaŭ pa zdaroŭi niama, tamu źviartajecca da ŭračoŭ redka. Pakul była strachoŭka, raz na hod prachodziła prafiłaktyčnyja abśledavańni.
«Heta hiniekołah, endakrynołah, časam aftalmołah, mahła zrabić MRT, bo jość pytańni z pazvanočnikam, pravieryć harmony i zdać inšyja analizy. Tady ja zrazumieła ŭsiu pryhažość pryvatnych klinik: tut zusim inšaje staŭleńnie da pacyjenta, nijakaha chamstva, nijakich čerhaŭ. Dy i ŭračy zaŭsiody hatovyja pryznačyć poŭny śpiektr abśledavańniaŭ pa nieabchodnaści. Zrazumieła, za vašy hrošy luby kapryz», — dadaje Alena.
Potym była źmiena pracy — strachoŭku na miedpasłuhi novy pracadaŭca nie prapanuje. Pryjšłosia nadoŭha zabyć pra prafiłaktyčnyja ahlady, tolki samyja važnyja vizity da ŭračoŭ zastavalisia ŭ śpisie abaviazkovych.
«I tolki ŭ pryvatnyja miedcentry. U mianie było niekalki sprob źviarnucca ŭ dziaržaŭnyja ŭstanovy ŭ roznych rajonach stalicy, dzie ja kaliści pražyvała. Kali kazać miakka, vopyt byŭ niaŭdały. Potym doŭhija hady ja naležała da vielmi stareńkaj pierapoŭnienaj 15-j palikliniki. Tam naohuł usio było drenna», — uspaminaje dziaŭčyna.
Pavodle jaje słoŭ, niekatoryja śpiecyjalisty tam i zusim adsutničali. Naprykład, da traŭmatołaha sa złamanaj nahoj prychodziłasia jeździć na inšy kaniec horada. Plus pastajannyja čerhi da ŭračoŭ (i spadarožnyja błytanina i łajanka pacyjentaŭ z-za adsutnaści elektronnaj čarhi). U vyniku Alena bolš nie źviartałasia ŭ dziaržaŭnuju palikliniku.
«Niekalki hadoŭ tamu dabudavali novy budynak 15-j palikliniki — usio vyhladała supier, zachodziła tudy pa niejkim drobnym pytańni. A niadaŭna vyrašyła, što chaču pravieści ekśpierymient i pahladzieć, ci realna tam prajści minimalny čekap», — raskazvaje Alena.
«Dyspansieryzacyja — niejki siur»
Pačaŭsia pachod Aleny ŭ palikliniku z kabinieta dyspansieryzacyi. Nivodnaha čałavieka ŭ čarzie, małady śpiecyjalist. Niekalki dziažurnych pytańniaŭ: uzrost, rost, vaha, ci jość chraničnyja zachvorvańni i škodnyja zvyčki. U vyniku ŭ rukach u dziaŭčyny akazałasia niekalki pryznačeńniaŭ na analizy: kryvi — ahulny i bijachimija, mačy. I nakiravańnie na EKH.
Uvohule na hetym dyspansieryzacyja i skončyłasia. Dziaŭčyna kaža, što nastojvała na dadatkovych daśledavańniach.
«Raz na hod žančynam rekamiendujecca prachodzić UHD orhanaŭ małoha taza i UHD małočnych załoz — heta zaŭsiody staić u mianie ŭ śpisie abaviazkovych abśledavańniaŭ. U vyniku śpiecyjalist nakiravaŭ mianie da hiniekołaha», — praciahvaje apovied dziaŭčyna.
Spačatku była zdača analizu kryvi. U čarzie jana praviała krychu bolš za hadzinu. Napieradzie było 85 pacyjentaŭ.
«Elektronnaja čarha, pracujuć try kabiniety. Prymali ludziej vielmi navat chutka. Jašče ja ździviłasia, kali ŭbačyła ŭ kabiniecie sučasnyja šprycy-prabirki, jak u pryvatnych łabaratoryjach», — kaža Alena.
UHD zrabić nierealna
Da hiniekołaha dziaŭčyna zapisałasia biez prablem. Dla hetaha jana navat nie telefanavała ŭ rehistraturu, usio zrabiła praz anłajn-płatformu. Pryjom taksama nie pryjšłosia doŭha čakać — na jaho možna było trapić užo na nastupnym tydni.
«Vielmi pryjemnaja i akuratnaja žančyna-doktarka. Usio było vietliva i taktoŭna. Ja źviartałasia ź niekatorymi prablemami. Śpiecyjalist sabrała padrabiazny anamniez, pahladzieła maje staryja abśledavańni i adrazu ž dała mnie kuču pryznačeńniaŭ na zdaču harmonaŭ. Ale dalej namalavałasia prablema», — uspaminaje Alena.
Harmony treba było zdać pa vaśmi pakazčykach. Alena kaža, što heta prystojnaja suma, kali b jana rabiła ŭsio płatna.
Urač nastojvała, što treba dziaŭčynie pravieści i UHD orhanaŭ małoha taza, — uźnikli pytańni. Ale adrazu ž udakładniła: ci zmoža pacyjentka zrabić jaho samastojna, za svaje hrošy. Maŭlaŭ, možna zapisacca ŭ list čakańnia, ale jon raściahnuty na niekalki miesiacaŭ napierad.
«Ja vyrašyła, što kali jość pytańni pa zdaroŭi, to nie budu stolki čakać. I zapisałasia ŭ samy niedarahi miedcentr. Za heta ja addała Br50. Darečy, płatna ŭ majoj ža paliklinicy možna było zrabić u dva razy tańniej. Praŭda, pryjomu čakać pryjšłosia b bolš za tydzień», — padličvaje Alena.
Biez prablem pryznačajuć analizy
Da endakrynołaha akazałasia zapisacca krychu składaniej, ale čakać doŭha taksama nie pryjšłosia. Na rukach u dziaŭčyny było staroje UHD ščytapadobnaj załozy. Jano pakazała niekatoryja patałohii, była rekamiendacyja naziracca ŭ śpiecyjalista.
Urač pahladzieła papiaredniaje abśledavańnie. Jano rabiłasia čatyry hady tamu. Zapeŭniła, što novaje daśledavańnie pravodzić niama nieabchodnaści. U toj ža čas padkreśliła, što pravieryć niekatoryja harmony nie pieraškodzić. I pryznačyła pravieści harmanalnyja daśledavańni jašče pa čatyroch pakazčykach.
Znoŭ pachod u łabaratoryju na zdaču analizaŭ (pryjšłosia iści dvojčy, tamu što harmony treba było zdavać u peŭnyja dni). Kožny pachod — pa hadzinie ŭ čarzie.
«Adziny, ale nie istotny minus — termin čakańnia vynikaŭ, da 10 dzion. U pryvatnaj łabaratoryi heta ŭsio značna chutčej, plus jość mahčymaść atrymać vynik na poštu. U paliklinicy ž ty nie ŭbačyš vynik, pakul znoŭ nie zapišašsia na pryjom da ŭrača. Zbolšaha heta i pravilna, kab urač, a nie ty sam interpretavaŭ vyniki», — ličyć dziaŭčyna.
Na pryjom da hiniekołaha Alena pajšła sa svaim UHD, kali dačakałasia vynikaŭ. Urač pryznačyła pierazdać niekatoryja harmony praź niekalki miesiacaŭ — byli vyšej za normu. I dała čarhovyja nakiravańni na paŭtornyja daśledavańni pa dvuch pakazčykach. Toje ž samaje zrabiŭ i endakrynołah: adzin pakazčyk parekamiendavała pierazdać. Nijakich prablem z atrymańniem nakiravańnia tut nie było.
Lišnija chadžeńni pa kabinietach
Paralelna dziaŭčyna zapisałasia na pryjom da traŭmatołaha-artapieda: u jaje asteachandroz. U pryvatnych klinikach rekamiendavali pieryjadyčna naziracca ŭ śpiecyjalista, raz u hod prachodzić MRT. Z usimi hetymi pryznačeńniami jana nakiravałasia ŭ dziaržaŭnuju palikliniku.
«Urač adrazu adpraviŭ na renthien. Ja ździŭlałasia. Navošta? Bo ŭ mianie byli i vyniki renthiena, a potym rabiła i MRT. Mnie ŭžo kaliści rabili bolš infarmatyŭnaje daśledavańnie, navošta marnavać čas na lišnija pachody pa kabinietach? Na heta ŭrač adkazaŭ: «Prajšło šmat času, treba pahladzieć», — kaža dziaŭčyna.
Rabić niama čaho. Zdymak pryjšłosia rabić u dva zachody: pravodzić daśledavańnie dźviuch zon za raz nielha pa niejkich narmatyvach. U vyniku pryjści ŭ palikliniku treba było dvojčy.
Potym traŭmatołah adpraviŭ da nieŭrołaha.
«A da jaho prosta tak nie trapić — tolki praz terapieŭta. Ja zapisałasia, usio roŭna treba było daviedacca jašče i vyniki analizaŭ kryvi i mačy. Ale heta lišni pachod u palikliniku. U pryvatnaj možna adrazu zapisacca da patrebnaha śpiecyjalista», — kaža Alena.
Uvieś hety čas, adznačaje dziaŭčyna, da śpiecyjalistaŭ praktyčna nie było čerhaŭ: usio ž elektronnyja tałony dadali vielmi šmat kamfortu.
«Terapieŭt pryznačyła bolš infarmatyŭnaje daśledavańnie — ubačyła štości ŭ zvyčajnym analizie. Dała nakiravańnie da nieŭrołaha. I parekamiendavała zrabić fluarahrafiju — ja daŭno nie prachodziła heta daśledavańnie. Darečy, znoŭ usio prajšło chutka i biez čarhi», — ździŭlajecca dziaŭčyna.
MRT dabicca składana
Da nieŭrołaha było zapisacca ciažej — adzin śpiecyjalist na ŭsiu palikliniku. Na rukach u dziaŭčyny ŭžo akazalisia zdymki pazvanočnika i zaklučeńnie: «Rekamiendujecca bolš infarmatyŭny mietad daśledavańnia». Alena spadziavałasia prajści MRT.
«Doktar pahladzieŭ vyniki majho papiaredniaha MRT, zaklučeńnie paśla renthiena, sabraŭ anamniez, pravioŭ ahlad i vypisaŭ tabletki. A voś na prośbu znoŭ prajści MRT, jakoje ŭsio ž taki mnie było rekamiendavana i pryvatnymi klinikami, i navat śpiecyjalistam z hetaj ža palikliniki, nieŭrołah nakiravańnie nie daŭ. Skazaŭ, niama padstaŭ», — ździŭlajecca Alena.
Što ŭ vyniku?
U cełym svoj dośvied naviedvańnia palikliniki Alena aceńvaje jak stanoŭčy. Ale z adnoj ahavorkaj: usio z papraŭkaj na toje, što heta novaja staličnaja ŭstanova.
«Ja bačyła i inšyja palikliniki ŭ Minsku, pakul žyła na zdymnych kvaterach, — usio adnosna. Ale ŭ cełym mianie ździviła, što ŭračy biez pytańniaŭ dajuć pryznačeńni na niekatoryja daśledavańni. U pryvatnaj łabaratoryi ja b vydatkavała tolki na adny analizy kala Br315», — kaža Alena.
U toj ža čas dziaŭčyna adznačaje: čym składaniej daśledavańnie, tym ciažej jaho atrymać. Zdajecca, što MRT naohuł nie dabicca, chacia, na dumku hieraini, dla hetaha byli i pakazańni, i pryznačeńni. A šmatmiesiačnyja čerhi na UHD, viadoma, prymušajuć usio roŭna źviartacca da płatnych pasłuh.
Biezumoŭna, uzrovień biaspłatnaj miedycyny ŭ rehijonach mocna adroźnivajecca ad staličnaj. Kali ŭ vas byŭ inšy dośvied naviedvańnia dziaržaŭnych ustanoŭ abo vam pryjšłosia zapisvacca ŭ pryvatnyja kliniki z-za adsutnaści patrebnych śpiecyjalistaŭ u paliklinicy, dzialiciesia ŭ kamientarach.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary