U vypadku napadu rasijskija siły ŭ Kalininhradzie buduć niejtralizavanyja imhnienna — kamandujučy siłami ZŠA
Amierykanskaja armija i jaje sajuźniki zdolnyja ŭziać Kalininhrad pad ahniavy kantrol «za niečuvana karotki termin — chutčej, čym my raniej mahli heta zrabić», skazaŭ kamandujučy armijaj ZŠA ŭ Jeŭropie i Afrycy hienierał Krystafier Donachju.
Armija ZŠA i jaje sajuźniki z NATA raspačynajuć realizacyju novaha płana «Linija strymlivańnia na ŭschodnim fłanhu», jaki nakiravany na ŭzmacnieńnie patencyjału suchaputnych siłaŭ i pavyšeńnie funkcyjanalnaj spałučalnaści VPK u miežach aljansu, zajaviŭ u sieradu kamandujučy armijaj ZŠA ŭ Jeŭropie i Afrycy hienierał Krystafier Donachju na pieršaj kanfierencyi LandEuro ŭ Visbadenie, Hiermanija.
U ramkach płana supraćdziejańnia rasijskaj pahrozie i zabieśpiačeńnia hłabalnaha strymlivańnia armija ZŠA i jaje sajuźniki raspracoŭvajuć standartyzavanyja, aryjentavanyja na danyja sistemy i vobłačnuju kaardynacyju, adznačyŭ hienierał Donachju. Jaho zajavy cytuje vydańnie DefenceNews.
Amierykancy, jak i NATA, u jakaści pieršaha kroku zasiarodžvajucca na krainach Bałtyi, «kab pasprabavać davieści da taho, jak na samoj spravie zrabić tak, kab i pramysłovaść, i krainy dakładna viedali, jakija patrabavańni stajać — u kančatkovym vyniku heta ciapier viadoma jak Linija strymlivańnia na ŭschodnim fłanhu», — skazaŭ Donachju.
«My viedajem, što my pavinny raspracavać, i scenar vykarystańnia, jaki my ŭžyvajem [dla strymlivańnia] ź ziamli», — skazaŭ jon. «Suchaputnaja śfiera nie tracić značeńnia, jana stanovicca bolš važnaj. Ciapier vy možacie zabiaśpiečvać [zony abmiežavańnia dostupu / zabarony zony dostupu] A2AD ź ziamli. Ciapier vy možacie brać pad kantrol mora ź ziamli. Usio heta my nazirajem va Ukrainie».
U jakaści prykładu Donachju pryvioŭ Kalininhradskuju vobłaść Rasii, akružanuju NATA z usich bakoŭ. Amierykanskaja armija i jaje sajuźniki zdolnyja ŭziać jaje pad ahniavy kantrol «za niečuvana karotki termin — chutčej, čym my raniej mahli heta zrabić».
«My ŭžo heta spłanavali i ŭžo raspracavali. Prablema masy i impulsu, jakuju Rasija stavić pierad nami… U nas jość siły, kab być peŭnymi, što my možam vyrašyć hetuju prablemu masy i impulsu», — skazaŭ Donachju.
Płan NATA ŭklučaje sistemu dla abmienu danymi. NATA ŭžo nabyła hetuju sistemu, skazaŭ Donachju, majučy na ŭvazie Maven Smart System ad kampanii Palantir — płatformu štučnaha intelektu, jakaja apracoŭvaje vielizarnuju kolkaść danych i chutka analizuje infarmacyju, što dapamahaje kamandziram u pryniaćci rašeńniaŭ.
«My ŭžo dakładna viedajem, što nam treba zrabić z vobłakam, i my dakładna viedajem typ bieśpiłotnych sistem, bryhad, usiaho astatniaha, što nam dla hetaha treba», — skazaŭ Donachju.
Jak jon adznačyŭ, «my chočam, kab usio było apcyjanalna kiravanym» — jak sistema supraćpavietranaj abarony, tak i dalnabojnaj artyleryi.
U studzieni 2021 hoda vydańnie Over Defense, vykarystoŭvajučy danyja amierykanskaj arhanizacyi Center for Naval Analyses (CNA), apisała scenaryj previentyŭnaha ŭdaru NATA pa Kalininhradskaj vobłaści, jaki praduhledžvaje likvidacyju čatyroch asnoŭnych celaŭ u hetym rehijonie.
Zhodna z publikacyjaj, hetym udaram buduć źniščanyja puskavyja ŭstanoŭki balistyčnych rakiet małoj dalnaści, zdolnyja pieranosić jadziernuju zbroju (majucca na ŭvazie pierš za ŭsio rakietnyja kompleksy «Iskander»), udar budzie naniesieny pa karablach i infrastruktury Bałtyjskaha fłota, buduć źniščanyja zienitnyja rakietnyja sistemy S-400, jakija znachodziacca ŭ rehijonie, a «rasijskija vojski ŭ Kalininhradzie buduć niejtralizavanyja dla harantavańnia biaśpieki ŭ krainach Bałtyi i Suvałkskim kalidory».
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii15
Kamientary