U vyniku pažaru na «Kieraminie» abjom vytvorčaści zaŭvažna ŭpadzie. A ŭzharańnie mahło być uskosnym nastupstvam sankcyj
15 lipienia hareŭ kieraminaŭski cech №3, u jakim robiać kieramičnuju i kieramahranitnuju plitku. Hareŭ usiaho 20 chvilin, ale tušyli jaho 22 pažarnyja ekipažy — 110 čałaviek. Ułady kažuć, što raboty paśla pažaru adnavili, ale najaŭnaja infarmacyja dazvalaje śćviardžać, što jeŭrapiejskamu hihantu budaŭničaj pramysłovaści naniesienaja vialikaja škoda.
Minski «Kieramin» — adno z najbujniejšych pradpryjemstvaŭ pa vyrabie kieramičnaj i kieramahranitnaj plitki va Uschodniaj i Centralnaj Jeŭropie.
Tannaja biełaruskaja pracoŭnaja siła, tannaja (da 2022 hoda) ukrainskaja hlina, tanny rasijski haz i jakasnaja zachodniaja technika dazvalali pradpryjemstvu kvitnieć.
Stvorany jašče ŭ SSSR, zavod pieražyŭ niekalki chvalaŭ madernizacyi ŭ niezaležnaj Biełarusi.
Serca pracesu — u hidraŭličnych presach, jakija manatonna, niekalki razoŭ na chvilinu i 24 hadziny na sutki, z tysiačatonnaj siłaj abrynajucca na formy z kieramičnym paraškom, schoplivajučy jaho ŭ plitku.
Paśla ŭžo inšyja stanki nanosiać na plitku farbu i hruziać dla apiakańnia ŭ piečku.
Hidraŭličny pres — heta samaja darahaja častka va ŭsioj nieabchodnaj dla vyrabu plitki linii. Kožny pres u sutki vydaje dziasiatki tysiač plitak. Takoj techniki ŭ Biełarusi nie vyrablajuć.
«Kieramin» — i heta było pradmietam honaru pradpryjemstva — karystaŭsia presami italjanskaj kampanii SACMI. Heta adzin z suśvietnych lidaraŭ u hetaj śfiery.
Kolki ŭsiaho presaŭ u rasparadžeńni «Kieramina», možna zrazumieć sa spravazdač na sajcie vytvorcy.
U 2019-m, hodzie apošniaj pastaŭki dvuch novych presaŭ, SACMI paviedamlała, što z ulikam zakrytaj uhody na biełaruskim zavodzie ŭsiaho budzie 8 italjanskich presaŭ.
Viedajučy hetuju infarmacyju i nakłaŭšy jaje na aficyjnuju zvodku pra nastupstvy ŭzharańnia, my možam acanić maštab škody.
Što hareła na «Kieraminie»
Dyrektar «Kieramina» Alaksandr Paško paviedamlaŭ žurnalistam ANT, što «adbyłosia ŭzharańnie hidraŭličnaha presa», i pryznavaŭsia, što «takoha nie było za ŭsiu historyju pradpryjemstva».
Inšyja dziaržSMI strymana abmiežavalisia tolki paviedamleńniami pra «avaryjny režym raboty technałahičnaha abstalavańnia».
Hareła nie aby-što, a serca «Kieramina» — pres SACMI, imavierna, madeli PH4800.
Pa słovach rabotnikaŭ cecha, jakich cytuje ANT, pažar zdaryŭsia źnianacku. «Pracavaŭ, raptam paśviatleła, abaročvajusia — haryć, užo pa stoli paŭzie», — skazaŭ ANT adzin z rabotnikaŭ.
Śledčy kamitet zavioŭ kryminalnuju spravu i ŭdakładniŭ, što «krynica [uzharańnia] znachodziłasia ŭ adnoj z pompaŭ, u jakoj adbyŭsia vyciek alivy».
Takim čynam, prynamsi, adzin pres zhareŭ znutry. Heta my bačym i na fota MNS.
Litaralna za dziesiać mietraŭ ad krynicy ŭzharańnia staić inšy hidraŭličny pres. Jany mietaličnyja, i vizualna składana vyznačyć stupień paškodžańniaŭ, ale małaimavierna, kab druhi pres pieranios vysokuju tempieraturu pobač i zalivańnie pienaj bieź istotnych paškodžańniaŭ.
Acanić stan nastupnaha ŭ linii, treciaha presa, a taksama inšych prylehłych elemientaŭ vytvorčaj linii, nie majučy dostupu da miesca, niemahčyma.
Ale navat pa minimalnaj płancy škody, kali mahli vyjści z ładu dva hidraŭličnyja presy, možna kanstatavać, što za 20 chvilin u vyniku pažaru ŭ cechu №3 mahčymaści «Kieramina» presavać plitku skaracilisia — kali miechanična adymać ad 8 najaŭnych presaŭ, to na 25%.
Za hod «Kieramin» vypuskaŭ da 16 miljonaŭ kvadratnych mietraŭ plitki, što vyvodziła jaho na druhoje miesca siarod uschodniejeŭrapiejskich vytvorcaŭ paśla rasijskaj hrupy Unitile. Paśla pažaru jon pa vynikach 2025 hoda, imavierna, apuścicca na treciaje miesca, prapuściŭšy napierad polskuju Opoczno.
Ci mahčyma chutka zamianić abo adramantavać sapsavanaje ci źniščanaje ŭ pažary abstalavańnie? Naŭrad ci. Paśla pačatku masavych represij u Biełarusi italjanskaja SACMI spyniła nie tolki pastaŭki novaha abstalavańnia na hetaje vialikaje dziaržaŭnaje pradpryjemstva, ale i absłuhoŭvańnie staroha.
Mahčyma, što sama avaryja zdaryłasia tolki praz adsutnaść naležnaj techpadtrymki: u 2022 hodzie telekanał STB pieradavaŭ, što praz admovu italjancaŭ supracoŭničać novymi pastaŭščykami detalaŭ dla płanavaj zamieny raschodnikaŭ stanuć Kitaj, Indyja i Turcyja.
Zamienu aryhinalnych raschodnikaŭ azijackimi kopijami sankcyjanavaŭ Dźmitryj Piatruša, jaki da 2024 hoda byŭ dyrektaram «Kieramina». Toj samy Piatruša, jaki ŭ 2020-m biespaśpiachova sprabavaŭ spynić vykanańnie pieśni «Pieramien» u Kijeŭskim skviery stalicy.
Čytajcie taksama. Histaryčnyja kadry. Kiraŭnik Centralnaha rajona Piatruša sprabuje spynić «Pieramieny» VIDEA
Rabotniki «Kieramina», jak i inšych minskich pradpryjemstvaŭ, aktyŭna ŭdzielničali ŭ sprobie adnaŭleńnia zakonnaści ŭ krainie ŭ 2020-m.
«Minsk, zavod «Kieramin» vyjšaŭ na vulicu kala svajho pradpryjemstva. Šmat ludziej z kvietkami, mašyny sihnalać», — paviedamlali čytačy «Našaj Nivy» 13 žniŭnia 2020 hoda.
«Da pratestujučych supracoŭnikaŭ dałučyłasia kiraŭnictva pradpryjemstva», — paviedamlaŭ «Sputnik».
«Kieramin» paśla hetaha nie abyšli ideałahičnyja čystki i represii. U 2021-m kiraŭnikom pradpryjemstva pryznačyli Piatrušu. U 2025-m jaho pieraviali na pasadu namieśnika staršyni Viciebskaha abłvykankama.
Ciapier čytajuć
Chto taki Michaił Miachovič — siłavik, jaki viadzie kanał HUBAZiKa i adkazvaje za prabiŭ ludziej15
Kamientary
[Zredahavana]