Chto taki Džejsan Deruła, jakoha premjer Turčyn vadziŭ pa Domie ŭrada
U karjery amierykanskaha śpievaka 14 płacinavych sinhłaŭ i siem miljardaŭ prasłuchoŭvańniaŭ.
35-hadovy Džejsan Deruła naradziŭsia ŭ horadzie Miramar, štat Fłaryda, ZŠA. Jaho baćki — vychadcy z vostrava Haici, i rodnaj movaj śpievaka była haicianskaja kreolskaja.
Džejsan vychoŭvaŭsia razam z bratam i siastroj i vučyŭsia ŭ mastackich škołach. U pačatku svajoj karjery jon skaraciŭ napisańnie proźvišča (z Desrouleaux da Derulo), kab jaho było praściej vymaŭlać.
Jak staŭ zorkaj muzyki
Svoj šlach u šou-biznesie jon pačaŭ z napisańnia tekstaŭ dla inšych vykanaŭcaŭ, siarod jakich byŭ i «karol chip-chopu» P. Diddy, jaki ciapier znachodzicca pad śledstvam pa šerahu abvinavačańniaŭ u seksualnym hvałcie i handli ludźmi.
Prafiesijnaja karjera Džejsana pačałasia paśla taho, jak na jaho źviarnuŭ uvahu pradziusar Džonatan Rotem, jaki padpisaŭ jaho na łejbły Beluga Heights Records i Warner Brothers Records.
Uletku 2009 hoda Deruła vypuściŭ svoj pieršy sinhł Whatcha Say, jaki naprykancy žniŭnia debiutavaŭ na 54-m miescy ŭ Billboard Hot 100, a ŭžo ŭ listapadzie ŭznačaliŭ čart.
Jaho debiutny albom Jason Derulo vyjšaŭ viasnoj 2010 hoda. Druhi studyjny albom — Future History — vosieńniu 2011-ha. U padtrymku alboma artyst płanavaŭ tur pa Vialikabrytanii ŭ lutym 2012 hoda, adnak u studzieni padčas repietycyi złamaŭ pazvanok i byŭ vymušany admianić kancerty.
Najbolš viadomym chitom z treciaha alboma Tattoos, jaki vyjšaŭ u 2013 hodzie, staŭ sinhł Wiggle (feat. Snoop Dogg).
U 2014 hodzie pieśnia Want to Want Me, jakaja paźniej uvajšła ŭ čaćviorty studyjny albom Everything Is 4, stała samym papularnym trekam u historyi radyjo Top-Top, zaniała piataje miesca ŭ Billboard Hot 100 i ŭznačaliła brytanski čart.
Paśla vychadu piataha alboma ŭ 2015 hodzie, Deruła spatrebiłasia amal dzieviać hadoŭ, kab vypuścić šosty — Nu King. U jaho ŭvajšli ŭžo viadomyja sinhły, takija jak Swalla i Take You Dancing.
U 2020 hodzie artyst vydaŭ chit Savage Love sumiesna z novaziełandskim pradziusaram Jawsh 685. Pieśnia ŭznačaliła suśvietnyja čarty, a paśla vychadu remiksa ŭ vykannańni paŭdniovakarejskaha hurta BTS zaniała pieršaje miesca ŭ Billboard Hot 100, staŭšy druhim №1-chitom u karjery Deruła.
Džejsan Deruła taksama maje vopyt zdymak u kino. U filmie Cats («Kotki»), jaki vyjšaŭ u kancy 2019 hoda, jon syhraŭ kata Ram Tama Tahiera.
Za hetuju rolu Deruła naminavali na žartlivuju anty-premiju «Załataja malina» ŭ katehoryi «Najhoršy ekranny duet» — razam z «jaho adredahavanaj kampjutaram vypukłaściu», što stała iraničnaj adsyłkaj da fota z Instagram, dzie vyrazna prahladaŭsia siłuet jaho pałavoha orhana.
Na rachunku Džejsana Deruła 14 płacinavych sinhłaŭ, 7 miljardaŭ prasłuchovańniaŭ na YouTube, 66 miljonaŭ padpisčykaŭ u tyktoku i 39 miljonaŭ — u Instagram.
Muzyka Džejsana Deruła ŭ asnoŭnym naležyć da pop-žanru, ale maje ŭpłyvy R&B i chip-chopu. Siarod hałoŭnych krynic natchnieńnia jon časta nazyvaje Majkła Džeksana.
«Mienavita dziakujučy jamu ja staŭ tym, chto ja jość. Kali mnie było čatyry hady, ja ŭpieršyniu jaho ŭbačyŭ. Ja bačyŭ, jak jon zachaplaje publiku, jak mocna jaho vystupy kranali ludziej», — adznačaŭ artyst.
Siarod inšych viadomych vykanaŭcaŭ, jakija akazali na jaho ŭpłyŭ, Deruła nazyvaje Ełvisa Preśli, Madonnu, Prynsa, Ašera i Džaścina Cimbierlejka.
Asabistaje žyćcio
Džejsan Deruła mieŭ niekalki surjoznych adnosin. Najbolš praciahłymi byli adnosiny ź dziaŭčynaj sa škoły, ź jakoj jon sustrakaŭsia try hady da 2014 hoda.
U mai 2021 hoda madel Džena Frums naradziła jamu syna. Praź piać miesiacaŭ paśla naradžeńnia dziciaci para rasstałasia. Pavodle Frums, siarod pryčyn byli niepavažlivyja pavodziny i zdrady z boku Deruła.
Ale, jak vidać pa videa ŭ tyktoku, Džejsan udzielničaje ŭ vychavańni syna i padtrymlivaje adnosiny ź jaho maci.
U žyćci śpievaka jość i hučnyja abvinavačańni ŭ seksualnych damahańniach. Vosieńniu 2023 hoda suprać jaho pazoŭ padała śpiavačka Emazan Hibsan. Pavodle jaje pakazańniaŭ, u 2021 hodzie muzykant prapanavaŭ joj kantrakt, i jany pačali sumiesna pracavać nad muzykaj. Deruła vystupaŭ u roli jaje «nastaŭnika, kiraŭnika i ahienta».
Pavodle advakata Hibsan, Deruła parušaŭ damoŭlenaści, pahražaŭ i «biessaromna damahaŭsia» da maładoj kalehi. Sama jana śćviardžała, što śpiavak prajaŭlaŭ ahresiju i nieadnarazova nastojvaŭ, kab jana ŭžyvała ałkahol i zajmałasia ź im seksam, niahledziačy na jaje admovu.
U krasaviku 2024 hoda sudździa ŭ Kalifornii adchiliŭ spravu, bo kantrakty, padpisanyja z Deruła i Atlantic Records, utrymlivali punkt, što ŭsie sprečki pavinny razhladacca ŭ Ńju-Jorku. Pradstaŭniki Hibsan zajavili, što pierapadaduć pazoŭ u Ńju-Jorku.
Deruła taksama hastraluje pa postsavieckaj prastory. U lutym 2024 hoda jon vystupaŭ u Ałmaty, a letam taho ž hoda naviedaŭ cyrymoniju adkryćcia mižnarodnaha fiestyvalu Dream Fest na Kaśpijskim uźbiarežžy ŭ Baku.
Na vierasień 2025 hoda zapłanavanyja kancerty artysta ŭ Maskvie i Sankt-Pieciarburhu.
«Zabić jaho ci adrezać jamu jajcy ja nie rašyŭsia». Padrabiaznaści trahiedyi ŭ Hdańsku, dzie vajar katavaŭ bojfrenda, a paśla zabiŭ siabie65
Kamientary