Padčas pieramovaŭ u Kuała-Łumpury Tajłand i Kambodža pahadzilisia nieadkładna i biez dadatkovych umoŭ spynić ahoń na 24 hadziny. Pra heta paviedamiŭ premjer-ministr Małajzii Anvar Ibrahim. Jon taksama adznačyŭ, što jahonaja kraina i inšyja dziaržavy ASIEAN hatovyja dapamahać u nazirańni za vykanańniem pieramirja.
Pavodle damoŭlenaści, baki adnoviać pramyja kantakty pamiž premjer-ministrami, a taksama kiraŭnikami źniešniepalityčnych i abaronnych viedamstvaŭ, i razam raspracujuć miechanizm kantrolu za spynieńniem ahniu.
U pieramovach udzielničali vykanaŭca abaviazkaŭ premjer-ministra Tajłanda Pchumtam Viečajačaj i premjer-ministr Kambodžy Chun Maniet. Taksama prysutničali pasły ZŠA i Kitaja ŭ Małajzii.
Kanflikt pamiž krainami ŭźnik 24 lipienia z-za sprečnych terytoryj vakoł chramaŭ Preachvichiea i Ta Moan Tchom. Choć jašče ŭ 1962 hodzie Mižnarodny sud AAN pryznaŭ hetyja ziemli častkaj Kambodžy, Tajłand z hetym nie pahadziŭsia.
Padčas apošniaj eskałacyi zahinuli 35 čałaviek z abodvuch bakoŭ, u tym liku mirnyja žychary, a bolš za 200 tysiač byli vymušanyja evakujavacca.
Da kanfliktu dałučyŭsia prezident ZŠA Donald Tramp. Jon parazmaŭlaŭ ź lidarami abiedźviuch krain i zapatrabavaŭ jak maha chutčej damovicca ab spynieńni ahniu. Tramp navat pryhraziŭ uviadzieńniem vysokich (36%) pošlin, kali baki nie dasiahnuć pieramirja. Kambodža pahadziłasia adrazu, a Tajłand vykazaŭ hatoŭnaść pry ŭmovie pačatku dyjałohu. Ale ŭžo praź niekalki hadzin paśla tych razmoŭ abstreły adnavilisia.
U toj ža čas paviedamlałasia, što bajavyja dziejańni, jakija pačalisia na paŭnočnaj miažy, raspaŭsiudzilisia na poŭdzień — u pravincyi Trat i Čantchabury, niedaloka ad kurortnaj Patai i staličnaha Banhkoka.
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary