Pamierła pieršaja žančyna — dyrektar brytanskaj raźviedki MI‑5. Jana stała pratatypam M u filmach pra Džejmsa Bonda
Steła Ryminhtan, pieršaja žančyna — hienieralny dyrektar brytanskaj słužby kontrraźviedki MI‑5, pamierła ŭ niadzielu ŭ 90 hadoŭ. Jana kiravała MI‑5 z 1992 pa 1996 hod i stała pratatypam hieroja M — aktrysy Džudzi Denč — u filmach pra Džejmsa Bonda, piša Bi-bi-si.
«Jana pamierła siarod svaich rodnych i siarod svaich sabak, i da apošniaha ŭzdychu ŭparta trymałasia za žyćcio, jakoje jana tak lubiła», — havorycca ŭ zajavie siamji Steły Ryminhtan.
«Jaje kiraŭnictva pakłała pačatak novaj ery adkrytaści i prazrystaści pracy MI-5, słužby, jakaja zabiaśpiečvaje biaśpieku našaj krainy, i hetaja spadčyna aktualna i pa hety dzień», — prakamientavaŭ śmierć Ryminhtan dyrektar MI-5 Kien Makkałłam.
«MI-5 źviedała maštabnyja pieraŭtvareńni pad kiraŭnictvam damy Steły», — skazaŭ kiraŭnik padradzialeńnia MI-6 Ryčard Mur.
«Pad jaje kiraŭnictvam MI-5 uziała na siabie asnoŭnuju rolu ŭ baraćbie ź irłandskim respublikanskim teraryzmam u Vialikabrytanii, štab-kvatera słužby pierajechała ŭ Temz-Chaŭs, i palityka bolšaj adkrytaści raźviejvała mify pra Mi-5, u tym liku z dapamohaj zapusku prahramy pieradačy dakumientaŭ słužby ŭ Nacyjanalny archiŭ», — dadaŭ Mur.
Steła Ryminhtan naradziłasia ŭ 1935 hodzie ŭ Łondanie. Jana pačała svaju karjeru ŭ MI-5 u Indyi, kudy jana pierajechała razam sa svaim mužam, jaki atrymaŭ tam dypłamatyčnu pasadu.
Spačatku Ryminhtan pracavała sakratarkaj-mašynistkaj na niapoŭnaj zaniataści, a ŭ 1969, kali para viarnułasia ŭ Vialikabrytaniju, stała paŭnavartasnaj supracoŭnicaj MI-5.
U 1991 hodzie Ryminhtan zaniała pasadu namieśnika hienieralnaha dyrektara MI-5, a praz hod, u 1992-m — hienieralnaha dyrektara. Jana stała pieršaj žančynaj na hetaj pasadzie.
«Ja hanarusia tym, što ja stała pieršaj žančynaj — hienieralnaj dyrektarkaj, i što za čas majoj słužby MI-5 źmianiłasia i pierastała być staramodnaj zakrytaj arhanizacyjaj», — raspaviadała Ryminhtan u 2011 hodzie.
Ryminhtan taksama stała pieršaj kiraŭnicaj MI-5, pra čyjo pryznačeńni było abvieščana publična. Kali ŭ haziecie apublikavali fatahrafiju jaje doma, Ryminhtan razam ź siamjoj pavinny byli pierajechać u sakretnaje miesca dziela ŭłasnaj biaśpieki, pa sutnaści, pierajści ŭ padpolle, uspaminała jana.
U intervju Bi-bi-si ŭ 1999 hodzie Ryminhtan raskazvała, što całkam i całkam uchvaliła rašeńnie publična nazvać jaje imia. Adnak jana nie mierkavała, jak šmat uvahi pryciahnie jaje pryznačeńnie i nakolki vialikaj budzie cikavaść presy.
Ryminhtan syšła ŭ adstaŭku ŭ 1996 hodzie. U 2001 hodzie jana napisała aŭtabijahrafiju pad nazvaj «Adkryty sakret», a zatym — niekalki špijonskich detektyvaŭ. U 2014 hodzie jana raspaviała Bi-bi-si, što jaje knihi prachodzili pravierku ŭ MI-5, i časam słužba prasiła jaje pamianiać imiony abo miesca dziejańnia.
U 2011 hodzie Ryminhtan uznačaliła žury litaraturnaj premii Bukiera.
«Pra sustreču Łuku zaŭsiody prasili pieradać Pucinu». Šuster raskazaŭ, jak Łukašenka prapanoŭvaŭ svaje pasłuhi amierykancam9
Kamientary