Maks Korž vystupić na stadyjonie ŭ Varšavie. Niekalki vulic pierakryjuć i źmieniać ruch transpartu 9 žniŭnia
Biełaruski vykanaŭca Maks Korž vystupić na adnym z najbujniejšych stadyjonaŭ Polščy — PGE Narodowy. Kvitki źjavilisia ŭ prodažy jašče ŭ śniežni 2024 hoda, i ich amal adrazu raskupili. Vystup stanie pieršym kancertam Karža ŭ Polščy z 2019 hoda.
Čakajecca, što padzieja vykliča ciažkaści ŭ ruchu transpartu, piša Most.
Dajechać na stadyjon PGE Narodowy zručniej za ŭsio na mietro linii M2, a taksama ciahnikami SKM i Koleje Mazowieckie. U subotu, 9 žniŭnia, u suviazi ź mierapryjemstvam z 15:00 da 18:00 budzie abmiežavany ruch u rajonie «Saska Kiepa».
Pierad zakančeńniem kancerta, prykładna ŭ 22:30, budzie pierakryta aleja Zielaniecka ad vuł. Tarhovaj da Vašynhtona. Chutčej za ŭsio, paśla kancerta (kala 22:45) palicyja prymie rašeńnie ab zakryćci mosta Paniatoŭskaha i Alei Jerazulemskija pamiž kruhavymi raźviazkami de Hola i Vašynhtona. U hety čas nie buduć kursiravać tramvai.
Pa maršrucie pamiž kruham Viatračna i płoščaj Narutoviča, praz Łazienkoŭski most buduć kursiravać padmiennyja aŭtobusy linii Z99. Kala stadyjona sieści ŭ ich možna budzie na vuł. Francuzskaj abo Saskaj (u zaležnaści ad prachodnaści vulic). Pa tym ža moście buduć iści maršruty № 111, 117, 158, 166, 507, 521, N22, N24 i N72.
Kali zakryjuć most Paniatoŭskaha, tramvai 7 i 9 buduć kursiravać na baku Śródmieście tolki pamiž płoščami Narutoviča i Stankieviča. A ŭ rajonie Praha tramvai linii 9 buduć chadzić ad kaniečnaj Ratušnaja-Zoa da Hasłaviek pa vulicach: Ratušnaja, Tarhova, Aleja Zielaniecka, Vašynhtona i Hrachoŭskaja.
Tramvai 7 i 22 buduć iści pamiž vuł. Kaviačynskaj i kruham Viatračnaj praz aleju Vašynhtona.
Bolš padrabiaznaja infarmacyja pra ruch transpartu ŭ rajonie stadyjona 9 žniŭnia — na sajcie transpartnaj kampanii WTP.
Kamientary