«Kanviert dla Cichanoŭskaj». Hienii-łukašysty znoŭ sami siabie vykryli i vyściebali

Na ANT pakazali kadry, na jakich Andrej Paŭlučenka pieradaje skrutak Cichanoŭskaj. Nie Cichanoŭskaj-2025 — upeŭnienamu ŭ sabie jeŭrapiejskamu lidaru z dośviedam, jaki abapirajecca na padtrymku štaba i siamji, a Cichanoŭskaj-2020 — chatniaj haspadyni, jakaja z pryncypu kinuła vyklik dyktataru i zastałasia ŭ dni paśla vybaraŭ sam-nasam z Karpiankovymi i Paŭlučenkami.

Hienierał u filmie ščyra raskazvaje, jak jon 10 žniŭnia pa daručeńni Łukašenki pryjechaŭ u Centrvybarkam, kab razabracca z zajavaj, jakuju tudy padała Śviatłana Cichanoŭskaja.

Stop! Vy kiraŭnik śpiecsłužby, a Łukašenka i Cichanoŭskaja — dva raŭnapraŭnyja kandydaty, aficyjny kančatkovy vynik vybaraŭ jašče nie abvieščany. Ludzi na vulicach vakoł z ryzykaj dla žyćcia bjuć tryvohu: vybary sfalsifikavanyja, treba pierapadlik hałasoŭ. I jak heta vy, hienierał, pa «daručeńni» adnaho kandydata pryjazdžajecie da druhoha kandydata arhanizoŭvać jaje departacyju za miažu, dy jašče ź niejkimi hrašyma ŭ valucie sumnieŭnaha pachodžańnia?

Pavodle słoŭ Paŭlučenki, Cichanoŭskaja była napałochanaja i razhublenaja, nie viedała, da kaho źviarnucca. Adzinym jaje žadańniem było ŭbačyć svaich dziaciej, jakija tady byli za miažoj.

«Voś hrošy, jakija vy prasili», — kaža Cichanoŭskaj kiraŭnik Apieratyŭna-analityčnaha centra.

Cichanoŭskaja sapraŭdy na videakadrach siadzić źbiantežanaja i spałochanaja i nie razumieje, što rabić (kab zastacca ŭ žyvych!). Jaki kadr: chatniaja haspadynia siadzić na kuchni, a pierad joju — hienierał.

Hienii-łukašysty znoŭ sami siabie vykryli i vyściebali.

«Paŭlučenka sprabavaŭ padkupić zakonna vybranaha prezidenta», — jak pažartavaŭ niechta ŭ kamientach. Ci jak heta tam nazyvajecca ŭ Kryminalnym kodeksie, kali słužboviec zabiraje hrošy ŭ dziaržpradpryjemstva i addaje ich niejkaj fizasobie?

A moža niekali narešcie ŭ Biełarusi stanie tak, što aficery buduć dziejničać pa zakonie, a nie pa paniaćciach, «zhodna z daručeńniami» adnaho z kandydataŭ? Ja ŭžo nie kažu pra tyja «tradycyjnyja kaštoŭnaści», viernaść jakim tak traskuča dekłarujecca.

U svaim «nie da zakonaŭ» łukašysty nie razumiejuć, što ich videa tolki paćviardžaje: pakul va ŭsioj Biełarusi adbyvalisia demanstracyi za sumlenny padlik hałasoŭ, Śviatłanu Cichanoŭskuju faktyčna ŭziali ŭ zakładniki siłaviki ź bližniaha koła Alaksandra Łukašenki. Jany izalavali jaje, kandydata ŭ prezidenty, ad jaje kamandy — pakul muž, Siarhiej Cichanoŭski, znachodziŭsia ŭ SIZA. I vymusili — usio jašče zakonnaha, pa ich ža zakonach zakonnaha, kandydata ŭ prezidenty pakinuć Biełaruś.

Što ž, tak i stałasia toje, što stałasia. Majem tatalitarny režym u Biełarusi, jaki raździaliŭ los pucinskaj Rasii, i majem Cichanoŭskuju-2025, jakaja dahetul zastajecca lehitymnym hołasam jeŭrapiejskaj Biełarusi.

• 102
• 0
• 5
• 5
• 0
• 1
• 1
• 2