Cichanoŭski adkazaŭ na pretenzii pra naviedvańnia Kryma i pracu z Ksienijaj Sabčak

Padčas intervju «Jeŭraradyjo» ŭ Cichanoŭskaha spytali pra ŭniasieńnie jaho ŭ bazu «Miratvorac», staŭleńnie da Kryma i supracu z Ksienijaj Sabčak.

Błohier adrazu zaŭvažyŭ, što nikoli nie prasłaŭlaŭ viartańnia Kryma Rasii. 

«Ja va ŭsich svaich intervju kazaŭ, što Krym — heta Ukraina, hetak ža jak i Vilnia — heta Litva», — adkazaŭ Cichanoŭski.

U sacsietkach jość fota błohiera ŭ Krymie za 2017 hod. Ale Cichanoŭski źviartaje ŭvahu, što toje supolnaje fota i nadpis «Krym naš» apublikavaŭ nie jon, a jaho znajomy — sam błohier takoha nie pisaŭ i nie kazaŭ.

«Ja žartavaŭ na hetuju temu, ale nikoli ja nie ŭchvalaŭ rasijskuju ahresiju. Nikoli. I nie budu nikoli ŭchvalać. I maja pazicyja pa Ukrainie nikoli nie pamianiajecca, jak i ŭ dačynieńni da prezidenta Zialenskaha.

Ja jaho liču hierojem. Jamu vypała ciažkaja dola. I toje, što ja pieražyŭ u turmie, heta łuchta ŭ paraŭnańni z tymi pakutami, jakija jon źviedvaje kožny dzień za ŭkraincaŭ».

Cichanoŭski kaža, što śpiecsłužby prydumvajuć «ruski śled», kab pasvaryć biełarusaŭ. Jon zhadvaje, jak u 2020-m Łukašenka vystaŭlaŭ jaho jak prarasijskaha ahienta.

«Nas ža ŭ adzin momant, kali voś hetych vahniercaŭ zatrymali, vyklikaje śledčy i pakazvaje pastanovu ab zaviadzieńni kryminalnaj spravy ŭ dačynieńni da Cichanoŭskaha i Statkieviča za toje, što my vyklikali siudy, naniali za hrošy 33 vahnieraŭcaŭ i sabralisia tut zrabić dziaržpieravarot. I što ŭ śledstva jość biassprečnyja dokazy, što my ich siudy pryvieźli, i tamu my pavinny ŭtrymlivacca (ja i Statkievič) pad vartaj».

Cichanoŭski nazyvaje Łukašenku chłusam.

«Kali vy viedajecie Łukašenku, siabry, tolki heta pavinna vam skazać, što Cichanoŭski — heta biełarus, jaki dziejničaje ŭ intaresach biełaruskaha naroda, nie rasijskaha. Ja paŭsiul kažu, što Pucin, jahony režym — heta naš ahulny vorah z ukraincami. I nie treba voś heta mnie pryplatać», — davodzić Cichanoŭski.

Pra vypadkovuju sustreču z Navalnym

Błohier nahadvaje, što sam raskazaŭ pra svaju daŭniuju vypadkovuju sustreču z Navalnym:

«Ja sutyknuŭsia ź im litaralna na 15 siekund. Voś jak z vami na vulicy, na piešachodnym pierachodzie. U jaho ofis byŭ niedaloka ad taho miesca, dzie ja ramantavaŭ mašynu ŭ toj momant. Ja išoŭ pa mašynu, jon stajaŭ na bardziury. Ja ź im sutyknuŭsia, ja kažu: «O, Locha». [Jon] nieznajomy čałaviek mnie. Ja jašče tady nie byŭ błohieram navat».

Cichanoŭski raskazvaje, što paprasiŭ u Navalnaha numar telefona, ale toj jaho nie daŭ, prapanavaŭšy pisać na adras elektronnaj pošty svajho Fondu baraćby z karupcyjaj i nikoli nie mieŭ ź im asabistaha kantaktu paśla.

«Na poštu, ja, pa-mojmu, pisaŭ. I mnie nichto nie adkazaŭ», — zhadvaje błohier.

Pra pracu z Ksienijaj Sabčak

Što tyčycca Ksienii Sabčak, to, tłumačyć Siarhiej Cichanoŭski, jon tolki adnojčy pracavaŭ ź joj jak pradziusar:

«Ja zdymaŭ rekłamnyja roliki, ja zdymaŭ rekłamnuju kampaniju Izraila. Tam adzin trek byŭ turystyčny, druhi — adpačynak na Čyrvonym mory, SPA. I treci — chryścijanstva, to-bok pałomnictva.

Ja zdymaŭ z Emanuiłam Vitarhanam, z [Dźmitryjem] Dzibrovym. I Ksienija Sabčak i inšyja tam byli sielebryci. Heta prosta akciory, a ja pradziusar. Mianie naniali zdymać rekłamu. (…) Ksienija była sa svaim mužam Maksimam Vitarhanam».

Cichanoŭski zhadvaje, što ŭ zdymačnaj hrupie było 33 čałavieki, u asnoŭnym biełarusy. Błohier padkreślivaje, što ni da hetaha, ni paśla nie sustrakaŭsia z Sabčak.

«Nijakich razmovaŭ u nas ni pra što nie było. Joj padabałasia sa mnoj pracavać. Kaža: «Heta adziny adekvatny čałaviek tut». (…) Tamu što tam byŭ jašče adzin pradziusar ź izrailskaha boku. Ź im niemahčyma było pracavać. I nie vykonvali svaje abaviazki ludzi».

Cichanoŭski zaŭvažaje, što raźmiaščaŭ na svajoj staroncy ŭ sacsietkach fotazdymki z rasijskimi zorkami, ź jakimi pracavaŭ, adnak heta ni ŭ jakim razie nie moža śviedčyć ab tym, što jon byŭ prarasijskim.

• 11
• 0
• 6
• 7
• 1
• 1
• 1
• 0