«Volnyja Kupałaŭcy» pierapracavali bazu danosaŭ u pjesu. Što jašče pakažuć u novym siezonie
Aleh Harbuz i Siarhiej Čub raskazali ŭ «Ranicy ź Biełsatam», što pakažuć u novym siezonie. Kvitki na vierasień i kastryčnik užo ŭ prodažy.
«Volnyja Kupałaŭcy» — byłyja aktory Kupałaŭskaha teatru, jakija byli vymušanyja pakinuć Biełaruś i praciahnuli tvorčaść u emihracyi — zusim chutka raspačnuć novy siezon. Što pakažuć, raskazali režysior Aleh Harbuz i aktor Siarhiej Čub u «Ranicy ź Biełsatam».
Siezon adkryjuć užo viadomym śpiektaklem «Husi-ludzi-lebiedzi» pavodle ramanu Alhierda Bachareviča «Sabaki Jeŭropy». Jak kaža Siarhiej Čub, heta adzin z najlepšych śpiektaklaŭ, u jakim «vialikaja kolkaść kupałaŭcaŭ na kvadratny mietr». Pahladzieć jaho možna budzie 2 i 3 vieraśnia ŭ Varšavie.
Zatym — «Ekstremisty», jakich pakažuć 20 vieraśnia ŭ Vilni (premjera śpiektaklu adbyłasia ŭ kancy červienia), «Valizka» 24 vieraśnia ŭ Varšavie, «Ekstremisty» 1 i 2 kastryčnika ŭ Varšavie i «Zekamieron» 22 kastryčnika ŭ Varšavie.
Apošni — «Zekamieron» pavodle tvoru palitviaźnia Maksima Znaka — Siarhiej Čub nazvaŭ lubimym: jaho čaściej hrajuć, pakazali ŭžo ŭ mnostvie jeŭrapiejskich haradoŭ, na scenie Čub i Harbuz razam ź lidaram «J:mors» Uładzimiram Puhačam.
Kvitki na ŭsie hetyja śpiektakli možna kupić tut.
U śniežni ŭ Vilni zapłanavany fiestyval admysłova dla «Kupałaŭcaŭ». Aleh Harbuz raskazaŭ, što tam pakažuć maksimum śpiektaklaŭ — navat «Dziady», jakich daŭno nie hrali i jašče nie hrali za miežami Lublina.
I ŭ kancy 2025 hoda, pačatku 2026-ha «Kupałaŭcy» mohuć uziać udzieł u fiestyvali ŭ Varšavie, kali znojduć finansavańnie.
Aleh Harbuz raskazaŭ pra novy śpiektakl, nad jakim ciapier pracujuć. Pavieł Łatuška dapamoh z pošukam srodkaŭ na hety tvor.
«Nie viedaju ŭ vyniku, dziela čaho my heta zrabili: my pierapracavali bazu «Kibieraŭ», voś tuju z danosami… I na padstavie ich, natchnionaja hetymi danosami była napisanaja pjesa», — raskazaŭ Harbuz.
Mierkavałasia, što pjesa budzie sarkastyčna-iraničnaj, ale atrymałasia, pavodle Harbuza, «bolš žyćciovaja»: budzie siamiejnaja historyja, u jakoj «usie pakrychu danosiać adno na adnaho». Da pjesy ŭžo napisanyja muzyka i pieśni, buduć i tancy. Kali atrymajecca zdabyć dafinansavańnie, pryblizna ŭ pačatku 2026 hoda daduć premjeru. Pjesa zaviecca «Nieabyjakavyja», a nazva śpiektaklu jašče nie zaćvierdžanaja. Režysioram moža stać Vojciech Urbański — jon ža byŭ režysioram «Zekamieronu».
Ciapier čytajuć
U Minsku zaviaršyli budaŭnictva piacizorkavaha hatela na miescy kolišniaha «Biełekspa»3
U Minsku zaviaršyli budaŭnictva piacizorkavaha hatela na miescy kolišniaha «Biełekspa»
Sumleńnie, kachańnie, koły piekła i halivudski finał. U siamji budaŭnika i biblijatekarki z Pružanskaha rajona Ihara i Julii Łaptanovičaŭ aryštavali spačatku jaho, paśla — jaje, a paśla i babulu33
Kamientary