Ukraina zajaviła, što ŭ Navarasijsku byŭ paškodžany karabiel Čarnamorskaha fłotu Rasii. Pavodle infarmacyi Hałoŭnaha ŭpraŭleńnia raźviedki Ministerstva abarony Ukrainy, śpiecnazaŭcy vyśledzili i atakavali šmatfunkcyjanalnaje sudna prajekta MPSV07, jakoje zajmałasia radyjoelektronnaj raźviedkaj i patrulavańniem buchty.
Heta byŭ avaryjna-ratavalny karabiel mahutnaściu 4 MVt, jaki kaštuje kala 60 młn dołaraŭ i byŭ uviedzieny ŭ ekspłuatacyju ŭ 2015 hodzie. Mahčyma, havorka idzie pra karabiel «Ratavalnik Dziamidaŭ», ličyć vydańnie The Insider.
Dla ŭdaru vykarystoŭvaŭsia bieśpiłotnik ukrainskaj vytvorčaści, jaki paraziŭ chodavy mościk, dzie raźmiaščałasia navihacyjnaja i suviaznaja technika. U vyniku była źniščanaja aparatura radyjoelektronnaj raźviedki, a sam karabiel vyjšaŭ sa stroju i patrabuje darahoha ramontu. Minabarony RF incydent pakul nie kamientavała.
Ataku paćvierdzili taksama marski atrad 88-j dobraachvotnickaj bryhady «Espańoła» i Z-kanał «Dva majora», adznačajučy, što ŭzbrajeńniaŭ na borcie nie było, a paškodžańni nibyta niaznačnyja.
U Rasii ŭsiaho jość čatyry takija karabli, jakija abstalavanyja vadałaznymi kompleksami, hidrałakatarami i srodkami radyjoelektronnaj raźviedki, vykarystoŭvajucca jany dla abśledavańnia marskoha dna i patrulavańnia.
Raniej pradstaŭnik VMS Ukrainy zajaviŭ, što paśla ŭdaraŭ USU ŭ Krymie ŭ Rasii nie zastałosia bajazdolnych karabloŭ. Spadarožnikavyja zdymki pakazvali, što acalełyja sudny Čarnamorskaha fłotu skancentravalisia ŭ Navarasijsku. Ale baza apynułasia pad pahrozaj paśla taho, jak ZŠA i ich sajuźniki dazvolili Ukrainie vykarystoŭvać dalnabojnyja rakiety.
Pavodle danych Oryx, z pačatku vajny Ukraina źniščyła abo paškodziła 27 rasijskich karabloŭ i adnu padvodnuju łodku.
Ciapier čytajuć
62‑hadovaja biznesvumen i miljanierka Iryna Ciareščanka padzialiłasia historyjaj svajho kachańnia z mužčynam, na 20 hadoŭ małodšym za jaje4
Kamientary