Ukrainskija drony atakavali Sočy ŭ noč na aŭtorak, paviedamiŭ hubiernatar Krasnadarskaha kraju Viačasłaŭ Kandraćjeŭ. U hety momant u horadzie moh znachodzicca prybyŭšy napiaredadni Uładzimir Pucin, piša «Ahienctva».
U vyniku ataki BPŁA zahinuŭ adzin čałaviek, paviedamiŭ kiraŭnik rehijona. Mužčyna byŭ za rulom aŭtamabila, u jaki patrapili abłomki źbitaha drona. Taksama paškodžańni atrymali «prykładna šeść» pryvatnych damoŭ, dadaŭ Kandraćjeŭ. Z zajaŭ aficyjnych asobaŭ i publikacyj u ŚMI nie zrazumieła, dzie mienavita abłomki zabili mužčynu i paškodzili pryvatnyja damy.
Unačy nad Sočy trojčy ŭklučalisia sireny pavietranaj tryvohi, śviedčyć manitorynhavy telehram-kanał. Aeraport Sočy zakryvaŭsia bolš čym na 30 chvilin.
U momant ataki ŭ Sočy moh znachodzicca Uładzimir Pucin. Napiaredadni mienavita z hetaha horada jon udzielničaŭ pa videasuviazi ŭ niečarhovaj sustrečy BRIKS, ukazana na sajcie Kramla.
Za niekalki hadzin da hetaha ŭ Sočy prybyŭ Ił-96-300PU lotnaha atrada «Rasija» z bartavym numaram RA-96024, śviedčać dadzienyja Flightradar24. Mienavita na hetym samalocie Pucin lotaŭ na Alasku na sustreču z Donaldam Trampam. Pavodle dadzienych Flightradar24, hety bort dahetul znachodzicca ŭ Sočy.
U Sočy raźmieščana rezidencyja Pucina «Bačaroŭ ručaj». Raniej Pucin žyŭ u horadzie tydniami, adnak z tych časoŭ, jak da Sočy stali dalatać ukrainskija drony, jon praktyčna pierastaŭ naviedvać horad, pisaŭ «Prajekt» u kastryčniku minułaha hoda. Naprykład, kali ŭ listapadzie 2024 hoda jon usio ž naviedaŭ Sočy dziela pramovy ŭ Vałdajskim kłubie, to, vierahodna, pravioŭ u horadzie tolki dzień i načavaŭ u samalocie.
U kancy žniŭnia 2025 hoda abłomki ŭkrainskaha drona ŭpali ŭ Hielendžyku i vyklikali pažar pobač z pałacam Pucina na mysie Idakapas. Ahoń tušyli čatyry dni.
Pa ŭłaśniku «Softkłuba» Sirotku, jaki siadzić u SIZA KDB, prylacieła i ad Polščy — na jaho kryptabiržu Bynex nakłali sankcyi2
Kamientary