«Hetyja słovy źlatajuć nie z vusnaŭ aŭtara, a ad admoŭnych piersanažaŭ». Prachanaŭ apraŭdvajecca za raman, u jakim zło vypisaŭ Pucina
Rasijski piśmieńnik i prapahandyst Alaksandr Prachanaŭ vydaŭ raman «Lemnier», u jakim centralny piersanaž stvorany z zasnavalnika PVK «Vahnier» Jaŭhiena Pryhožyna. Raspaŭsiud knihi zabaranili, nie ŭ apošniuju čarhu, imavierna, praz vobraz, u jakim možna ŭhadać ciapierašniaha kiraŭnika Rasii.
Ciapier Alaksandr Prachanaŭ tłumačyć svaju pazicyju.
Jon piša, što vakoł ramana «Lemnier» razharajecca skandał. Ź jaho vychoplivajuć frazy, u jakich iranična i złaśliva havorycca pra hieroja ramana prezidenta Trajevidava — u jakim uhledzieli vobraz ciapierašniaha prezidenta Rasii.
«Słovy, prama skažam, nie cukar. Ale sprava ŭ tym, što hetyja słovy vylatajuć nie z vusnaŭ aŭtara, nie ad imia mastaka, jaki piša raman, a ŭkładzieny ŭ vusny adnaho z samych admoŭnych piersanažaŭ ramana, jakoha potym zabivajuć, topiać u ledzianoj pałoncy — pałoncy ruskaj historyi, kudy topiać usich admoŭnych hierojaŭ ramana, uklučajučy i Lemniera — słaboj kopii Jaŭhiena Pryhožyna», — piša Prachanaŭ.
Jon ličyć, što niadobrazyčliŭcy žadajuć naklikać na aŭtara ramana hnieŭ dziaržavy.
«Maja publičnaja pazicyja hranična jasnaja: ja — dziaržaŭnik, baču ŭ prezidencie Rasii Pucinie ŭvasableńnie ruskaj historyi na jaje ŭzychodziačym vitku, kali volaju prezidenta Rasija ad vialikich uzrušeńniaŭ uzychodzić da vieličy», — piša Prachanaŭ.
Vobraz Leanida Leanidaviča Trajavidava, u jakim uhadvajecca vobraz Uładzimira Pucina, nasamreč vyhladaje skandalna. Trajavidaŭ zachoŭvaje cieły vorahaŭ u kabiniecie i natalajecca kryvioj cnatlivic.
«Raz u miesiac Leanid Trajavidaŭ amałodžvaŭsia, całkam mianiaŭ kroŭ. Ź Piekina jamu dasyłali farforavuju vazu z ružovymi pjaŭkami. Hetych pjavak nasyčali kryvioj kitajskich niavińnic. Pjaŭki prysmoktvalisia da jahonaha cieła, pili jahonuju stomlenuju kroŭ, ulivajučy naŭzamien cnatlivuju śviežaść. Ukusy ružovych pjavak byli dalikatnyja, jak pacałunki», — apisaŭ Prachanaŭ asablivaści kiraŭnika rasijskaj dziaržavy.
Rasśledavalniki vydańnia «Prajekt» raniej pisali, što Pucin nasamreč prymaje vanny z kryvioj ad abrezanych u varvarskaj pracedury rahoŭ ałtajskich marałaŭ. Efiekt ad hetaj vanny navukova nie dakazany, jana maje śpiecyfičny vyhlad i pach. Ale Pucinu padabajecca.
2 kastryčnika kniha Prachanava niečakana źnikła z katałoha ŭ internet-kniharni «Čytaj-horad», a na markietpłejsie Ozon było adznačana, što papiarovyja asobniki ŭžo raskuplenyja.
Prezientacyja ramana, pryznačanaja na 29 vieraśnia ŭ Maskoŭskim domie knihi, taksama była admieniena.
Biełarusy sustrakajuć vyzvalenych palitviaźniaŭ u Vilni FOTY i VIDEA3
Kamientary
Na..vošta vyciahvać heta... hrafamana