Jašče ŭ adnym rajcentry zakryvajuć raddom — paradzich z Kamienca buduć nakiroŭvać u bujniejšyja harady
Jak stała viadoma «Našaj Nivie», z 1 studzienia 2026 hoda ŭ Kamiency, rajcentry ŭ Bresckaj vobłaści, zakryvajecca radzilnaje adździaleńnie. Heta paćvierdzili i ŭ samoj balnicy.
Źviazana heta ź nievysokaj naradžalnaściu ŭ horadzie z vaśmitysiačnym nasielnictvam, pry jakoj, pa acenkach Minzdaroŭja, niama sensu ŭtrymlivać asobnaje adździaleńnie ź piersanałam.
Pry hetym ciažarnyja žančyny ŭsio jašče zmohuć stajać na ŭliku ŭ hiniekołaha pa miescy rehistracyi.
Bližejšyja radzilnyja damy dla kamianieckich žančyn ciapier buduć dastupnyja ŭ Breście ci Kobrynie, što znachodziacca za 44 i 54 kiłamietry adpaviedna.
Siarod niekatorych žycharak rajcentra, jakim chutka naradžać, navina ŭžo vyklikała chvalavańnie.
«A kali nie paśpieć dajechać? Što tady? Mnie naradžać u studzieni i, kali ščyra, ja bajusia, bo jechać da Bresta hadzinu, a čaćviortyja rody mohuć być voj jak chutkija», — padzialiłasia pieražyvańniami błohierka Iryna Šumik.
U kamientarach dziaŭčynu pačali supakojvać, maŭlaŭ, paśpieješ dajechać da Bresta, nie ty pieršaja — žycharki Małaryty, Žabinki, Pružan i tym bolš viosak tak robiać daŭno. A kali chočaš pierastrachavacca — kładzisia ŭ stacyjanar raniej.
«Ja naradžała ŭ Breście, u Kobrynie i ŭ Kamiancy, i, kali mnie b dali vybar, ja b naradžała tolki ŭ Kamiancy», — napisała błohierka ŭ kamientarach.
Niekatoryja pryvodzili dadatkovy arhumient na karyść bujniejšych radzilniaŭ — budzie lepš pa kamforcie i technicy.
«Ja b, kali ščyra, ciešyłasia mahčymaści naradžać u Breście», — padzialiłasia adna ź dziaŭčyn.
Jašče adna biełaruska padtrymała pasył.
«Dla paŭnaty infarmacyi varta dadać, u jakim stahodździ zachrasła Kamianieckaja radzilnia. Nakolki abhruntavana było b pravodzić abnaŭleńnie ŭsiaho — pałat, abstalavańnia, dzie ŭziać lekaraŭ pracazdolnaha ŭzrostu. U asnoŭnym usie paradzichi zahadzia šukajuć mahčymaść naradzić u Kobrynie pa nakiravańni ci ŭ Breście płatna (abo pryjechać užo ŭ pracesie rodaŭ)».
Z takimi arhumientami pahadžajucca i akušery-hiniekołahi. Tak, Stanisłaŭ Sałaviej u kamientary «Našaj Nivie» raniej tłumačyŭ, što vydatkavać bolš času na darohu zvyčajna nie strašna, a voś abstalavańnie i kampietencyja daktaroŭ sapraŭdy hrajuć rolu.
«Lepš uzmacniać mižrajonnyja balnicy, kab tam była sapraŭdy jakasnaja dapamoha, čym utrymlivać šmat drobnych, dzie nie budzie ni pacyjentaŭ, ni piersanału, ni aparatury — tolki šylda ad taho, što heta balnica», — davodziŭ doktar.
«Kali ty niešta nie robiš pastajanna, ty hublaješ kvalifikacyju. Kali niama pacyjentaŭ, to jaki sens isnavańnia radzilni — prosta kab jana była? Pryniać rody — heta nie prablema, a kali ŭ žančyny buduć uskładnieńni, to ŭ takoj situacyi tam užo mohuć nie dać rady, bo dla krytyčnych situacyj treba ŭtrymlivać dobruju kamandu, a kali lekar bolšuju častku času ničoha nie robić, jon hublaje kvalifikacyju. I lepš hrošy na ŭtrymlivańnie niezahružanych adździaleńniaŭ puścić na dadatkovuju mašynu chutkaj dapamohi ci na viertalot, kab pry, dapuścim, ciažkim kryvacioku dastavić pacyjentku tudy, dzie jaje i dzicia sapraŭdy zmohuć vyratavać».
Jašče ŭ 2020 hodzie ŭ Ministerstvie zdaroŭja abaznačyli, što zakryćcio radzilniaŭ — sprava času ŭ haradach, dzie buduć prymać mienš za 100 rodaŭ za hod. Pry takich pakazčykach paradzich pieranakiroŭvajuć na mižrajonny ŭzrovień.
U suviazi z hetym u 2024 hodzie, naprykład, zakryłasia akušerskaje adździaleńnie ŭ Dokšycach, zakrylisia jany i ŭ Kalinkavičach, Słucku i inšych haradach Biełarusi. Usio heta najpierš źviazana ź nizkaj naradžalnaściu ŭ krainie. Pa aficyjnych danych, u 2024 hodzie ŭ Biełarusi naradziłasia 58 938 dziaciej — heta histaryčny antyrekord.
«Naša Niva» — bastyjon biełaruščyny
PADTRYMAĆUpieršyniu za čatyry hady Biełstat apublikavaŭ źviestki ab naradžalnaści i śmiarotnaści. Danyja žachajuć
U Kalinkavičach zakryli radzilnaje adździaleńnie — kab naradzić, treba jechać u inšy rajon
U jaki momant žančynie, jakaja naradžaje, treba vyklikać chutkuju? Mierkavańnie akušera-hiniekołaha i doktara chutkaj dapamohi
Kamientary