Tramp: Zialenski — adziny, kamu nie padabajecca naš płan zakančeńnia vajny
«Ja dumaŭ, što my vielmi blizkija da ŭkładańnia pahadnieńnia z Rasijaj», — skazaŭ prezident ZŠA.
Prezident ZŠA Donald Tramp zajaviŭ, što prezident Uładzimir Zialenski nibyta adziny, kamu nie padabajecca prapanavany Vašynhtonam płan zakančeńnia vajny, u toj čas jak jahonaje atačeńnie padtrymlivaje hety prajekt. Pra heta prezident ZŠA zajaviŭ padčas razmovy z žurnalistami ŭ Biełym domie, piša «Ukrainskaja praŭda».
«Ja dumaŭ, što my vielmi blizkija da ŭkładańnia pahadnieńnia z Rasijaj. Ja dumaŭ, što my vielmi blizkija da ŭkładańnia pahadnieńnia z Ukrainaj. Pa sutnaści, za vyklučeńniem samoha prezidenta Zialenskaha, jaho ludziam padabajecca prajekt pahadnieńnia».
Pavodle jaho słoŭ, amierykanski płan składajecca «z čatyroch abo piaci punktaŭ». Jon pryznaŭ, što praces pieramoŭ źjaŭlajecca składanym, bo dakumient praduhledžvaje padzieł terytoryj.
Tramp taksama paraŭnaŭ dypłamatyčnyja namahańni sa svaim biznes-dośviedam, adznačyŭšy, što damahčysia zakančeńnia vajny va Ukrainie «ŭ tysiaču razoŭ składaniej», čym zaklučyć ździełku ŭ śfiery nieruchomaści.
Prezident ZŠA ŭ paniadziełak, 8 śniežnia, pachvaliŭsia, što pry jaho prezidenctvie Štaty nie tolki nie traciać na padtrymku Ukrainy ŭ vajnie suprać Rasii, ale i zarablajuć na hetym.
U Kramli vykazali zadavalnieńnie apošnimi zajavami amierykanskaha prezidenta Donalda Trampa, u pryvatnaści, pra pieravahu Rasii na poli boju va Ukrainie, a taksama pra niemahčymaść siabroŭstva Ukrainy ŭ NATA.
Tramp raniej zajaŭlaŭ, što Rasija nibyta pahadziłasia na «mirny płan», u toj čas jak prezident Ukrainy Uładzimir Zialenski navat nie čytaŭ jaho.
Kamientary
Uničtožit Ukrainu ( rovno kak i Rośsiju) na hody i diesiatiletija vpieriod.
Jedinstviennyj vychod eto jeje niemiedlenno priekratiť.