Jak ciapier žyvie «surovy turyst» ź Biełarusi, jaki staŭ znakamitym 12 hadoŭ tamu
Ranicaj 2 śniežnia žychar Viciebska Ihar Varachobaŭ pračnuŭsia viadomym. Tysiačy ludziej u Threads abmiarkoŭvali, jak padvypiŭšy małady čałaviek išoŭ dadomu. Adnak heta daloka nie pieršy biełarus, jaki ŭ adzin momant staŭ zorkaj internetu. Bolš za dziesiać hadoŭ tamu heta zdaryłasia z uradžencam Maładziečna Vitalom Ziałkoŭskim.
Pačałosia ŭsio z taho, što adzin z karystalnikaŭ amierykanskaha sajta Reddit zaŭvažyŭ adnatypnyja fota biełarusa va «VKontaktie». Na ich jon byŭ zaŭsiody surjozny. Dalej zdymki «surovaha turysta» stali virusnymi. Jaho siabar Leanid (imia źmieniena) raskazaŭ «Lusterku», jak spravy ŭ mužčyny ciapier
Suśvietnaja viadomaść da Vitala pryjšła ŭ sakaviku 2013-ha. Tady pra 32‑hadovaha biełarusa pisali amierykanski BuzzFeed, brytanski The Sun, a taksama raskazvali ŭ pieradačy Broken News Daily na Yahoo.
— Pra maje fota i karykatury za čatyry miesiacy papularnaści napisała bolš za 150 ŚMI. Byli prapanovy pa ŭdziełu ŭ rekłamnych prajektach ad Volkswagen, turystyčnych partałaŭ, — kazaŭ jon u 2018 hodzie. — Udałaja prezientacyja Samsung Galaxy S4 była čarhovym vitkom papularnaści — čatyry televizijnyja prajekty: dva anhłamoŭnyja i dva ŭ Minsku. Nie mienš papularnyja i karcinki ad karystalnikaŭ, jakija milhajuć u hazietach nie radziej za maje fota.
Tady Vital sustrakaŭsia ź dziaŭčynaj Taćcianaj, jakaja i stała jaho žonkaj. Biełarus byŭ surjozny navat na zdymku z ułasnaha viasiella.
Z tych časoŭ jak zapaliłasia zorka surovaha turysta, prajšło bolš za 12 hadoŭ. Spravy ŭ padarožnika iduć niadrenna, kaža Leanid. Jon pa-raniejšamu žyvie ŭ Bielhii, u Antvierpienie, i pracuje hałoŭnym inžynieram u kanstruktarskim biuro.
— Taćciana ekanamist, — raskazvaje surazmoŭca. — Šeść hadoŭ tamu ŭ ich naradziŭsia syn Siarhiej. U Biełarusi heta imia vielmi raspaŭsiudžanaje, a ŭ Bielhii, nakolki mnie viadoma, ličycca dastatkova ekzatyčnym. Chłopčyk chodzić u pieršy kłas, lubić niešta kanstrujavać i nazirać za stvareńniem vialikich madelaŭ.
Vital usio tak ža šmat padarožničaje. Na jaho staroncy ŭ VK pieryjadyčna źjaŭlajucca fota z novych pajezdak. Hetaj vosieńniu jon apublikavaŭ zdymki ź Ispanii i Estonii. Na kadrach turyst usio tak ža surjozny.
— Jon raskazvaŭ, što ŭ siarednim u hod naviedvaje kala dziesiaci krain. Novyja harady sprabuje ŭklučać u pajezdki, ale viadomych miescaŭ, dzie jon nie byŭ, u Jeŭropie zastajecca nie tak šmat, — apisvaje Leanid. — Dy i dla jaho jany nie mohuć kankuryravać ź lubimymi Italijaj ci Ispanijaj. Asabliva vyjazdžać za miežy Jeŭropy Vital nie bačyć sensu. Kaža, što tut usio jość. Da taho ž, nakolki viedaju, lotaje jon zvyčajna na try-čatyry dni, kab pahladzieć horad i pabyvać na mory. Kambinuje haradski adpačynak z pryrodaj.
Pa słovach siabra mužčyny, u 2025‑m padarožnik taksama naviedaŭ Finlandyju i Charvatyju, a jašče šmat času pravioŭ u Biełarusi.
Leanid niejak pacikaviŭsia, čamu siabar ciapier publikuje tak mała zdymkaŭ z pajezdak. Toj adkazaŭ, što ŭ bolšaści pryhožych haradoŭ Jeŭropy ŭžo pabyvaŭ i zrabiŭ sełfi tam, tamu ciapier radziej siabie fatahrafuje. Ale, kali jość mahčymaść zrabić ŭdały kadr, jon joj karystajecca.
— Darečy, Vital kazaŭ, što niekatoryja ludzi jaho ŭsio jašče paznajuć. U asnoŭnym heta tyja, chto karystaŭsia internetam u pik papularnaści surovaha turysta, — uspaminaje surazmoŭca. — Byŭ vypadak, kali da jaho ŭ kramie padyšoŭ mužčyna i spytaŭ, ci nie jon toj samy Ziałkoŭski. Ad niečakanaści Vital i pradaviec trochi ździvilisia.
Leanid raskazvaje, što jaho siabar lubić nie tolki padarožžy. Siarod jaho chobi — sport (rovar, baskietboł, štanha) i rybałka. U hetym hodzie biełarus nabyŭ vudu, ale pakul pa Jeŭropie ź joj nikudy nie jeździŭ.
— Vital jak čałaviek nie surovy, a naadvarot, cikaŭny i vielmi tavaryski, — zaklučaje surazmoŭca «Lusterka».
Ciapier čytajuć
Bližejšym časam buduć vyzvaleny bolš za 150 palitźniavolenych13
Kamientary
jany rastuć. i heta dobra)
chto b što ni havaryŭ)