U Drazdach pradajuć dom, jaki pabudavaŭ były premjer Navicki na lhotny kredyt
U Minsku ŭ mikrarajonie Drazdy vystavili na prodaž katedž za 4,5 miljona dalaraŭ. Dom raźmieščany na vulicy Račnoj, dzie žyvuć top-čynoŭniki i inšyja ludzi, nabližanyja da ŭładaŭ. Vystaŭleny na prodaž katedž pabudavaŭ były premjer-ministr Biełarusi Hienadź Navicki, zaŭvažyła «Lusterka». Heta, darečy, adziny dom u Drazdach, u jakim adkryli biznes. U katedžy eks-premjera była prybudova z elitnym sałonam pryhažości «EtualSpa».
«Kompleks premium-kłasa ŭ Drazdach na vialikim učastku ŭ pryvatnaj ułasnaści. Sučasnaje žyllo z 2 majstar-spalniami, 5 pakojami, 4 harderobnymi, prastornaj kuchniaj, 4 sanvuzłami i haścioŭniaj-stałovaj-kuchniaj z panaramnymi voknami. Šale 80 kv. m, z terasaj i kaminam. Biznes-prastora — z riesiepšenam, 8 kabinietami, zonaj kala basiejna i parkoŭkaj na 8 aŭto», — paviedamlajecca ŭ abjavie ab prodažy.
U padrabiaznym apisańni dom prezientujecca jak sučasny abjekt na vialikim pryvatnym učastku z zakrytaj terytoryjaj, łandšaftnym dyzajnam, «razumnym» aŭtapalivam i aśviatleńniem terytoryi.
Kamfort i technałohii tut zabiaśpiečvajuć 17 kandycyjanieraŭ Mitsubishi Electric, 6 sistem vientylacyi z rekupieracyjaj, ciopłyja padłohi, kacioł De Dietrich z kiravańniem sa smartfona, Wi-Fi MikroTik, try internet-linii, sistema biaśpieki Ajax z 16‑ciu kamierami videanazirańnia
Dźvie kuchni abstalavanyja technikaj firmaŭ Smeg, Bosch, Miele, NEFF, Liebherr, u pralni mašyny Miele, usiudy sučasnaja santechnika i azdableńnie jeŭrapiejskich brendaŭ.
Jak kazyrnaje pradstaŭlajecca i raźmiaščeńnie ŭ prestyžnym, ekałahična čystym rajonie — pobač vadaschovišča Drazdy, lesapark, spartyŭnyja maršruty, TRC «Arena-Sici», SPA, «Minsk-Arena», kaviarnia i restarany.
Košt hetaha žylla — 4,5 miljona dalaraŭ, abo 13 miljonaŭ 348,3 tysiačy rubloŭ.
Pra hety dom «Naša Niva» pisała siarod inšych u 2013 hodzie, jaho budavaŭ były premjer-ministr Biełarusi Hienadź Navicki. Na budaŭnictva jon atrymaŭ lhotny kredyt — pad pałovu staŭki refinansavańnia (5,5%), i pavinien byŭ viarnuć hrošy da 2018 hoda. Zvyčajna takija vialikija pazyki nie vydavali ludziam pieradpiensijnaha ŭzrostu, ale dla Navickaha zrabili vyklučeńnie.
Hienadź Navicki byŭ premjer-ministram u 2001‑2003 hadach, a paśla piać hadoŭ zajmaŭ pasadu staršyni Savieta Respubliki. U 65 hadoŭ pajšoŭ na piensiju.
Kamientary