Nastaŭnica ŭ Paŭdniovaj Karei zabiła vaśmihadovuju vučanicu. Heta trahiedyja šakavała ŭsiu krainu

Cud u Paŭdniovaj Karei prysudziŭ nastaŭnicu da pažyćciovaha źniavoleńnia za toje, što jana nažom zabiła vučanicu. Heta sprava šakavała ŭsiu krainu, piša Bi-bi-si.

48‑hadovaja Mion Čže-van zabiła Kim Chio-nil paśla taho, jak zamaniła jaje ŭ kłas. Heta adbyłosia ŭ horadzie Tedžon u lutym. Prakurory patrabavali dla Mion śmiarotnaha pakarańnia, zajaŭlajučy, što siamja achviary prasiła pra surovaje pakarańnie.

Adnak sud pastanaviŭ, što chacia «ryzyka paŭtornaha złačynstva vysokaja, ciažka zrabić vysnovu», što Mion pavinna być pakarana śmierciu.

Mion zajaviła, što budzie kajacca ŭ svaich pamyłkach da kanca žyćcia. Jana skazała, što na momant napadu jaje razvažlivaść była asłablenaja, bo jana prachodziła lačeńnie psichičnaha zdaroŭja.

Prakurory śćviardžali, što padčas rasśledavańnia spravy Mion nie prajaŭlała pakajańnia. Adnak Mion padała ŭ sud dziasiatki listoŭ, u jakich vykazvała raskajańnie.

Raniej Mion prasiła šaścimiesiačny adpačynak z-za depresii, ale viarnułasia ŭ škołu ŭžo praz 20 dzion paśla taho, jak doktar pryznaŭ jaje zdolnaj da pracy, paviedamiła ŭpraŭleńnie adukacyi Tedžona ŭ lutym.

Pavodle hetaha ŭpraŭleńnia, u dni pierad napadam jana prajaŭlała ahresiŭnyja pavodziny, u pryvatnaści schapiła inšuju nastaŭnicu za šyju.

Ranicaj u dzień napadu dvoje čynoŭnikaŭ z adukacyjnaha viedamstva naviedali škołu, kab rasśledavać hety papiaredni incydent.

Mion raspaviała palicyi, što ŭ dzień napadu nabyła nož i pryniesła ŭ škołu, płanujučy zabić siabie razam z vypadkovym dziciom.

Jana taksama raspaviała śledčym, što zamaniła Kim u miedyjakłas, dzie napała na jaje.

Vučanicu Kim abviaścili źnikłaj paśla taho, jak kiroŭca školnaha aŭtobusa paviedamiŭ administracyi, što jana ŭ toj dzień nie pryjšła na miesca pasadki. Paźniej u toj ža dzień dziaŭčynku znajšli ŭ škole z nažavymi ranieńniami pobač ź Mion.

U samoj Mion taksama była rana na šyi, jakuju, pavodle palicyi, jana mahła nanieści sabie sama. Ranu paźniej zašyli ŭ balnicy.

Lidary Paŭdniovaj Karei tady zaklikali pryniać miery biaśpieki, kab praduchilić padobnyja incydenty ŭ budučyni.

«Jak nastaŭnica pačatkovaj škoły, abvinavačanaja znachodziłasia ŭ stanoviščy, u jakim pavinna była abaraniać achviaru, — adznačana ŭ prysudzie suda, ahučanym u paniadziełak. — Ale jana ździejśniła heta žorstkaje złačynstva, u vyniku jakoha dzicia nie było abaroniena tam, dzie pavinna była być u najbolšaj biaśpiecy».

• 0
• 1
• 0
• 5
• 12
• 18
• 0
• 0