«Heta — preludyja vajny». Byłaja ministarka abarony Litvy pra pryloty pavietranych šaroŭ ź Biełarusi
Deputatka Jeŭraparłamienta, byłaja ministarka abarony Litvy Rasa Jukniavičenie ŭ hutarcy na «Svabodzie» patłumačyła, čamu Vilnia ličyć, što naloty pavietranych šaroŭ ź Biełarusi inśpirujucca režymami Łukašenki i Pucina, i jakuju škodu zakryćcio miažy naniasie biełaruskim uładam.
Na pytańnie, ci maje Litva dakładnyja dokazy, što naloty pavietranych šaroŭ inśpiravanyja biełaruskimi ŭładami, Jukniavičenie nahadała, što Alaksandr Łukašenka ŭžo vykarystoŭvaŭ mihrantaŭ jak zbroju suprać Litvy, Łatvii i Polščy.
Pavodle jaje heta ž adbyvajecca i ciapier. Na jaje dumku kantrabandysty nie mohuć dziejničać samastojna ŭ takim masavym maštabie, asabliva z ulikam taho, što biełaruskuju miažu ščylna achoŭvajuć nie tolki biełaruskija siły, ale i rasijskija.
Byłaja ministarka abarony va ŭradzie kansiervataraŭ znachodzicca ŭ apazicyi da dziejnaha ŭradu. Jana adznačyła, što raniej urad kazaŭ, što naloty pavietranych šaroŭ ź Biełarusi — heta tolki kantrabanda. Adnak ciapier, pavodle Jukniavičenie, i dziejny ŭrad pryznaŭ, što heta častka hibrydnaj vajny.
Nakont datyčnaści Rasii da hetych nalotaŭ byłaja ministarka abarony Litvy nie maje sumnievaŭ: «Rasija ŭvieś čas ni pry čym, jana była ni pry čym u Krymie, jana była ni pry čym u Danbasie. Niama nijakich sumnievaŭ, što Łukašenka sam pa sabie takija apieracyi nie ŭčyniaje. Jon — tolki proksi Rasii. Zabudźcie pra suvierennuju dziaržavu Biełaruś pobač z nami, niama jaje. Jość tolki instrumient Kramla. Tolki Łukašenka, napeŭna dumaje, što jon — prezident niejkaj samastojnaj dziaržavy».
Na zaŭvahu, što, mahčyma, akramia Łukašenki hetak ža dumaje prezident ZŠA Donald Tramp, jakija jamu telefanuje, Jukniavičenie zajaviła, što amierykanskija i niekatoryja inšyja palityki robiać adnu i tuju ž pamyłku — spadziajucca adarvać Łukašenku ad Pucina.
«Nie budzie hetaha. Jak i nie ŭviančajucca pośpiecham pieramovy z Pucinym nakont Ukrainy. Dyktataraŭ tolki siłaj možna prymusić źmianić svoj kurs. Abo prosta treba ich pieramahčy. Inšaha vyjścia niama. Voś tamu i miery nakont hetych pavietranych šaroŭ pavinny być vielmi žorstkija. Vajna jość vajna» — miarkuje litoŭski palityk.
Jakuju škodu režymu Łukašenki nanosić zakryćcio miažy ź Litvoj? Zdajecca, heta bolš zakranie intaresy zvyčajnych biełarusaŭ, jakija nie zmohuć jeździć u Litvu.
Jukniavičenie adkazała: «Mnie škada biełarusaŭ, jakija nie zmohuć patrapić u Litvu. Dumaju, što z 2020 hoda ŭ Biełarusi nie dadałosia ludziej, jakija lubiać Łukašenku. Ale ničoha nie zrobiš. Jak ja skazała, vajna jość vajna. Praz adkrytyja miežy da nas jedzie šmat ahientaŭ, šmat tych, chto ŭjaŭlaje pahrozu dla našaj biaśpieki».
Na dumku byłoj litoŭskaj ministarki abarony, nie tolki Litva, ale i ES, i NATO pavinny razumieć, što znachodziacca ŭ stanie vajny.
«Heta niekanviencyjnaja vajna, jana nie takaja, jak zaraz va Ukrainie. Ale Kreml z dapamohaj Łukašenki testuje nas, jon dziejničaje na miažy 5‑ha artykuła statuta NATO, ale nie pierachodziačy čyrvonaj linii. Ale na ŭzroŭni 4‑ha artykuła statuta NATO my ŭžo znachodzimsia. Treba prymać zachady, kab abaranicca, i nie dapuścić situacyi, kali budzie ŭžo pozna» — skazała deputatka Jeŭraparłamientu, byłaja ministarka abarony Litvy Rasa Jukniavičenie.
- 4‑y artykuł statutu NATO praduhledžvaje kansultacyi čalcoŭ aljansu ŭ vypadku, kali, na dumku adnaho ź ich, jaho terytaryjalnaja cełasnaść, palityčnaja niezaležnaść abo biaśpieka apynulisia pad pahrozaj.
- 5‑y artykuł statutu NATO praduhledžvaje ŭsie mahčymyja miery, u tym liku i vajskovyja, čalcoŭ aljansu ŭ dapamohu tamu ź ich, suprać kaho była ŭčynienaja ahresija.
«Muž syšoŭ ź Sipłym i Małym». Imavierna, pad Kramatorskam ukraincy adnym macham ubajdosili troch biełaruskich najomnikaŭ18
Kamientary
Nu ja zhodzien, što Łukašenka heta tolki proksi Rasii.
Ale ja nie zhodzien, što ŭsia Biełaruś heta Łukašenka.
2020 hod pakazaŭ, što bolšaść biełarusaŭ suprać Łukašenki i Łukašenka dziejničaje NASUPIERAK VOLI biełaruskaha naroda. Supraciŭ biełarusaŭ byŭ zdušany Łukašenkam pry dapamozie Maskvy, pry dapamozie FSB.
I da taho ža, kali ŭsia Biełaruś heta nie suvierennaja dziaržava z žycharami, jakija pad represijami zaraz nie majuć mahčymaści paŭpłyvać na režym (chacia častkova zmahli - nie dali armii, vajskoŭcam uciahnucca ŭ bajavyja dziejańni na terytoryi Ukrainy, na haryzantalnym uzroŭni, praz svajakoŭ, znajomych, adnakłaśnikaŭ daviali vajennym, što ź imi budzie va Ukrainie i jany kołam stali i admovilisia ŭdzielničać u vajnie).
Dyk voś, kali litoŭcy ličać Biełaruś nie dziaržavaj, a proksi Rasiei, to i ja maju prava ličyć Letuvu nie samastojnaj dziaržavaj, a proksi Bierlina, jaki zdaŭna pravodzić palityku pa dałučeńni Biełarusi da Rasiei. Pačynajučy ad Chansa Hieorha-Vika i raniej.
Adsiul i admova raździalać režym i narod, jaki suprać režymu i admova adciahvać režym ad Maskvy.