Iłan Mask zapuściŭ «Hrokipiedyju» — alternatyvu «Vikipiedyi»
Miljarder Iłan Mask zapuściŭ novuju anłajn-encykłapiedyju «Hrokipiedyja» (Grokipedia), raspracavanuju jaho kampanijaj xAI. Mask śćviardžaje, što jana pavinna być lepšaj za «Vikipiedyju», bo jaje meta — «praŭda, tolki praŭda i ničoha, akramia praŭdy».
Na dadzieny momant, jak adznačaje The Verge, u «Hrokipiedyi» dastupna bolš za 800 tysiač anhłamoŭnych artykułaŭ. Pry hetym startavaja staronka vyhladaje jak zvyčajny pošukavy radok, a afarmleńnie artykułaŭ vielmi padobnaje na «Vikipiedyju».
Śćviardžajecca, što fakty dla artykułaŭ praviaraŭ raspracavany xAI čat-bot Grok. Adnak The Verge padkreślivaje, što heta sprečnaja ideja, pakolki ŠI-boty časta byvajuć zaŭvažanyja za «vydumlańniem iłžyvych faktaŭ».
Niahledziačy na toje, što prajekt pavinien być alternatyvaj, častka jaho kantentu, vidavočna, była skapijavana z «Vikipiedyi». Na niekatorych staronkach jość prypiska, što «materyjał adaptavany z «Vikipiedyi».
Žurnalist vydańnia taksama zaŭvažyŭ, što, choć «Vikipiedyja» dazvalaje lubomu redahavać artykuły, u «Hrokipiedyi», vierahodna, heta niemahčyma. Knopka redahavańnia była znojdziena tolki na niekalkich staronkach, ale pry naciskańni na jaje pakazvałasia tolki historyja pravak biez mahčymaści ŭnieści svaje.
Niekatoryja artykuły «Hrokipiedyja» mohuć vyklikać pytańni, piša The Verge. Ideałahičnaje razychodžańnie prajaŭlajecca ŭ artykułach na adčuvalnyja temy. Naprykład, u artykule pra źmianieńnie klimatu «Vikipiedyja» kaža pra «amal adnadušnuju navukovuju zhodu» nakont roli čałavieka ŭ paciapleńni. «Hrokipiedyja» śćviardžaje, što zajavy pra adnadušny kansensus zasnavanyja na vybarčych daśledavańniach, a ŚMI i takija arhanizacyi, jak Greenpeace, «spryjajuć uzmacnieńniu hramadskaj tryvohi» i ŭdzielničajuć u «skaardynavanych namahańniach» pa pradstaŭleńni prablemy jak «ekzistencyjalnaha impieratyvu».
Ciapier čytajuć
Trahiedyja ŭ Barysaŭskaj balnicy: unučka pacyjenta kaža, što na jaho źviarnuli ŭvahu praz šeść hadzin, kali ŭžo piena pajšła z rota — jon pamior18
Kamientary
P.S. U artykule hrokipiedyi "Elon Mask", u adroźnieńnie ad vikipiedyi, ničoha niama pra (Nazi/Roman) "salute controversy" 20.01.2025.