Patryjarch Kirył zvolniŭ kiraŭnika RPC u Zachodniaj Jeŭropie za zachapleńnie pokieram
Mitrapalita Korsunskaha i Zachodniejeŭrapiejskaha Niestara (Jaŭhienija Siracienku) adchilili ad kiravańnia ekzarchatam Zachodniaj Jeŭropy. Rašeńnie pryniaŭ kiraŭnik Ruskaj pravasłaŭnaj carkvy (RPC) patryjarch Kirył, spasłaŭšysia na pačatak carkoŭna-sudovaha razboru ŭ adnosinach da archireja.
Abaviazki Niestara časova pieradali mitrapalitu Razanskamu i Michajłaŭskamu Marku (Siarhieju Hałaŭkovu). Ekzarchat uklučaje ŭ siabie jeparchii ŭ Francyi, Vialikabrytanii, Bielhii, Italii, Irłandyi, Ispanii, Šviejcaryi, Partuhalii, Lichtenštejnie, Luksiemburhu i Manaka.
Pryčyna suda nie raskryvajecca. Adnak «Novaja hazieta Jeŭropa» vyśvietliła, što niezadavolenaść patryjarcha vyklikała zachapleńnie Niestara pokieram. Mitrapalit na praciahu mnohich hadoŭ udzielničaje ŭ mižnarodnych turnirach pa hetaj kartkavaj hulni pad svaim mirskim imiem. Jaho profil jość u najbujniejšaj bazie danych pa žyvym pokiery. Na partale Pokernews apublikavanyja fotazdymki archireja, zroblenyja padčas turniraŭ. Pavodle danych aficyjnaj statystyki The Hendon Mob, sumarny vyjhryš Niestara za hady ŭdziełu ŭ spabornictvach pa pokiery pieravysiŭ $47 tysiač.
Vyšejšy ahulnacarkoŭny sud pavinien acanić hetyja fakty, jak i vykarystańnie śviatarom srodkaŭ RPC dla hetych met. Apostalskija praviły praduhledžvajuć pazbaŭleńnie sana za azartnyja hulni. 50‑ie praviła Łaadykijskaha saboru zabaraniaje klirykam navat naviedvać miescy, dzie pravodziacca takija mierapryjemstvy.
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary