«Užo hod žyli b biez vajny». Łaŭroŭ abvinavaciŭ ZŠA i Jeŭropu ŭ tym, što vajna va Ukrainie zaciahnułasia
Ministr zamiežnych spraŭ Rasii Siarhiej Łaŭroŭ zajaviŭ, što vajna va Ukrainie mahła skončycca jašče hod tamu, kali b ZŠA nie admovilisia ad damoŭlenaściaŭ, nibyta dasiahnutych prezidentami Rasii i ZŠA Uładzimiram Pucinym i Donaldam Trampam na sustrečy ŭ Ankorydžy na Alascy ŭ žniŭni 2025 hoda.
«Kali b amierykancy nie adyšli ad ankorydžskich damoŭlenaściaŭ, kali b Jeŭropa nie adciahnuła ich ad hetych damoŭlenaściaŭ, my b užo hod žyli biez vajny. Heta vidavočny fakt», — skazaŭ Łaŭroŭ padčas kruhłaha stała pa pytańniach Ukrainy.
Pavodle jaho słoŭ, Maskva hatovaja šukać «razumnyja kampramisy» dla ŭrehulavańnia kanfliktu. Pry hetym Rasija, jak zajaviŭ Łaŭroŭ, nie źmianiła svaich asnoŭnych patrabavańniaŭ. Siarod ich jon nazvaŭ harantavańnie biaśpieki Rasii, niedapuščeńnie źjaŭleńnia NATA kala rasijskich miežaŭ, a taksama zabieśpiačeńnie, jak jon vykazaŭsia, zakonnych pravoŭ ruskich i ruskamoŭnych ludziej, jakija stahodździami žyvuć na hetych terytoryjach, i ich «vyzvaleńnie ad pahroz nacyfikacyi».
Łaŭroŭ taksama zajaviŭ, što Rasija nibyta nikoli nie admaŭlałasia ad pieramoŭ z Ukrainaj i hatovaja da novaha raŭnda pieramovaŭ. «Nam jość što skazać», — padkreśliŭ jon.
Raniej Łaŭroŭ raskazvaŭ, što rasijskija ŭłady raźličvali «pa-pacansku» damovicca z Trampam nakont Ukrainy. Pavodle jaho viersii, mienavita z takoj metaj Pucin u žniŭni 2025 hoda pajechaŭ na sustreču z amierykanskim prezidentam u Ankorydž.
Łaŭroŭ śćviardžaŭ, što padčas pieramoŭ rasijski bok «całkam» pryniaŭ prapanovu ZŠA ab zaviaršeńni vajny va Ukrainie. Adnak paśla hetaha, pavodle jaho słoŭ, pradstaŭniki ES i prezident Ukrainy Uładzimir Zialenski «paviśli ŭ Trampa na rukach» i «pachavali» dasiahnutyja damoŭlenaści.
U vyniku pazicyja ZŠA źmianiłasia, a dziaržsakratar Marka Rubia zaklikaŭ šukać «novyja padychody». Pry hetym Łaŭroŭ pryznavaŭ, što paśla sustrečy z Pucinym Tramp nazyvaŭ składanym pytańnie pieradačy ŭsioj terytoryi Danbasa pad kantrol Rasii. Mienavita hetaha Maskva praciahvaje patrabavać.
U pačatku vieraśnia Łaŭroŭ taksama zajaŭlaŭ, što Rasija budzie praciahvać vajnu suprać Ukrainy, pakul Zachad nie pojdzie na sastupki Maskvie. Pavodle jaho słoŭ, u zachodnich krain było šmat mahčymaściaŭ dasiahnuć miru va Ukrainie, ale jany nibyta nieadnarazova pieraškadžali Kijevu zaklučyć adpaviednaje pahadnieńnie. Tamu, jak śćviardžaŭ Łaŭroŭ, Zachadu nie varta «mitusicca» sa svaimi «novymi idejami» nakont Ukrainy.
Ciapier čytajuć
Brat biełaruskaj karalevy pryhažości trapiŭ u reanimacyju ŭ Azierbajdžanie1
Brat biełaruskaj karalevy pryhažości trapiŭ u reanimacyju ŭ Azierbajdžanie
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary
Achviaravać saboj dziela krainy taksama nie zmoža. Jany tam usie patryjoty hrašovych znakaŭ, jakija zarablajucca rabalepnym isnavańniem rasiejcaŭ.