Paśla sustrečy Trampa z aš-Šaraa Siryja abviaściła, što dałučycca da kaalicyi pa baraćbie z «Isłamskaj dziaržavaj»
Zajava ab płanach siryjskich uład była zroblena paśla sustrečy prezidenta Donalda Trampa z prezidentam Siryi Achmiedam aš-Šaraa ŭ Biełym domie
Siryja maje namier dałučycca da mižnarodnaj kaalicyi pa baraćbie z hrupoŭkaj «Isłamskaja dziaržava», paćvierdziŭ vysokapastaŭleny supracoŭnik administracyi prezidenta ZŠA, piša Bi-bi-si.
Zajava ab płanach siryjskich uład była zroblena paśla sustrečy prezidenta Donalda Trampa z prezidentam Siryi Achmiedam aš-Šaraa ŭ Biełym domie, jakaja adbyłasia ŭ paniadziełak.
Siryja stanie 90‑j krainaj, što dałučyłasia da šyrokaj mižnarodnaj kaalicyi pa baraćbie ź ID, meta jakoj — likvidavać astatnija elemienty «Isłamskaj dziaržavy» i spynić prytok zamiežnych bajevikoŭ na Blizki Uschod.
U intervju prahramie Special Report na kanale Fox News aš-Šaraa zajaviŭ, što hety vizit aznamienavaŭ pačatak «novaj ery», u jakoj jaho kraina budzie supracoŭničać z ZŠA. Tramp, u svaju čarhu, vykazaŭ padtrymku aš-Šaraa.
Heta ŭžo treciaja sustreča dvuch lidaraŭ paśla majskaj sustrečy na palach Savieta supracoŭnictva arabskich dziaržaŭ Piersidskaha zaliva i viačery ŭ ramkach siesii Hienieralnaj Asamblei AAN u vieraśni.
Vizit aš-Šaraa ŭ Bieły dom aznačaje mocnaje źmianieńnie ŭsprymańnia i imidžu byłoha džychadzista. Jašče niadaŭna jon uznačalvaŭ hrupoŭku «Chajat Tachryr aš-Šam», jakaja była stvorana na bazie adnaho z adździaleńniaŭ «Al-Kaidy». Hrupoŭka pad kiraŭnictvam aš-Šaraa ŭ kancy minułaha hoda ŭznačaliła nastupleńnie ŭ Siryi, u vyniku jakoha byŭ zrynuty režym Bašara Asada.
«Chajiat Tachryr aš-Šam» ułady ZŠA aficyjna ličyli terarystyčnaj arhanizacyjaj — tolki ŭ lipieni hetaha hoda jana była vyklučana sa śpisu takich arhanizacyj.
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary
i napisać zajavu ab pryjemie na dziaržsłužbu.