Baćki vykrykvajuć hetaje imia, kab spynić isteryki dziaciej — i truk pracuje
Imia možna zamianić i na inšaje, bolš zvykłaje nam.
Niekatoryja amierykanskija baćki vykarystoŭvajuć novuju taktyku, kab spynić isteryki svaich dziaciej.
Baćki vykrykvać imia «Džesika», časam navat robiačy vyhlad, što šukajuć vydumanaha čałavieka, pakul u ich dziciaci adbyvajecca ŭspyška hnievu — i heta pracuje. Šmat takich rolikaŭ možna pabačyć u TikTok.
Čamu heta pracuje? Daktary kažuć, što heta technika, viadomaja jak pieraklučeńnie ŭvahi. Hety padychod dapamahaje pastavić na paŭzu niervovuju sistemu dziciaci ŭ momant mocnych emocyj, tłumačyć USA Today.
«Kali vy raptam kažacie niešta niezvyčajnaje, asabliva spakojnym tonam, heta svajho rodu pieraryvaje madel eskałacyi, jakaja adbyvajecca ŭ ich mozhu», — kaža piedyjatr Mona Amin.
Inšy piedyjatr Łoren Chjuz padkreśliła, jak hety mietad sihnalizuje ab źmienie ŭ mozhu dziciaci.
«U vas adbyvajecca hety raptoŭny zruch, kali vam treba źviarnuć uvahu. Vy niby dumajecie: «O, pačakajcie, jość niechta pa imieni Džesika? Dajcie ja pahladžu vakoł»».
Heta moža pieraklučyć mozh dziciaci sa stanu zasmučeńnia na stan cikaŭnaści.
Niezrazumieła, čamu mienavita imia Džesika vybrali dla trendu, ale daktary kažuć, što luboje imia mahło b spracavać, kali tolki heta niechta, kaho dzicia nie viedaje.
Piedyjatry, adnak, padkreślili, što vykarystańnie stratehii pieraklučeńnia ŭvahi, takoj jak trend z Džesikaj, padychodzić bolš dla małych dziaciej (starejšyja pačnuć zadumvacca: a čamu heta maje baćki kličuć kahości?). Dyj kožny raz pieraklučać tak uvahu nie varta, treba vyrašyć prablemu, jakaja pryviała da isteryki.
Kamientary