Biełaruska ŭciakła ŭ Polšču ŭ 2021-m, u emihracyi pieražyła rak i razvod. Ciapier adna z dvuma maleńkimi dziećmi prosić dapamohi
«Muž akazaŭsia dobrym rabotnikam, ale nijakim baćkam».
Alaksandra źjechała ź Biełarusi ciažarnaj z adnym dziciom na rukach i adnym čamadanam. U Polščy pačała žyćcio z nula, naradziła druhuju dačku, pieražyła ankałohiju, razvod i zaciažnuju baraćbu za alimienty ad byłoho muža.
Siońnia Alaksandra Kruk žyvie ŭ Hdańsku ź dźviuma maleńkimi dočkami. Jana pracuje, sprabuje stać na nohi i adnačasova zmahajecca z depresijaj.
Ciapier Alaksandry patrebnaja dapamoha, kab pakryć vydatki na vymušany pierajezd, novaje žyllo i dać sabie čas adnavicca. Voś jaje historyja.
U Biełarusi ja budavała darohi
«Mianie zavuć Alaksandra. Ja rodam ź Biarozy, što na Brestčynie, ale apošnija hady pierad adjezdam žyła ŭ Minsku.
Pa prafiesii ja inžynier-budaŭnik, vučyłasia ŭ Biełaruskim nacyjanalnym techničnym univiersitecie. Pracavała ŭ darožna-budaŭničaj śfiery — była technołaham na bietonnym zavodzie. My budavali darohi, u tym liku druhuju kalcavuju vakoł Minska i ŭźlotnuju pałasu ŭ aeraporcie.
Pieradapošni samalot
My ŭdzielničali ŭ pratestach u 2020-m, jak i ŭsie. Kali pačalisia represii i zatrymańni, vyrašyli źjazdžać, pačali rychtavacca da hetaha. Ja pradała svaju kvateru ŭ Biarozie, mašynu, jakuju ja nabyła jašče da šlubu, kab u nas była finansavaja paduška biaśpieki na novym miescy.
Ja zaciažaryła druhim dziciom, i pačalisia sumnievy. Moža, pačakać, naradzić u Biełarusi? Muž užo pajechaŭ u Polšču, a ja jašče pavinna była vyrašyć peŭnyja spravy. Ale ŭ mai 2021 hoda ja zrazumieła: čakać bolš nielha. Kali majmu adnahrupniku nočču vybili dźviery i zabrali ŭ izalatar za toje, što jon zaśviaciŭsia na videa z akcyi, stała jasna — pryjduć i pa nas, heta pytańnie času.
Ja sabrałasia litaralna za adzin dzień — tady, kali pasadzili samalot Ryanair z Pratasievičam. My vylecieli ŭ Varšavu na pieradapošnim rejsie. Na nastupny dzień nieba nad Biełaruśsiu zakryłasia.
Ja źjazdžała na piatym miesiacy ciažarnaści, trymajučy za ruku paŭtarahadovuju dačušku. Tak z adnym maleńkim čamadanam i vialikim žyvatom ja apynułasia ŭ Polščy.
Udar, jakoha nie čakała
Pieršyja dva hady ŭ Hdańsku zdavalisia pačatkam novaha žyćcia. My atrymali mižnarodnuju abaronu, ja naradziła druhuju dačku, zajmałasia dziećmi, pobytam, muž pracavaŭ zvarščykam. My žyli jak usie, bieź vialikich płanaŭ, prosta staralisia stać na nohi.
Ale paśla ja zachvareła. Mnie pastavili dyjahnaz: rak šyjki matki. Ja nie mahła dazvolić sabie prosta lažać u balnicy, była na dzionnym stacyjanary. Moj hrafik vyhladaŭ tak: zavieźci dziaciej u sadok, biehčy na kropielnicy i chimijaterapiju, a paśla — znoŭ u sadok, być mamaj, hatavać, hulać. Niezaležna ad taho, nakolki mnie było kiepska. Siońnia heta projdzieny etap, ja ŭ remisii, ale hetaja pieramoha dałasia mnie darahoj canoj.
Ja ŭsim raju rabić pryščepku ad VPČ — virusa papiłomy čałavieka. U Polščy heta ŭžo zvyčajnaja praktyka, i vielmi chaciełasia b, kab mamy taksama dumali pra heta dla svaich dačok. Hetaja vakcyna isnuje, jana sapraŭdy pracuje, i heta realny šaniec papiaredzić taki vid raku.
Adzinota ŭtroch
Emihracyja i chvaroba stali testam dla našaj siamji, jaki my nie prajšli. Padčas chvaroby pačalisia finansavyja prablemy, a potym — razvod.
Heta doŭhi i vielmi ciažki praces. Apošni hod, jak my žyli razam z mužam, byŭ, ščyra kažučy, piekłam. U jaho svajo bačańnie situacyi. Toje, što ja chvareła, dla jaho nibyta nie maje značeńnia, byccam hetaha i nie było. Toje, što my pryjechali zusim z maleńkimi dziećmi, jon taksama nie ŭličvaje. Časta ž byvaje tak: spačatku mužčyna kaža «siadzi doma, nie pracuj», a kali nadychodzić składany momant, raptam hučyć inšaje pytańnie: «Čamu ty nie pracuješ?».
Kali muž źjechaŭ, ja adčuła palohku. Ale razam z hetym pryjšło inšaje razumieńnie: ja zastajusia zusim adna, biez hrošaj i pracy.
Ciapier ja žyvu ŭ Hdańsku z dvuma małymi — im 6 i 4 hady. U mianie niama tut rodnych i blizkich siabroŭ. Jość znajomyja, ale heta nie taja dapamoha, na jakuju možna abapiercisia štodnia.
Ja rabiła ŭsio, kab vyžyć i kab heta jak maha mienš zakranuła dziaciej. Niejki čas atrymlivałasia, ale canoj svajho zdaroŭja. U vyniku — depresija, antydepresanty i stan, u jakim prosta ciažka funkcyjanavać.
Muž akazaŭsia dobrym rabotnikam, ale nijakim baćkam. Za apošni hod jon bačyŭ dačok usiaho čatyry razy, choć žyvie za dziesiać chvilin jazdy. Hrošaj na dziaciej ja amal nie baču. Ale ja chaču, kab jon vykonvaŭ svaje abaviazacielstvy ŭ adnosinach da dziaciej.
Ja padała ŭ sud na alimienty, ale mianie papiaredzili, što adbudziecca jon niachutka. U polskaj sistemie jość mahčymaść atrymać vypłaty jašče da suda, tak zvanaje zabieśpiačeńnie. Mnie skazali, što heta zojmie miesiac. Ja padała zajavu ŭ červieni minułaha hoda. Rašeńnie pryniali tolki ŭ kancy kastryčnika. Potym list z suda mnie prosta nie dastavili — paštaljon viarnuŭ jaho nazad. Ja čakała, telefanavała, chadziła ŭ instancyi, i ŭ vyniku atrymała hety dakumient tolki praz try miesiacy, u kancy studzienia.
Adrazu ž źviarnułasia da sudovaha vykanaŭcy, kab spahnać hrošy z byłoha muža. Ale, na žal, da hetaha času ja atrymała tolki adnu vypłatu — 595 złotych (kala 470 rubloŭ — NN). Heta kropla ŭ mory, kali ŭ ciabie arenda, sadok i dvoje dziaciej, jakich treba apranać i karmić.
Z usim ja raźbirałasia sama: šukała infarmacyju, vyvučała polskuju sudovuju sistemu. Pasłuhi advakata kaštujuć tut vielmi doraha, ja nie mahu sabie takoje dazvolić.
Miaža tryvałaści
Ja inžynier pa adukacyi, ale ŭ Polščy nie pracavała pa śpiecyjalnaści: ja pryjechała ciažarnaja z maleńkim dziciom, potym zachvareła, potym razvod. U vyniku ja asvoiła novuju prafiesiju — SMM. Dziakujučy znajomym navučyłasia mantavać videa i budavać stratehii, pracavać z markietynham. Heta dapamahło mnie vyžyć, bo ja mahu pracavać z domu. Ale hetaha pakul niedastatkova, kab poŭnaściu zabiaśpiečyć siabie i dziaciej.
Zaraz ja sprabuju nastryfikavać dypłom inžyniera, kab viarnucca ŭ prafiesiju. Šukaju pracu, ale ŭsio ŭpirajecca ŭ hrafik i ŭ toje, što dziaciej niama z kim pakinuć. A jašče — u moj psichałahičny stan. Za hety hod ja prosta vyhareła. Arhanizm daŭ zboj. Chimijaterapija i pastajanny stres vylilisia ŭ ciažki tryvožna-depresiŭny stan. Mnie kažuć: «Treba ŭ špital», a ja adkazvaju: «Nie mahu, mnie niama na kaho pakinuć dziaciej».
U Polščy ŭ mianie niama svajakoŭ. Jość siastra, jana žyvie ŭ Anhlii. U jaje svaja siamja, svaje dzieci, jana nie moža pryjechać, ale ŭvieś hety čas vielmi mianie padtrymlivaje finansava. Pa sutnaści, jana trymaje na sabie adrazu niekalki siemjaŭ: svaju i nas ź dziećmi. I kali b nie jana, nam było b značna ciažej, my mahli b prosta zastacca bieź ničoha.
Krok u nieviadomaść
Ciapier ja staju pierad novym vyklikam. Haspadynia kvatery, dzie my žyli piać hadoŭ, prosić vysielicca — u jaje svaje płany. Mnie treba terminova znajści novaje žyllo, a ŭ Polščy heta vielizarnyja hrošy: kaucyja (zakład), apłata za pieršy miesiac. Plus mnie treba zakryć daŭhi za ciapierašniuju kvateru. Tolki pierajezd paciahnie na 8000 złotych (6300 rubloŭ — NN), jakich u mianie prosta niama.
Ja nie lublu prasić dapamohi. Heta vielmi niaprostaje rašeńnie — raskazvać pra siabie takija rečy. Ale ŭ mianie jość dzieci. I kali ja nie mahu niešta zrabić sama, ja pavinna pierastupić praź siabie.
Ja nie chaču ničoha lišniaha. Ja chaču prosta pierazahruzicca: pieravieźci dziaciej u novaje miesca, padlačyć niervy i pajści pracavać. Mnie patrebna krychu času i resursu, kab pryjści ŭ siabie i znoŭ stać toj mamaj, jakaja moža narmalna žyć i zabiaśpiečvać svaich dziaciej. Maje dočki Jarasłava i Uładzisłava — maja adzinaja matyvacyja nie zdavacca.
Ja ŭžo vielmi ŭdziačnaja biełarusam. Ciaham apošniaha hoda mianie nie pakinuli ŭ składanaj situacyi. Ludzi padtrymlivali, prapanoŭvali navat zabrać dziaciej na čas, kab ja mahła lačycca. Heta nievierahodna kranalna.
Ja vieru, što zmahu dać rady. Dziakuj kožnamu biełarusu, chto nie prajšoŭ mima. Vaša padtrymka — heta toje, što nie daje mnie ŭpaści.
Jak dapamahčy
Kali ŭ vas jość mahčymaść padtrymać, navat nievialikaja suma maje značeńnie.
Blik: +48 791 547 275
Aliaksandra Kruk
Revolut: LT60 3250 0370 8648 5162
Aliaksandra Kruk
PayPal: [email protected]
Kamientary