Alaksandr Łukašenka časta asudžaje biełarusaŭ, jakaja pasyłajuć dziaciej za miažu. Pry hetym Nastaśsia, dačka siaredniaha syna Łukašenki, Dźmitryja, pastupiła ŭ mahistraturu ŭ Maskvie, a Darja, druhaja, — tamsama ŭ «Prajekcie MAX». Voś što jašče viadoma.
Nastaśsi Łukašenka ciapier 22 hady.
Jana zabrała dakumienty ź Liceja BDU na fonie pratestaŭ 2020 hoda, kali była ŭ 11 kłasie.
Nastaśsia davučvałasia ŭ pryvatnaj Minskaj mižnarodnaj himnazii ŭ Drazdach, jakuju źviazvajuć ź Irynaj Abielskaj. Dalej było pastupleńnie ŭ prestyžny maskoŭski ŭniviersitet.
U 2025 Nastaśsia Łukašenka vypuściłasia ź jurydyčnaha fakulteta Maskoŭskaha dziaržaŭnaha ŭniviersiteta, dzie vučyłasia na kafiedry kanstytucyjnaha i municypalnaha prava. Temaj jaje dypłomnaj pracy stała «Kanstytucyjna-pravavy status zamiežnych hramadzian i asob biez hramadzianstva ŭ Rasijskaj Fiederacyi».
Unučka Łukašenki praciahvaje vučycca. Jaje ŭžo zaličyli na pieršy kurs mahistratury jurfaka MDU ŭ hrupu II-11.
Akramia vučoby, Nasta ŭdzielničaje ŭ navukovych spabornictvach. U 2025 hodzie jana stała pryzioram zaklučnaha tura ŭniviersijady «Łamanosaŭ» pa praktyčnaj jurysprudencyi. U siekcyi «Intelektualnyja pravy, štučny intelekt i ličbavyja technałohii» jana nabrała 90 bałaŭ — heta adzin z samych vysokich vynikaŭ siarod udzielnikaŭ.
Małodšaj siastry Nastaśsi, Darji Łukašenka, niadaŭna spoŭniŭsia 21 hod. Jana taksama ŭ 2020‑m zabrała dakumienty ź Liceja BDU i taksama pierajšła ŭ «siamiejnuju» Minskuju mižnarodnuju himnaziju. Ciapier Darja vučycca na ekanamičnym fakultecie Maskoŭskaha dziaržaŭnaha ŭniviersiteta na kafiedry kiravańnia arhanizacyjami i płanuje atrymać dypłom u 2026 hodzie.
Dziaŭčyna spałučaje vučobu z pracaj u vučebna-navukovaj łabaratoryi «Prajekt MACH». Jana stvoranaja dla palapšeńnia viedaŭ studentaŭ-mieniedžaraŭ. Łabaratoryja pazicyjanuje siabie jak elitny karjerny lift dla studentaŭ kirunku «Mieniedžmient». Studentaŭ tam vučać praz rašeńnie zadač ad bujnych karparacyj.
U sakaviku 2025 hoda Darja stała pieramožcaj mižnarodnaj univiersijady «Pryniaćcie biznes-rašeńniaŭ u mižnarodnym asiarodździ» (International Business Case Competition), arhanizavanaj bujnoj kampanijaj AB InBev Efes.
Taksama Darja adznačyłasia na navukovaj kanfierencyi «Łamanosaŭ-2025», dzie jaje dakład «Raźvićcio pohladaŭ na prajektny mieniedžmient u druhoj pałovie XX stahodździa» zaniaŭ treciaje miesca ŭ siekcyi «Ekanomika».
Siostry pieryjadyčna śvieciacca na roznych imprezach, asabliva — na kanikułach. Naprykład, u lipieni 2024 Darja razam ź siamjoj chadziła na prezientacyju alboma Viktoryi Aleški. Była tam i Nastaśsia, jakaja ŭ toj hod vałancioryła na «Słavianskim bazary», ale fatahrafacca z Aleškaj i siamjoj nie stała.
U śniežni 2024‑ha Darja razam z baćkami razdavała kaladnyja padarunki dzieciam u sacyjalna-piedahahičnym centry ŭ Ašmianach. Nastaśsi nie było.
A 4 studzienia 2025 hoda Nastaśsia i Darja byli na pieršym kancercie ŭnutry adnoj z šachtaŭ Salihorska. Jany siadzieli ŭ adnym ź pieršych šerahaŭ, ale nie śviacilisia.
Unučki Łukašenki žyvuć i vučacca za miežami krainy. Padobna, što byvajuć doma jany čaściej na kanikułach.
«Naša Niva» — bastyjon biełaruščyny
PADTRYMAĆ
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec31
Pieraściarohi pierad «novymi Žytkavičami». Kijeŭ darma bačyć pahrozu ŭ budaŭnictvie mastoŭ cieraz Prypiać i Muchaviec
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1818
Kamientary
Im dzied daŭ mahčymaści , jakich pazbavili tiasiačy inšych, napeŭna zdatniejnych.
Jany u hetym nie vinavaty.
Pośpiechaŭ i sił stać Ludźmi.