23‑hadovaha ŭkrainca zatrymali ŭ Varšavie z hłušyłkaj — jon źviarnuŭ na siabie ŭvahu tym, što hadzinami prasiedžvaŭ u kaviarni ŭ aeraporcie
Małady čałaviek hadzinami siadzieŭ za stałom, zamaŭlaŭ kavu, zakuski, raskładaŭ noŭtbuk.
23‑hadovaha ŭkrainca Illu S. zatrymali ŭ varšaŭskim aeraporcie Šapena 26 śniežnia. Mužčyna mieŭ pry sabie hłušyłku radyjochvalaŭ, jakaja pracuje ŭ dyjapazonach častot, zareziervavanych dla avijacyjnaj suviazi i navihacyi, paviedamlaje Rzeczpospolita.
Padazreńni słužbaŭ achovy aeraporta vyklikali pavodziny maładoha čałavieka. Jon raźmiaściŭsia ŭ adnym z kafe ŭ zale aeraporta — i hadzinami siadzieŭ za stałom, zamaŭlaŭ kavu, zakuski, raskładaŭ noŭtbuk. U dzień zatrymańnia jon znachodziŭsia z razkładzienym abstalavańniem kala šaści hadzin.
Paśla zatrymańnia Illa S. nie zmoh racyjanalna patłumačyć, što jon rabiŭ u aeraporcie i ź jakoj metaj mieŭ pry sabie hłušyłku. «To jon śćviardžaŭ, što źjaŭlajecca sałdatam, to adrazu paśla hetaha kazaŭ, što jon biznesmien. Jon taksama nie rastłumačyŭ, što rabiŭ u Polščy, kali i navošta siudy pryjechaŭ», — paviedamlajuć krynicy Rzeczpospolita.
«Padazravanamu 23 hady, jon zajaŭlaje, što stała žyvie ŭ Kanadzie», — kaža prakuror Piotr Skiba, pres-sakratar akruhovaj prakuratury ŭ Varšavie. Jon dadaŭ, što padazravany nie pryznaŭ vinu i daŭ supiarečlivyja pakazańni.
Illu S. vystavili abvinavačvańnie ŭ sprobie dziejańniaŭ, jakija «stvarajuć pahrozu biaśpiecy avijaruchu». Mužčynu časova aryštavali na miesiac. Rasśledavańnie viadzie prakuratura rajona Varšava-Achota.
«Kali niechta choča vypić kavy, jon nie jedzie ŭ aeraport, kab siadzieć tam hadzinami, a idzie ŭ Stary horad ci ŭ kandytarskuju «Blikle». Pavodziny padazravanaha patrabujuć detalovaha vyvučeńnia», — padkreślivaje prakuror Piotr Skiba.
Kamientary