Čaćviora zahinułych ad pieradazirovak — narkadyleru prysudzili 24 hady, jaho žoncy amal stolki ž
Sud Minskaha rajona vynies žorstki prysud za niezakonnaje abaračeńnie narkatyčnych srodkaŭ, u vyniku jakoha zahinuli čatyry čałavieki. Na łavie padsudnych apynulisia šeść čałaviek, uklučajučy siamiejnuju paru minčukoŭ, jakija vykonvali rolu kurjeraŭ-zakładčykaŭ.
Pavodle prakuratury, 43‑hadovaja žančyna i jaje 48‑hadovy muž ź lipienia 2023 hoda pracavali na dźvie internet-kramy pa prodažy psichatropaŭ. Padčas zatrymańnia i pieratrusaŭ u ich było kanfiskavana kala 1,8 kh niebiaśpiečnych rečyvaŭ, siarod jakich miefiedron, hašyš, mietadon i alfa-PVP.
Ad mietadonu, jaki jany raspaŭsiudžvali, pamierli čatyry čałavieki.
Ahulny złačynny dachod pary pieravysiŭ 262 tysiačy rubloŭ.
Sud pryznačyŭ surovyja terminy. Žančynie — 23 hady i 6 miesiacaŭ pazbaŭleńnia voli, jaje mužu 24 hady i 1 miesiac pazbaŭleńnia voli (z ulikam artykuła za kiravańnie ŭ stanie apjanieńnia). Taksama jany atrymali štrafy pa 29,4 tys. rubloŭ (700 bazavych adzinak) z kožnaha, a taksama spahnańnie ŭsiaho złačynnaha dachodu ŭ skarbnicu dziaržavy.
Jašče čatyry fihuranty spravy — žychary Minska i vobłaści — byli asudžanyja pavodle č. 1 art. 328 KK (nabyćcio i zachavańnie biez mety zbytu). Jany karystalisia pasłuhami toj samaj kramy i zabirali «zakładki», zroblenyja sužencami. Dvoje ź ich atrymali realnyja terminy źniavoleńnia (2,5 i 4 hady), jašče dvoje — pa 3 hady «chatniaj chimii».
Kamientary
Vy tam razam ź biełaruskimi musarami albo majtki nadzieńcie, albo kryžyk zdymicie.