Były deputat Viarchoŭnaj Rady Aleh Caroŭ, jakoha zavočna asudziła i šukaje Ukraina, naviedaŭ Biełaruś
«Adčuŭ estetyčny šok».
Były deputat Viarchoŭnaj Rady Aleh Caroŭ, jaki pierajšoŭ na bok Rasii i adšukvajecca Ukrainaj, naviedaŭ Biełaruś, zaŭvažyŭ «Pozirk».
Miarkujučy pa fotazdymkach i paviedamleńniach Carova ŭ sacsietkach, uviečary 20 śniežnia jon vyjechaŭ ciahnikom Maskva — Minsk i ŭviečary 23 śniežnia vylecieŭ nazad rejsam «Biełavija». Mahčyma, žyŭ u piacizorkavym «Prezident-hateli»: dvojčy zavočna asudžany ŭkrainskim sudom palityk sfatahrafavaŭsia z aficyjantkaj hetaj haścinicy.
«Adčuŭ estetyčny šok. Jedu ŭ savieckim kupe, dzie ŭsio novaje i ŭsio pracuje. Čatyry knopki rehulavańnia jarkaści śviatła. Pracuje vientylacyja, ryčah pieraklučeńnia nie adłamany i sapraŭdy rehuluje patok pavietra — pravieryŭ. Radyjo, razietka, indykacyja zaniataści tualeta», — apisaŭ Caroŭ svaje ŭražańni ad pajezdki na ciahniku.
«Darečy, u Biełarusi (u ruskamoŭnym aryhinale «v Biełoruśsii». — «Pozirk».) spakojna hruzicca YouTube, prymajucca zvanki pa What's App i Telegram. Hruziacca naŭprost sajty zamiežnych ŚMI. Na fonie abmiežavańniaŭ va ŭsim śviecie prosta aazis demakratyi», — padzialiŭsia radaściu kałabarant, jaki žyvie, pavodle źviestak ukrainskich ŚMI, pieravažna ŭ anieksavanym Rasijaj Krymie. Ułady RF abmiažoŭvajuć albo błakujuć dostup da tych ci inšych miesiendžaraŭ u ramkach baraćby ź inšadumstvam i ŭkrainskimi dronami. Pry hetym Caroŭ nie zhadaŭ, što biełaruskija ŭłady taksama błakujuć dostup da niepažadanaha dla ich kantentu.
Caroŭ nie paviedamiŭ, ci pravodziŭ u Biełarusi jakija-niebudź sustrečy.
Viasnoj 2022 hoda jon byŭ zavočna pryhavorany ŭkrainskim sudom da 12 hadoŭ pazbaŭleńnia voli pa abvinavačańni ŭ publičnych zaklikach da źmieny dziaržaŭnaj miažy Ukrainy i hvałtoŭnaj źmieny kanstytucyjnaha ładu.
Uvosień 2024 hoda były deputat VR zavočna atrymaŭ 8 hadoŭ pazbaŭleńnia voli pavodle abvinavačańnia ŭ finansavańni ŭzbrojenaj ahresii Rasii suprać Ukrainy. U dachod dziaržavy kanfiskavana jaho majomaść bolš čym na 460 młn hryvień (kala 11 młn dalaraŭ). Pry hetym asnoŭnaja častka majomaści znachodzicca ŭ anieksavanym Rasijaj Krymie (sanatoryj i muziej, acenienyja ŭ 456 młn hryvień) i de-fakta pakul nie moža być kanfiskavanaja.
U kastryčniku 2023 hoda ŭ Krymie na Carova byŭ ździejśnieny zamach.
Kamientary
rasieja nie vieś śviet, ale aležyku ab hetym zabyli skazać