Tarhi za pusty łahier pad Minskam išli 8 hadzin. Kamu i za kolki pradali
Učora z aŭkcyjonu znoŭ pradavali łahier «Kiraviec» pad Minskam. U kastryčniku zakinuty abjekt za miljon dołaraŭ ledź nie nabyła kampanija pa vytvorčaści mebli, ale paźniej pakupnik pieradumaŭ. Hetym razam tarhi za dziciačy «sanatoryj» na Minskim mory išli 8 hadzin, a za łahier zmahalisia adrazu 12 udzielnikaŭ, piša Realt.
Były łahier «Kiraviec» znachodzicca ŭ lasnym masivie pobač ź vioskaj Zialonaje Ždanovickaha sielsavieta. Adlehłaść ad MKAD — kala 10 kiłamietraŭ. Da plažaŭ Minskaha mora — kala 2 kiłamietraŭ.
Pabudavali hety dziciačy łahier jašče ŭ 1960‑ch hadach. Raniej ustanova naležała Minskamu stankabudaŭničamu zavodu imia Kirava, i tut paśpieła adpačyć nie adno pakaleńnie minčan. Łahier ź pijanierami na ŭjeździe funkcyjanavaŭ da pačatku 2000-ch, a zatym byŭ pastupova zaniadbany.
Zaraz na terytoryi ŭ 6,5 hiektara raźmiaščajecca bolš za dziasiatak raznastajnych pabudoŭ. U asnoŭnym heta žyłyja karpusy (draŭlanyja domiki), a taksama roznyja haspadarčyja budynki (miedpunkt, łaźnia, biblijateka) u toj ci inšaj stupieni zachavanaści. Za apošnija hady abjekt nie raz pierachodziŭ z ruk u ruki, ale tak i nie dačakaŭsia rekanstrukcyi.
U vyniku pusty łahier vyrašyli adpravić na aŭkcyjon. Abjekt ahulnaj płoščaj kala 1200 kvadrataŭ vystavili na elektronnyja tarhi za 44 tysiačy rubloŭ (kala 15 tysiač dołaraŭ). Čarhovy aŭkcyjon prajšoŭ učora (24 śniežnia) i praciahnuŭsia cełych 8 hadzin. Za hety čas pačatkovy košt dziciačaha łahiera vyras amal u 60 razoŭ.
U elektronnych tarhach udzielničała 12 pakupnikoŭ, jakija padniali košt abjekta da 2,6 miljona rubloŭ (kala 900 tysiač dołaraŭ).
Pieramožcam aŭkcyjonu i novym ułaśnikam zakinutaha łahiera stała jurydyčnaja asoba, jakaja zajmajecca roźničnym handlem charčovymi praduktami.
Novy ŭłaśnik abaviazany zabiaśpiečyć biaśpieku i abmiežavańnie dostupu na abjekt, padtrymlivać naležny sanitarna-techničny stan terytoryi, pravieści rekanstrukcyju abo źnieści staryja pabudovy, uvieści novy abjekt u ekspłuatacyju i vykarystoŭvać jaho pa pryznačeńni, vyznačanym vykankamam Minskaha rajona. Razam z budynkami novamu ŭładalniku dastaŭsia ŭčastak u 7 hiektaraŭ.
Ciapier čytajuć
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata1313
Ivan Prus raskazaŭ, jak nažyŭsia na $200, pasialiŭšy kinazorku ŭ zaniadbanaj kvatery kala śmietnika ŭ Šabanach, abstaŭlenaj rečami ź jaho internata13
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 202633
Kamientary