Čaromuškinski rajonny sud Maskvy vynies zavočny prysud vydaŭcy rasijskaha interniet-partała «Mieduza» Halinie Cimčanka pa abvinavačańni ŭ arhanizacyi dziejnaści «niepažadanaj» arhanizacyi (častka 3 artykuła 284.1 Kryminalnaha kodeksa).
Sudździa Iryna Kuzan pryznačyła Cimčanka piać hadoŭ papraŭčaj kałonii ahulnaha režymu, a taksama zabaraniła joj na praciahu piaci hadoŭ zajmać kiraŭničyja pasady. Taki ž termin dla vydaŭcy «Mieduzy» zapytvała prakuratura Maskvy (maksimalnaje pakarańnie pavodle artykuła — šeść hadoŭ pazbaŭleńnia voli), piša «Mieduza».
Hienieralnaja prakuratura RF abviaściła «Mieduzu» «niepažadanaj» arhanizacyjaj u studzieni 2023 hoda, matyvujučy heta tym, što dziejnaść vydańnia «stvaraje pahrozu asnovam kanstytucyjnaha ładu i biaśpiecy RF». U červieni 2024 hoda Cimčanka aštrafavali na 14 tysiač rasijskich rubloŭ (140 dalaraŭ) pavodle administracyjnaha pratakoła za ŭdzieł u dziejnaści «niepažadanaj» arhanizacyi. U žniŭni 2024 hoda Miniust abviaściŭ vydaŭcu «Mieduzy» «zamiežnym ahientam».
Kryminalnuju spravu suprać Cimčanka zaviali ŭ mai 2025 hoda. Nieŭzabavie jaje abviaścili ŭ vyšuk i zavočna aryštavali. U abvinavaŭčym zaklučeńni śćviardžałasia, što Cimčanka stvaryła «Mieduzu», «adčuvajučy nianaviść i pahardu da dziaržaŭnaha ŭładkavańnia krainy, unutranaj i źniešniaj palityki dziejučaj ułady». A paśla abviaščeńnia «Mieduzy» «niepažadanaj» arhanizacyjaj u Cimčanka «ŭźnik namier» praciahvać dziejnaść vydańnia, kab zastacca «ŭ infarmacyjnaj prastory krainy».
Farmalnaj padstavaj dla kryminalnaha pieraśledu stali try videa z udziełam Cimčanka: intervju Deutsche Welle, u jakim jana «vykazvaje svaju niazhodu, padviarhaje krytycy dziaržaŭnaje ŭładkavańnie Rasii», intervju TV2media i zvarot da čytačoŭ «Mieduzy», u jakim jana «prosić ab dapamozie, u tym liku finansavaj».
Jak adznačała «Miedyjazona», padčas sudovaha pracesu vystupili dvoje śviedkaŭ abvinavačańnia, jakija dali identyčnyja pakazańni. Pry hetym jany śćviardžali, što stać śviedkami im prapanavaŭ palicejski na vulicy. Advakatka Volha Padaplełava padčas sprečak zapatrabavała apraŭdać vydaŭca «Mieduzy», nazvaŭšy kryminalny pieraśled Cimčanka palityčna matyvavanym — i parušeńniem jaje kanstytucyjnaha prava na svabodu słova.
Voś što zajaviła Halina Cimčanka «Mieduzie» paśla ahałošvańnia prysudu:
«Dziŭna, ale ja ničoha asablivaha nie adčuvaju. Chiba što padumała: dziŭna, što ŭ abvinavaŭčym zaklučeńni napisana praŭda — dla režymu, jaki chłusić jak dychaje. Ja sapraŭdy adčuvaju nianaviść i pahardu da tych, chto pieratvaryŭ žyćci miljonaŭ ludziej u piekła, chto kožny dzień pasyłaje im śmierć. A što da samoha prysudu, to ŭsio jak u viadomaj frazie: jon nie varty i papiery, na jakoj napisany».
Kamientary