Kaalicyja, jakuju ŭznačalvaje Saudaŭskaja Aravija i jakaja padtrymlivaje mižnarodna pryznany ŭrad Jemiena, 30 śniežnia naniesła avijaŭdar pa porcie ŭ horadzie El-Mukała. Pavodle infarmacyi saudaŭskaha ahienctva SPA, udar byŭ naniesieny z-za pastavak uzbrajeńnia, jakija nibyta pastupali tudy z Abjadnanych Arabskich Emirataŭ biez uzhadnieńnia z kaalicyjaj. Pavodle aficyjnych źviestak, paciarpiełych niama.
Pradstaŭnik kaalicyi zajaviŭ, što dva sudny z AAE prybyli ŭ port naprykancy śniežnia, adklučyli sistemy sačeńnia i vyhruzili vialikuju kolkaść zbroi i vajskovaj techniki. Takija dziejańni, na dumku Saudaŭskaj Aravii, parušajuć rezalucyju Rady Biaśpieki AAN i pahražajuć biaśpiecy rehijona. Paśla nazirańnia za hruzam avijacyja kaalicyi naniesła «abmiežavany» ŭdar pa ŭzbrajeńni.
Jak śćviardžajecca, pastaŭki byli pryznačanyja dla padtrymki Paŭdniovaj pierachodnaj rady — sieparatysckaj siły, jakaja dziejničaje na poŭdni i paŭdniovym uschodzie Jemiena i karystajecca padtrymkaj AAE.
Rašeńnie ab apieracyi było pryniata paśla prośby kiraŭnictva Jemiena ab abaronie mirnaha nasielnictva. Saudaŭskaja Aravija zajaviła, što i nadalej budzie pieraškadžać luboj niaŭzhodnienaj vajskovaj padtrymcy hetaj struktury.
ŚMI adznačajuć, što avijaŭdary pahłybili napružanaść pamiž Saudaŭskaj Aravijaj i AAE, jakija raniej vystupali sajuźnikami ŭ jemienskim kanflikcie. Ułady Jemiena ŭviali nadzvyčajnaje stanovišča na 90 dzion, abvinavacili «miaciežnyja siły» ŭ sprobach padziełu krainy i skasavali pahadnieńnie ab vajskovym supracoŭnictvie z AAE.
Hramadzianskaja vajna ŭ Jemienie praciahvajecca z 2014 hoda, kali chusity zachapili stalicu krainy Sanu. Z taho času ŭ krainie sfarmavałasia niekalki centraŭ ułady: chusity, mižnarodna pryznany ŭrad i Paŭdniovaja pierachodnaja rada, jaki vystupaje za niezaležnaść Paŭdniovaha Jemiena. Niahledziačy na raniejšyja damoŭlenaści i ŭklučeńnie pradstaŭnikoŭ Poŭdnia ŭ orhany ŭłady, naprykancy hoda ich uzbrojenaja aktyŭnaść znoŭ uzrasła.
Kamientary