Niaŭžo krasoŭki pierastanuć być nastolki papularnymi? Dyskusiju vakoł hetaha pytańnia vyklikała spravazdača analitykaŭ Bank of America.
Na minułym tydni jany ŭskałychnuli śviet abutku svaim 61‑staronkavym analizam, u jakim pryjšli da vysnovy, što pierśpiektyvy rostu spartyŭnych brendaŭ krasovak imkliva paharšajucca, paviedamlaje Bloomberg.
U spravazdačy śćviardžajuć, što siektar spartyŭnych tavaraŭ pieražyvaŭ 20‑hadovy «cykł uzdymu» — krasoŭki stali zajmać pałovu suśvietnych prodažaŭ abutku (raniej była čverć). Trend dasiahnuŭ piku padčas pandemii karanavirusa, kali miljony ludziej pačali pracavać doma. «Pakolki hety strukturny zruch u asnoŭnym zaviaršyŭsia, pierśpiektyvy budučaha rostu dachodaŭ ciapier značna skaracilisia», — adznačyli analityki.
Ale ich vysnovy vyklikali šmat piarečańniaŭ.
Pavodle źviestak analityka Bet Hołdstajn ź Ńju-Jorka, ciapier krasoŭki składajuć kala 60% prodažaŭ abutku ŭ ZŠA. Spartyŭny abutak zavajavaŭ papularnaść jak častka bolš šyrokaha hramadskaha imknieńnia da kamfortu i zdarovaha ładu žyćcia — pryjarytetaŭ, jakija naŭrad ci źniknuć u bližejšy čas. Analityk dadała, što katehoryja krasovak u ZŠA vyrasła na 4% za minuły hod (pa listapad), u toj čas jak katehoryja modnaha abutku skaraciłasia na 3%.
Tym nie mienš, vytvorcy krasovak sutyknulisia ź ciažkaściami paśla pandemii: časam jany nie paśpiavali za źmienlivymi hustami pakupnikoŭ, nazirali astudžeńnie prodažaŭ (asabliva ŭ Kitai) i sutyknulisia z pahrozaj amierykanskich pošlin.
Jość prykmiety taho, što krasoŭki pranikajuć navat u katehoryju kłasičnaha abutku. U 2025 hodzie samaj papularnaj madellu łofieraŭ na płatformie pieraprodažu StockX stali New Balance 1906L, jakija vyhladajuć jak hibryd makasinaŭ i marafonskich krosavak. Taksama ciapier časta možna ŭbačyć kinazorak i iflujensieraŭ u darahich viersijach spartyŭnaha abutku, stvoranych časta ŭ kałabaracyi ź luksavymi brendami nakštałt Gucci abo Moncler.
Analityki Bank of America nie śćviardžajuć, što ludzi voś-voś vykinuć svaje krasoŭki i piarojduć na łakavanyja oksfardy. Chutčej jany źviartajuć uvahu na toje, što spartyŭnyja tavary — paśla bumu ŭ pandemiju — ź siaredziny 2023 hoda rastuć pavolniej, čym u siarednim za apošnija dva dziesiacihodździ.
Kamientary
Jak jana priejet, kali joj niama ŭ čym preć?
Kupicie firmovyja krasoŭki i radasna zabudzieciesia pra skurany abutak.