«Vybiahała z padjezda ŭ pižamie i z hadavałaj małoj u pledzie». Paciarpiełaja padčas vybuchu ŭ homielskim domie raskazała, jak heta było
Vybuch bytavoha hazu ŭ domie na vulicy Kosarava, 3 u Homieli, jaki adbyŭsia 17 śniežnia, pakinuŭ dziasiatki ludziej biez žylla. Pierakryćci z 6‑ha da 9‑ha pavierchu abrynulisia, žychary da hetaha času nie mohuć viarnucca ŭ svaje kvatery i žyvuć u hatelach abo ŭ svajakoŭ. Vydańnie «Mocnyja naviny» pahutaryła ź Lidzijaj — žycharkaj piataha paviercha.
Kvatera Lidzii acaleła častkova: u stoli ŭtvaryłasia dzirka. Mienavita na pavierch vyšej, pa słovach žančyny, zahinuła susiedka.
U momant vybuchu Lidzija znachodziłasia doma z hadavałaj dačkoj. Ad udarnaj chvali dzicia padkinuła, samu žančynu adkinuła z kanapy. Muž byŭ u kamandziroŭcy, starejšaja dačka — u dziciačym sadku.
Praz akno Lidzija ŭbačyła, jak lacić škło, i zrazumieła, što adbyłosia nadzvyčajnaje zdareńnie. Jana schapiła małuju, zachinuła jaje ŭ pled, uziała vazok i vybiehła z chaty — u pižamnych štanach i šłapakach. Lift nie pracavaŭ, spuścicca ź piataha paviercha dapamahła susiedka.
Pa darozie Lidzija paśpieła patelefanavać u chutkuju. Słužby MNS prybyli chutka.
Užo na leśvicy joj kryknuli, što pierakryćci pravalilisia z vośmaha na siomy pavierch.
U kvatery zastaŭsia papuhaj Anatol. Na nastupny dzień, kali dazvolili zajści, ptušku ŭdałosia zabrać — jana vyžyła. Paźniej siamji dazvolili vynieści dakumienty, častku rečaŭ i techniku, zatym — leki i ladoŭniu z dapamohaj ratavalnikaŭ. Astatniuju majomaść apisali, jaje vynas zabaranili.
Siamja pražyła ŭ domie piać hadoŭ, viedała zahinułuju susiedku. Jaje kata znajšli praź piać dzion — žyviolina vyžyła.
Ciapier siamja žyvie ŭ hateli i viartacca ŭ kvateru nie płanuje.
«My tudy nie vierniemsia. Chočam kampiensacyju i novaje žyllo», — kaža Lidzija.
Pakul siamji vypłacili tolki strachavyja 3050 rubloŭ. Strachavaja hatovaja kampiensavać bolš, ale acanić škodu niemahčyma — u dom nikoha nie puskajuć. Dziaržaŭnuju kampiensacyju siamja i inšyja žychary pakul nie atrymali, terminy zastajucca nieviadomymi.
Što budzie z domam u Homieli, dzie vybuchnuŭ haz i zahinuła žančyna pad abłomkami?
«Budziecie žyć u haścinicy, kolki spatrebicca». Mer Homiela sustreŭsia z žycharami paškodžanaha vybucham doma
Žycharam homielskaha doma, jaki paciarpieŭ ad vybuchu hazu, dazvolili viarnucca dachaty
Zahinułuju žančynu znajšli pry razbory pierakryćciaŭ doma ŭ Homieli
Stała viadoma, kali ŭ Homieli pačnuć demantaž častki doma, paciarpiełaha ad vybuchu hazu
«Taki strašenny huk byŭ, ja ažno padskočyła». Što zaraz adbyvajecca ŭ Homieli, dzie byŭ razburany padjezd
Kamientary