Čamu Mierc tak strymana reahuje na Trampaŭ zamach na Hrenłandyju? Bo Hiermanija najbolš zaležnaja ad ZŠA

Frydrych Mierc u hetyja dni staranna padbiraje słovy. Zvyčajna viadomy svaimi davoli pramymi i rezkimi vykazvańniami, fiederalny kancler Hiermanii strymana adreahavaŭ na pahrozy prezidenta ZŠA Donalda Trampa ŭ suviazi z kryzisam vakoł Hrenłandyi. U adroźnieńnie ad inšych lidaraŭ «jeŭrapiejskaj trojki» — Hiermanii, Francyi i Vialikabrytanii — kancler pakul ustrymlivajecca ad rezkich zajaŭ.

Mierc, vidavočna, čakaje asabistaj sustrečy z Trampam na placoŭcy Suśvietnaha ekanamičnaha forumu ŭ Davosie, a taksama pazačarhovaha samita Jeŭrasajuza 22 studzienia. U Brusieli abmiarkujuć adkaz Jeŭropy na abvieščanyja Trampam 10‑pracentnyja myty na tavary z vaśmi jeŭrapiejskich krain na fonie nastojlivych prapanoŭ prezidenta ZŠA kupić najbujniejšy ŭ śviecie vostraŭ i namiokaŭ na hatoŭnaść jaho anieksavać.

Čamu kiraŭnik urada najmacniejšaj ekanamična dziaržavy Jeŭropy taki strymany? Ahladalniki i ekśpierty tłumačać heta zaležnaściu Hiermanii ad ZŠA, jakaja sfarmavałasia paśla Druhoj suśvietnaj vajny i ŭ cełym macniejšaja, čym u inšych krain.

Jak niamieckaja armija i śpiecsłužby zaležać ad ZŠA

Na fonie vajny Rasii suprać Ukrainy, što praciahvajecca čaćviorty hod, Hiermanija jak nikoli z času zakančeńnia chałodnaj vajny zaležyć ad vajskovaj mocy ZŠA. Heta i raźmieščanaja na jaje terytoryi amierykanskaja jadziernaja zbroja, i najbujniejšy ŭ Jeŭropie amierykanski kantynhient — kala 50 tysiač vajskoŭcaŭ. Pry hetym niamieckaja armija paśla dziesiacihodździaŭ ekanomii i skaračeńniaŭ tolki pačała pieraasnaščeńnie i naroščvańnie kolkaści. Na heta spatrebicca jak minimum niekalki hadoŭ.

Jašče bolš adčuvalnaja zaležnaść pa asobnych vidach uzbrajeńniaŭ. Kali tanki, harmaty, karabli i padvodnyja łodki Hiermanija vyrablaje sama, to ŭ avijacyi, jašče bolš — u rakietnych technałohijach niemcy zaležać ad zbroi Made in USA. Heta i dziasiatki niadaŭna zakazanych sučasnych źniščalnikaŭ F-35, anałahaŭ jakich u Jeŭropie niama, transpartnyja viertaloty Boeing CH-47 Chinook, a taksama sistema PPO Patriot. Hiermanija taksama choča nabyć u ZŠA rakietny kompleks siaredniaj dalnaści Typhon, stvareńnie jeŭrapiejskich rakiet takoha typu jašče tolki viadziecca.

Urešcie, niamieckaja armija i śpiecsłužby krytyčna zaležać ad amierykanskich sistem naviadzieńnia, kaśmičnaj raźviedki i zboru ličbavych danych. Značnaja častka papiaredžanych u Hiermanii teraktaŭ — zasłuha amierykanskich śpiecsłužbaŭ, jakija padzialilisia infarmacyjaj ź Bierlinam.

Ad ZŠA zaležać sotni tysiač pracoŭnych miescaŭ u Hiermanii

Jašče macniejšaja zaležnaść — u ekanomicy. Hiermanija, choć i straciła tytuł čempijona śvietu pa eksparcie, sastupiŭšy Kitaju, zastajecca ekspartaaryjentavanaj ekanomikaj. ZŠA — hałoŭny handlovy partnior Hiermanii. Zaležnaść Bierlina ad amierykanskaha rynku vyšejšaja, čym u inšych krain «vaśmiorki», jakim Tramp pahražaje mytami.

Pavodle danych Fiederalnaha statystyčnaha viedamstva, za pieryjad sa studzienia pa listapad 2025 hoda Hiermanija pastaviła ŭ ZŠA tavaraŭ na sumu 135,8 miljarda jeŭra. Prytym hety pakazčyk značna ŭpaŭ — prykładna na 10% u paraŭnańni z anałahičnym pieryjadam 2024 hoda. Heta tłumačać uviadzieńniem 15‑pracentnaha myta dla krain ES. Impart tavaraŭ z ZŠA ŭ Hiermaniju, jak i raniej, adstaje, choć i vyras na 2,2%, skłaŭšy 86,9 miljarda jeŭra za 11 miesiacaŭ.

Roŭna hod tamu, u studzieni 2025 hoda, daśledavańnie instytuta Prognos, pra jakoje pisała Süddeutsche Zeitung, pradkazvała Hiermanii ryzyku straty da 300 tysiač pracoŭnych miescaŭ u vypadku realizacyi płanaŭ Trampa pa ŭviadzieńni mytaŭ. Tady najhoršaha scenaru ŭdałosia paźbiehnuć, ES i ZŠA damovilisia. Ciapier hetaja damoŭlenaść pad pahrozaj zryvu praz kanflikt vakoł Hrenłandyi.

U cełym instytut Prognos padličyŭ, što roznaj stupieni zaležnaści ad handlu z ZŠA ŭ Hiermanii padlahaje kala 1,2 miljona pracoŭnych miescaŭ, heta prykładna kožnaje dziasiataje. Paśla niekalkich hadoŭ recesii ŭ FRH u 2025 hodzie zafiksavali niaznačny rost ekanomiki, ale novyja myty mohuć pastavić kryž na płanach urada Mierca zrabić jaje ŭstojlivaj.

Najpierš ad ZŠA zaležyć niamieckaja farmaceŭtyčnaja pramysłovaść. Jaje dola ŭ ahulnym abjomie handlu Hiermanii z Amierykaj składaje prykładna čverć. Nie mienš važnyja ekspartnyja haliny — mašynabudavańnie, aŭtapram, avijacyjnaja technika, miedycynskaje abstalavańnie i chimičnaja pramysłovaść.

Tatalnaja zaležnaść ad ličbavych hihantaŭ z ZŠA

Varta ŭzhadać i pavyšanuju ŭ apošnija hady zaležnaść Hiermanii ad amierykanskich enierhanośbitaŭ. Tak, dola amierykanskaha zvadkavanaha hazu (LNG) składaje 80%, chacia ŭ cełym LNG pakryvaje tolki kala 10% impartu hazu ŭ Hiermaniju. Asnoŭnaja častka hazu, jak i raniej, idzie pa trubapravodach, Rasiju jak hałoŭnaha pastaŭščyka zamianiła Narviehija.

Pieryjadyčna ŭ Hiermanii abmiarkoŭvajuć amal tatalnuju zaležnaść ad amierykanskich kancernaŭ u śfiery ličbavych technałohij — Microsoft, Google, Apple, Meta. Bieź ich pradukcyi ekanomika Hiermanii «spyniłasia b», piša ŭ śviežym numary časopis Der Spiegel.

Sproby abmiežavać ich upłyŭ na jeŭrapiejskim uzroŭni byli ścipłymi, a raspracovak ułasnaha softu mała. Praŭda, takuju zaležnaść majuć i inšyja jeŭrapiejskija krainy.

Urešcie, nie varta zabyvacca i pra kosmas. Da maštabnaj vajny suprać Ukrainy Hiermanija aktyŭna karystałasia pasłuhami Rasii jak dla dastaŭki niamieckich kasmanaŭtaŭ na Mižnarodnuju kaśmičnuju stancyju (MKS), tak i dla zapusku spadarožnikaŭ. Ciapier ilvinaja dola hetaha rynku — u ZŠA.

Kampanija amierykanskaha miljardera Iłana Maska SpaceX zapuściła ŭ 2025 hodzie 165 rakiet u kosmas. Novaja jeŭrapiejskaja rakieta-nośbit «Aryjana-6» zrabiła tolki čatyry zapuski. I choć u Hiermanii, asabliva ŭ Bavaryi, apošnimi hadami aktyŭna raźvivajucca startapy ŭ śfiery cyvilnych rakietnych technałohij, da paśpiachovych sieryjnych puskaŭ im jašče daloka.

• 2
• 0
• 0
• 2
• 0
• 0
• 0
• 0