Kaleśnikava: Łukašenka moža pajści na spynieńnie represij dziela budučyni i «ź niejkaj mudraści»
Maryja Kaleśnikava stała hierainiaj novaha vypusku prahramy Juryja Dudzia. U hutarcy jana znoŭ zaklikała Zachad da prahmatyčnaha dyjałohu ź Minskam.
Dudź spytaŭ Kaleśnikavu pra jaje rezanansnyja słovy paśla vyzvaleńnia, što Jeŭropie treba vieści dyjałoh z Łukašenkam.
— Nu, usio vielmi prosta. Samaje prostaje — heta toje, što ja tut znachodžusia, tamu što niechta ź niekim pačaŭ razmaŭlać. Kali dla taho, kab vyzvalić ludziej, treba razmaŭlać z Łukašenkam — ja liču, što heta varta rabić. Ja zaraz nie aceńvaju niejkija jaho dziejańni ci ŭzrovień represij. Ja kažu pa fakcie: kali ŭ vyniku dyjałohu vyzvalacca ludzi — heta dobra. Kali spyniacca represii i ludziej pierastanuć karać za mierkavańnie — heta vielmi dobra.
Toje samaje jana kaža pra imaviernaje viartańnie ŭ Biełaruś jeŭrapiejskich ambasad, kulturnych instytucyj, «nakštałt Instytuta Hiote, jakija padtrymlivajuć nie palitykaŭ, a ludziej i kulturu», «elektryčki ŭ Vilnius».
— Nam nie patrebnaja vypalenaja ziamla paśla dyktataraŭ. Nam treba, kab ludzi adčuvali siabie svabodna. Zaraz biełaruski teatr, muzyka, mastaki — amal usie źjechali. Toje, što zastałosia, — vielmi nizkaj jakaści, i heta zapaŭniajecca takim ža nizkajakasnym rasijskim kantentam. Heta dehradacyja, jakaja bačnaja nie adrazu, ale z hadami jana adbyvajecca. Tamu pazityŭnyja źmieny ŭ vyniku dyjałohu važniejšyja za krytyku, jakuju ja atrymlivaju, — dadaje jana.
Dudź udakładniaje, jak možna damovicca z Łukašenkam, bo navat paśla vyzvaleńnia ŭsich palitviaźniaŭ nabrać novych zakładnikaŭ dla jaho — pytańnie pary dzion. Dzie harantyja, što jon nie nabiare novych pa takim ža biaspraŭi? Čamu Łukašenka moža na heta pajści? — pytaje Dudź.
— Dziela budučyni krainy i dziaciej, mahčyma, z punktu hledžańnia prajavy mudraści ci siły… Jon nie moža nie dumać pra budučyniu. Da taho ž jon zacikaŭleny ŭ źniaćci sankcyj, — miarkuje Kaleśnikava.
— Što prymušaje dumać, što jaho cikavić budučynia krainy? Jon ža moža kazać što zaŭhodna, kolki razoŭ jon padmanvaŭ…
— Dziela ludziej varta pasprabavać, — adkazvaje Maryja.
Kamientary