Dziaržaŭnyja ŚMI paviedamili pra adnaŭleńnie čyhunačnaha złučeńnia z Polščaj. Ci praŭda?
Pieršy infarmacyjny 6 lutaha paviedamiŭ, što z 1 krasavika Polšča płanuje adnavić čyhunačnaje złučeńnie ź Biełaruśsiu. «Biełsat» zapytaŭsia ŭ polskaj čyhunki, ci praŭda heta.
Pavodle Pieršaha infarmacyjnaha, «polskija ŭłady płanujuć dalejšaje paetapnaje adkryćcio miažy ź Biełaruśsiu. Miascovyja miedyja paviedamlajuć pra adnaŭleńnie čyhunačnaha złučeńnia pamiž krainami z 1 krasavika, jakoje adbudziecca nieŭzabavie».
Jakija mienavita polskija miedyi pra heta paviedamili, u materyjale nie ŭdakładniajecca. Nijakich spasyłak taksama niama.
Navina pra adnaŭleńnie čyhunačnaha ruchu 5 lutaha źjaviłasia i ŭ telehram-kanale Infotrans Media Belarus. U joj bolš detalaŭ, adnak taksama biez spasyłak na polskija vydańni:
«Čyhunačnaje złučeńnie pamiž Polščaj i Biełaruśsiu mohuć adkryć užo z 1 krasavika. Pytańnie pra adkryćcio pasažyrskaha čyhunačnaha złučeńnia pamiž Biełaruśsiu i Polščaj nasamreč prapracoŭvajecca. Tema aktyŭna abmiarkoŭvajecca apošnim časam. Jana padymałasia na pasiadžeńni haradskoj rady Biełaja Padlaskaja, a ŭ pamiežny Tarespal niadaŭna pryjazdžała delehacyja Biełaruskaj čyhunki. Baki abmiarkoŭvajuć mahčymaść adnaŭleńnia pasažyrskaha čyhunačnaha ruchu ŭžo z 1 krasavika».
Polskaja čyhunka (PKP Polskie Linie Kolejowe S.A) u adkaz na zapyt «Biełsatu» źniapraŭdziła hetuju infarmacyju.
«U Polskija čyhunačnyja linii nie pastupała nivodnaha zvarotu ci zapytu z boku pieravoźnikaŭ. U źviazku z hetym adnaŭleńnie čyhunačnaha złučeńnia ź Biełaruśsiu z 1 krasavika nie płanujecca», — havorycca ŭ paviedamleńni pres-słužby Polskaj čyhunki.
Pasažyrski čyhunačny ruch pamiž Polščaj i Biełaruśsiu spyniŭsia ŭ sakaviku 2020 hoda. Spačatku heta było vyklikana pandemijaj karanavirusa. Paźniej ruch tak i nie adnaviŭsia praz sankcyi.
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta7
Kamientary