Telefonnyja machlary pierajšli da vykupaŭ za dziaciej — raskažycie pra hetu schiemu blizkim
Achviaraj novaj składanaj schiemy machlarstva stała minskaja siamja. Złačyncy patrabavali ŭ šakavanych baćkoŭ vykup za «vyzvaleńnie» dački, a dziaŭčynku zmusili źbiehčy z domu i schavacca.
Historyja pačałasia sa zvanka dziaŭčyncy nibyta ad supracoŭnika «Vajłdbieryz», što jaje tavary pryvieźli nie ŭ toj punkt vydačy. I kab adasłać pasyłki ŭ najbližejšy punkt, treba ahučyć svoj elektronny adras pošty i šaściznačny kod. Atrymaŭšy dostup da źviestak dziaŭčynki, afierysty pad vyhladam siłavikoŭ pierakanali 15‑hadovuju dziaŭčynku, što jana stała fihurantkaj spravy ab admyvańni hrošaj.
«Źviazalisia z kurataram nibyta MUS. Tam kuratar MUS taksama mianie prainfarmavaŭ, što mnie i maim baćkam pahražaje 7 ci 15 hadoŭ turmy, kali heta ŭsio praŭda, i što ja praŭda finansuju teraryzm. Akazvajecca, praz hetuju ŭciečku źviestak u mianie nibyta adkryŭsia novy rachunak, i tam jak by admyvali hrošy», — raskazvaje dziaŭčynka.
Kali jana paviedamiła pra adsutnaść u jaje hrošaj, to dla «vyratavańnia siamji» joj prapanavali paŭdzielničać u śpiecapieracyi.
Padletak na zahad afierystaŭ źjechała z horada, adklučyła mabilny telefon i dastała sim-kartu. Školnicu zapeŭnili, što jaje telefon prasłuchoŭvajuć i heta nieabchodnyja miery zaściarohi.
Pakul dziaŭčynka była biez suviazi, machlary pačali atakavać jaje maci.
«Pazvaniŭ, skazaŭ, što vaša dzicia ŭ nas. U telehram dasłali jaje fotazdymak. Nu prosta heta jana! I ŭ kofcie jaje, i ŭ džynsach. Jon piša: «Pryvitańnie, Kacia, paznaješ? Čym dalej ty i Siaroža budziecie dumać, dačuška vaša budzie ŭsio dalej i dalej ad Minska», — raskazała maci.
Žančynie dasyłali fotazdymki dački ŭ sałonie aŭto i pahražali vyvieźci jaje z krainy, kali maci nie pieraličyć hrošy na kryptakašalok:
«Pajšli pahrozy, što my zaraz jaje vyvozim ź Minska, i vy pavinny pieravieści ŭ najkaraciejšyja terminy — mnie dali hadzinu — na kryptavalutu, na niejki kryptakašalok».
Nieviadomy pytaŭsia, na kolki zajaŭnica aceńvaje žyćcio svajho dziciaci. Joj dasłali fotazdymki dziaŭčynki i pakojaŭ ich kvatery.
Žančyna źviarnułasia ŭ milicyju. Supracoŭniki Frunzienskaha RUUS znajšli dziaŭčynku ŭ pasiołku Valarjanava.
MUS zaklikaje baćkoŭ rastłumačyć dzieciam, što lubyja patrabavańni pieradać kody z SMS ci ŭdzielničać u «sakretnych pravierkach» źjaŭlajucca prykmietaj złačynstva.
Kamientary