Na svabodzie Marfa Rabkova

Marfa Rabkova znachodzicca ŭ hrupie z palitviaźniaŭ, jakija byli vyzvalenyja 19 sakavika, paviedamiła «Viasna».

Kaardynatarka vałanciorskaj słužby «Viasny» była zatrymanaja supracoŭnikami HUBAZiKa ŭ Minsku 17 vieraśnia 2020 hoda, kali viartałasia z uručeńnia «Viaśnie» premii Jana Karskaha. Doma ŭ jaje praviali pieratrus, a Marfu razam z mužam Vadzimam zatrymali i dastavili ŭ HUBAZiK. Pieršapačatkova joj vystavili abvinavačańnie tolki pa č. 3 art. 293 Kryminalnaha kodeksa — za arhanizacyju vałancioraŭ-naziralnikaŭ za vybarami prezidenta ŭ miežach kampanii «Pravaabaroncy za svabodnyja vybary».

Paźniej abvinavačańnie istotna pašyryli i dadali: č. 1 art. 293 (arhanizacyja masavych biesparadkaŭ); č. 1 art. 13, č. 2 art. 293 (pryhatavańnie i naŭmysnaje stvareńnie ŭmoŭ dla ŭdziełu ŭ masavych biesparadkach); č. 3 art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś); č. 1 art. 361‑1 (stvareńnie ekstremisckaha farmavańnia); č. 1 art. 285 (kiraŭnictva złačynnaj arhanizacyjaj); č. 3 art. 130 (raspalvańnie sacyjalnaj varožaści hrupaj asob); č. 2 art. 339 (złosnaje chulihanstva); č. 3 art. 339 (asabliva złosnaje chulihanstva); art. 341 (apahańvańnie zbudavańniaŭ i psavańnie majomaści); č. 3 art. 218 (naŭmysnaje źniščeńnie abo paškodžańnie čužoj majomaści, ździejśnienaje arhanizavanaj hrupaj); č. 2 art. 295‑3 (niezakonnyja dziejańni ŭ dačynieńni da pradmietaŭ, paražalnaje dziejańnie jakich zasnavana na vykarystańni haručych rečyvaŭ, ździejśnienyja hrupaj asob).

Śledstva śćviardžała, što z 2005 pa 2020 hod nieŭstanoŭlenyja asoby pry ŭdziele anarchista Alaksandra Franckieviča i pravaabaroncy Marfy Rabkovaj abjadnali «šerah arhanizavanych złačynnych hrup»: «Revalucyjnaje dziejańnie», «Narodnaja samaabarona» i «Rievolucijna dija».

Hetyja abjadnańni, pavodle viersii śledstva, uvajšli ŭ skład «mižnarodnaj złačynnaj arhanizacyi» ŭ jakaści jaje strukturnych padraździaleńniaŭ. Franckievič i Rabkova, jak śćviardžaje śledstva, nibyta byli arhanizatarami padpału padatkovaj inśpiekcyi Homielskaha rajona ŭ sakaviku 2017 hoda z vykarystańniem «kaktejlaŭ Mołatava».

Sud nad Rabkovaj i jašče dzieviaćciu palitviaźniami pačaŭsia ŭ krasaviku 2022 hoda i prachodziŭ u zakrytym režymie.

Za čas utrymańnia pad vartaj jašče da suda ŭ Marfy pamierli babula i baćka, naziralisia prablemy sa zdaroŭjem. Śledčyja nieadnarazova prapanoŭvali joj supracoŭnictva: za pryznańnie viny joj abiacali źmianić mieru strymańnia i adpuścić da chvorych baćkoŭ. Ale Marfa zastavałasia pryncypovaj u svajoj pazicyi. Svaju vinu jana nie pryznała.

Pavialičyć

U vieraśni 2022 hoda sud pryznačyŭ žančynie pakarańnie ŭ vyhladzie 14 hadoŭ i 9 miesiacaŭ źniavoleńnia ŭ kałonii va ŭmovach ahulnaha režymu. Termin jana adbyvała ŭ žanočaj kałonii № 4 u Homieli. Na voli jaje čakaŭ muž.

U sakaviku 2023 hoda Marfa była ŭniesiena ŭ «śpis terarystaŭ», a ŭ mai taho ž hoda — u «śpis ekstremistaŭ».

Budučaja pravaabaronca naradziłasia 6 studzienia 1995 hoda ŭ Dobrušy. Paśla zakančeńnia siaredniaj škoły ŭ 2012 hodzie pastupiła na śpiecyjalnaść «bijałohija i hieahrafija» ŭ Biełaruski dziaržaŭny piedahahičny ŭniviersitet imia Maksima Tanka (Minsk). Uvosień 2015 hoda dziaŭčynu zatrymali na nievialikim maršy kala budynka ŭniviersiteta. Z-za hetaha pierad zimovaj siesijaj u pačatku 2016 hoda kiraŭnictva ŭniviersiteta prymusiła Marfu zabrać dakumienty z apošniaha kursa.

U 2017 hodzie dziaŭčyna sprabavała adnavicca na tuju ž śpiecyjalnaść u Mahiloŭskim dziaržaŭnym univiersitecie imia A. Kulašova, ale biespaśpiachova. U tym ža hodzie jana pastupiła ŭ EHU na śpiecyjalnaść «mižnarodnaje prava».

Paralelna z vučobaj Marfa niekalki hadoŭ była vałanciorkaj, a ŭvosień 2019 hoda stała siabram Pravaabarončaha centra «Viasna» i kaardynatarkaj vałanciorskaj słužby arhanizacyi.

Pry jaje aktyŭnym udziele byli arhanizavanyja dziasiatki nazirańniaŭ za mirnymi schodami hramadzian, praviedzieny manitorynh bolš jak 100 sudovych pasiadžeńniaŭ pa administracyjnych spravach u dačynieńni da zatrymanych udzielnikaŭ mirnych akcyj, arhanizoŭvalisia treninhi dla novych vałancioraŭ.

U 2020 hodzie Marfa Rabkova zajmałasia naboram i navučańniem naziralnikaŭ dla kampanii «Pravaabaroncy za svabodnyja vybary».

Z pačatkam masavych represij padčas vybarčaj kampanii jana aktyŭna ŭdzielničała ŭ arhanizacyi dapamohi represavanym aktyvistam i ich siemjam, brała ŭdzieł u dakumientavańni śviedčańniaŭ achviaraŭ katavańniaŭ zatrymanych udzielnikaŭ akcyj pratestu. A 17 vieraśnia była zatrymanaja sama.

• 3
• 0
• 0
• 0
• 0
• 0
• 0
• 1