Праваабаронца знаходзілася за кратамі з верасня 2020 года. Суд, які адбыўся ў верасні 2022 года, прысудзіў ёй 15 гадоў калоніі.
Марфа Рабкова знаходзіцца ў групе з палітвязняў, якія былі вызваленыя 19 сакавіка, паведаміла «Вясна».
Каардынатарка валанцёрскай службы «Вясны» была затрыманая супрацоўнікамі ГУБАЗіКа ў Мінску 17 верасня 2020 года, калі вярталася з уручэння «Вясне» прэміі Яна Карскага. Дома ў яе правялі ператрус, а Марфу разам з мужам Вадзімам затрымалі і даставілі ў ГУБАЗіК. Першапачаткова ёй выставілі абвінавачанне толькі па ч. 3 арт. 293 Крымінальнага кодэкса — за арганізацыю валанцёраў-назіральнікаў за выбарамі прэзідэнта ў межах кампаніі «Праваабаронцы за свабодныя выбары».
Пазней абвінавачанне істотна пашырылі і дадалі: ч. 1 арт. 293 (арганізацыя масавых беспарадкаў); ч. 1 арт. 13, ч. 2 арт. 293 (прыгатаванне і наўмыснае стварэнне ўмоў для ўдзелу ў масавых беспарадках); ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь); ч. 1 арт. 361‑1 (стварэнне экстрэмісцкага фармавання); ч. 1 арт. 285 (кіраўніцтва злачыннай арганізацыяй); ч. 3 арт. 130 (распальванне сацыяльнай варожасці групай асоб); ч. 2 арт. 339 (злоснае хуліганства); ч. 3 арт. 339 (асабліва злоснае хуліганства); арт. 341 (апаганьванне збудаванняў і псаванне маёмасці); ч. 3 арт. 218 (наўмыснае знішчэнне або пашкоджанне чужой маёмасці, здзейсненае арганізаванай групай); ч. 2 арт. 295‑3 (незаконныя дзеянні ў дачыненні да прадметаў, паражальнае дзеянне якіх заснавана на выкарыстанні гаручых рэчываў, здзейсненыя групай асоб).
Следства сцвярджала, што з 2005 па 2020 год неўстаноўленыя асобы пры ўдзеле анархіста Аляксандра Францкевіча і праваабаронцы Марфы Рабковай аб’ядналі «шэраг арганізаваных злачынных груп»: «Рэвалюцыйнае дзеянне», «Народная самаабарона» і «Революційна дія».
Гэтыя аб’яднанні, паводле версіі следства, увайшлі ў склад «міжнароднай злачыннай арганізацыі» ў якасці яе структурных падраздзяленняў. Францкевіч і Рабкова, як сцвярджае следства, нібыта былі арганізатарамі падпалу падатковай інспекцыі Гомельскага раёна ў сакавіку 2017 года з выкарыстаннем «кактэйляў Молатава».
Суд над Рабковай і яшчэ дзевяццю палітвязнямі пачаўся ў красавіку 2022 года і праходзіў у закрытым рэжыме.
За час утрымання пад вартай яшчэ да суда ў Марфы памерлі бабуля і бацька, назіраліся праблемы са здароўем. Следчыя неаднаразова прапаноўвалі ёй супрацоўніцтва: за прызнанне віны ёй абяцалі змяніць меру стрымання і адпусціць да хворых бацькоў. Але Марфа заставалася прынцыповай у сваёй пазіцыі. Сваю віну яна не прызнала.
У верасні 2022 года суд прызначыў жанчыне пакаранне ў выглядзе 14 гадоў і 9 месяцаў зняволення ў калоніі ва ўмовах агульнага рэжыму. Тэрмін яна адбывала ў жаночай калоніі № 4 у Гомелі. На волі яе чакаў муж.
У сакавіку 2023 года Марфа была ўнесена ў «спіс тэрарыстаў», а ў маі таго ж года — у «спіс экстрэмістаў».
Будучая праваабаронца нарадзілася 6 студзеня 1995 года ў Добрушы. Пасля заканчэння сярэдняй школы ў 2012 годзе паступіла на спецыяльнасць «біялогія і геаграфія» ў Беларускі дзяржаўны педагагічны ўніверсітэт імя Максіма Танка (Мінск). Увосень 2015 года дзяўчыну затрымалі на невялікім маршы каля будынка ўніверсітэта. З-за гэтага перад зімовай сесіяй у пачатку 2016 года кіраўніцтва ўніверсітэта прымусіла Марфу забраць дакументы з апошняга курса.
У 2017 годзе дзяўчына спрабавала аднавіцца на тую ж спецыяльнасць у Магілёўскім дзяржаўным універсітэце імя А. Куляшова, але беспаспяхова. У тым жа годзе яна паступіла ў ЕГУ на спецыяльнасць «міжнароднае права».
Паралельна з вучобай Марфа некалькі гадоў была валанцёркай, а ўвосень 2019 года стала сябрам Праваабарончага цэнтра «Вясна» і каардынатаркай валанцёрскай службы арганізацыі.
Пры яе актыўным удзеле былі арганізаваныя дзясяткі назіранняў за мірнымі сходамі грамадзян, праведзены маніторынг больш як 100 судовых пасяджэнняў па адміністрацыйных справах у дачыненні да затрыманых удзельнікаў мірных акцый, арганізоўваліся трэнінгі для новых валанцёраў.
У 2020 годзе Марфа Рабкова займалася наборам і навучаннем назіральнікаў для кампаніі «Праваабаронцы за свабодныя выбары».
З пачаткам масавых рэпрэсій падчас выбарчай кампаніі яна актыўна ўдзельнічала ў арганізацыі дапамогі рэпрэсаваным актывістам і іх сем’ям, брала ўдзел у дакументаванні сведчанняў ахвяраў катаванняў затрыманых удзельнікаў акцый пратэсту. А 17 верасня была затрыманая сама.
Цяпер чытаюць
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары