«Dzień Voli — heta napamin pra toje, što imknieńnie da svabody źjaŭlajecca nieadjemnaj častkaj biełaruskaj identyčnaści».
U Viarchoŭnaj Radzie Ukrainy padčas plenarnaha pasiadžeńnia deputaty pavinšavali biełarusaŭ z Dniom Voli.
«25 sakavika Volnaja Demakratyčnaja Biełaruś adznačaje Dzień Voli — 108‑iu hadavinu abviaščeńnia niezaležnaści Biełaruskaj Narodnaj Respubliki, jakaja stała pieršym histaryčnym krokam biełaruskaha naroda da ŭłasnaj dziaržaŭnaj subjektnaści. Hetaje imhnieńnie tryvała niadoŭha, ale jano nazaŭždy zastałosia ŭ historyi. Dzień Voli — heta napamin pra toje, što imknieńnie da svabody źjaŭlajecca nieadjemnaj častkaj biełaruskaj identyčnaści», — havorycca ŭ zajavie.
Parłamientaryi pišuć, što siońnia Biełaruś žyvie va ŭmovach dvajnoj akupacyi: režymu Łukašenki i z boku Rasii, jakaja pieratvaryła Biełaruś u płacdarm dla źniščeńnia Ukrainy.
«U adpaviednaści z normami mižnarodnaha humanitarnaha prava, Biełaruś źjaŭlajecca akupavanaj terytoryjaj. Heta jurydyčny fakt, rehłamientavany artykułami 42 Haahskaj kanviencyi i 2 Ženieŭskaj kanviencyi. Ukraina — pieršaja dziaržava, jakaja abaviazanaja zrabić hetuju vysnovu aficyjnaj. Padtrymlivajučy dypłamatyčnyja adnosiny ź Minskam, my lehitymizujem režym, jaki zabivaje našych hramadzian. Čas pakłaści hetamu kraj», — havorycca ŭ zajavie.
Deputaty padkreślivajuć, što jość inšaja Biełaruś — i jana zmahajecca.
«U hety dzień my z asablivaj udziačnaściu schilajem hałovy pierad bajcami pałka imia Kastusia Kalinoŭskaha, jakija ź pieršych dzion poŭnamaštabnaha ŭvarvańnia abaraniajuć ukrainskuju ziamlu na samych haračych učastkach frontu. Jany abaraniajuć ideju, dziela jakoj my vajujem: dolu naroda nielha naviazać siłaj — jaje vyznačajuć tyja, chto hatovy za jaje stajać. Ich advaha na poli boju dakazvaje toje, što dekłaravali zaŭsiody: svaboda Ukrainy i svaboda Biełarusi — niepadzielnyja. Sapraŭdnaja niezaležnaść Biełarusi budzie zdabytaja ŭ tym liku na hetaj vajnie», — havorycca ŭ zajavie.
Demakratyčnaja źmiena ŭłady ŭ Minsku — heta pytańnie biaśpieki ŭsiaho rehijona, pišuć parłamientaryi.
Mižfrakcyjnaje deputackaje abjadnańnie Viarchoŭnaj Rady Ukrainy «Za Demakratyčnuju Biełaruś!» zaklikaje razarvać dypłamatyčnyja adnosiny z režymam Łukašenki; aficyjna pryznać Biełaruś akupavanaj Rasijaj terytoryjaj; pieradać pamiaškańnie pasolstva Respubliki Biełaruś u Kijevie demakratyčnym pradstaŭnikam biełaruskaha naroda, a mižnarodnuju supolnaść — uzmacnić sankcyjny cisk na režym.
«My vierym, što chutka nad volnym Minskam znoŭ budzie łunać bieł-čyrvona-bieły nacyjanalny ściah, a miaža pamiž našymi krainami stanie miažoj pamiž dźviuma volnymi jeŭrapiejskimi nacyjami.
Žyvie Biełaruś! Słava Ukrainie!» — havorycca ŭ zajavie.
Ciapier čytajuć
«Fanaty stajali ŭ čerhach jašče da adkryćcia restaranaŭ». Šalenstva ź birulkami fiej na sumki, jakija vypuściła piceryja5
Kamientary