Daškievič čakaje ad Babaryki i Kaleśnikavaj publičnaha pryznańnia pamyłak
U novym vypusku prajekta «TOK» były palitviazień i lidar «Maładoha frontu» Źmicier Daškievič patłumačyŭ, čamu pavažaje hieraizm Viktara Babaryki i Maryi Kaleśnikavaj, ale pry hetym čakaje ad ich publičnaha pryznańnia pamyłak.
Na pytańnie pra staŭleńnie da Viktara Babaryki i Maryi Kaleśnikavaj Źmicier Daškievič adkazaŭ ščyra: u 2020 hodzie hetyja postaci jaho «zusim nie cikavili». Adnak siońnia jon pryznaje važnaść ichniaha kroku.
«Ja liču, što heta vielmi dobra, što taki čałaviek, jak Viktar Babaryka, vyjšaŭ z hetaj sistemy, kinuŭ joj vyklik.
Ja ź im piersanalna nie znajomy. (…) My pisali ŭsim palitviaźniam listy, i Babaryku pisali. I malilisia my za Babaryku, za Maryju Kaleśnikavu. I Viktar adkazvaŭ nam niešta, i dzieci malunki malavali.
Dobra, što ludzi paŭstali suprać chłuśni. Pryjšoŭ dzień, kali jany paŭstali».
Ale razam z pavahaj Daškievič vykazvaje i žorstkuju krytyku:
«Nie treba visieć u minułym, jakoje ciabie ciahnie i pahłynaje. I kali vy nie idziacie dalej — nu na što vy pretendujecie? Pra što vy havorycie? (…) Kali ja słuchaŭ [toje, što jany kazali,] u Čarnihavie — ja čyrvanieŭ. Heta dzikaja žudaść».
Pavodle słoŭ Źmitra, jon čakaŭ ad Babaryki i Kaleśnikavaj prabačeńniaŭ za toje, što jany nahavaryli raniej, adnak hetaha nie adbyłosia ŭ toj formie, jakuju jon ličyć nieabchodnaj:
«Ja čakaŭ ad jaho, ad Maryi — kab jany skazali: «Nu prabačcie, rabiaty, nu tupanuli». Ale robicca vyhlad, što ŭsio narmalna.
Ale, jak kažuć u biełaruskim narodzie, dyk kali ty brešaš? Ty tady brachaŭ ci ty zaraz brešaš? Ty havoryš supraćlehłyja rečy. I maja pretenzija takaja: nu nie brašycie!».
Daškievič zhadaŭ, što Staś Karpaŭ jašče ŭ 2020‑m tłumačyŭ jamu pryčyny takoj «taktyčnaj» niaščyraści palityka, ale Źmicier pierakanany, što tak rabić nielha, bo «ŭ nas užo jość baćka chłuśni».
«Chopić adnaho. Tamu
dziakuj Bohu, što takija ludzi, jak Viktar Babaryka, inšyja, jakija, moža, navat bližej byli ŭ hetaj sistemie, vyjšli ź jaje, uźnialisia i padtrymali praŭdu. Supier! Nam treba dziakavać hetym ludziam za toje, što jany zrabili hety krok.
Babaryka prynios vialikuju achviaru. I dahetul praciahvaje prynosić. Syn jahony pakutuje. Jaho katujuć šosty hod. Viktar prynosić hetuju achviaru. Ale davajcie niejak razvažać», — davodzić svaju pazicyju Daškievič.
Havoračy pra Maryju Kaleśnikavu, Źmicier adznačyŭ, što asabista ź joj nie znajomy i nie zastaŭ jaje ŭ «Maładym froncie»:
«Ale listy maje da Kaleśnikavaj i, moža być, jaje adkazy jość u materyjałach kryminalnaj spravy, pa jakoj mianie pasadzili ŭ 2022 hodzie. HUBAZiK pryšyŭ hetyja listy palitviaźniam jak dokaz taho, što ja złačynca», — kaža Daškievič.
Jon uzhadvaje, što adzin ź siłavikoŭ, jaki supravadžaŭ jaho paśla zatrymańnia, rezka krytykavaŭ Źmitra za toje, što razam ź im listy da palitźniavolenych pisali i jaho dzieci: «Ja b ciabie prosta źniščyŭ, što ty ŭciahvaješ dziaciej u palityku».
«Maryja zrabiła hieraičny ŭčynak. Nam treba ŭsim pamiatać, krytykujučy ludziej, što jany, moža, nie toje zrabili, nie tak vykazalisia, moža, niejkaja duraść.
Nam usio roŭna treba pamiatać učynak kožnaha ŭ 2020 hodzie. Achviaru kožnaha. Heta dazvolić nam krytykavać niejak ź luboŭju, z razumieńniem.
Nu vy bzdury nahavaryli i narabili.
Na maju dumku, vam treba za hetuju bzduru prosta paprasić prabačeńnia. Prosta skazać: nu heta była duraść», — padsumoŭvaje były palitviazień.
Daškievič pra Paźniaka: «Heta razburalnaja praca, jana demaralizuje, raźjadnoŭvaje». A Cichanoŭskaj jon zachaplajecca
Siamja Daškievičaŭ uźjadnałasia ŭ Vilni FOTAFAKT
«Dziela svaich dzietak, kab da ich viarnucca». Daškievič raskazaŭ, jak trapiŭ u «nizki status» i jak ad jaho patrabavali prašeńnie ab pamiłavańni
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy74
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi33
Kamientary