Dyrektarka turfirmy, jakaja nie paznała biełaruskaj movy, vyrašyła adsudzić 37 tysiač dalaraŭ. Ale praź niekalki hadzin pieradumała
Historyja vakoł dyrektarki minskaj turfirmy «Na vyšyni» Iryny Dubroŭskaj, jakaja nie paznała biełaruskaj movy i adchapiła za heta chvalu chiejtu i krytyki ŭ sacsietkach, atrymała praciah.
Dubroŭskaja zajaviła, što padaje ŭ sud i ahučyła pretenzii da karystalnicy Tredsa na 37 545 dalaraŭ. Maŭlaŭ, mienavita na takuju sumu jana straciła kantrakty z-za jaje pasta. Adnak praź niekalki hadzin Dubroŭskaja pieradumała.
U čym sutnaść
Usio pačałosia z pasta ŭ Treds. Iryna Dubroŭskaja apublikavała fota ŭpryhožanaha Minska da Dnia jadnańnia Biełarusi i Rasii.
U kamientarach joj zadali pytańnie pa-biełarusku — ci tak ža ŭpryhožana Maskva.
U adkaz jana pa-rusku napisała:
«Ja nie viedaju vašaj movy. Pišycie na biełaruskaj ci ruskaj».
Skrynšoty hetaha adkazu razyšlisia pa sacsietkach. Kamientar dyrektarka turfirmy chutka vydaliła, ale abmierkavańnie praciahnułasia, a sama Dubroŭskaja ŭklučyłasia ŭ sprečki i pačała aktyŭna adkazvać krytykam.
Heta tolki pavialičyła ŭvahu da historyi i pieratvaryła adzin kamientar u internet-skandał.
Pahroza sudom
Praź niekalki dzion paśla hetaha Dubroŭskaja vyrašyła, što hetaja historyja naniesła škodu jaje biznesu, i chutka znajšła «vinavatuju».
Adna ź dziaŭčat, jakaja pieršaj apublikavała skandalny skrynšot, atrymała asabistaje paviedamleńnie:
«Padadzieny pazoŭ ab pryčynieńni škody dziełavoj reputacyi i straty kantraktaŭ na 37 545 u.a. Bližejšym časam vam pavinna pryjści paviedamleńnie ŭ sud».
I dalej:
«Kali vyrašyli papijarycca za moj košt, maje jurysty prosta napisali pazoŭ».
Paralelna Dubroŭskaja publična vykazała svaju pazicyju ŭ Treds:
«Vašymi dziejańniami naniesiena škoda majoj kampanii. Kožny krok maje svaje nastupstvy. Vy vyrašyli papijarycca za košt majoj kampanii, jakuju ja vybudoŭvaju 8‑y hod zapar? Nu davaj».
Dziaŭčyna, jakaja pościła skrynšot ź jaje adkazam, adkazvaje strymana:
«Ja ŭvohule nie viedaju vašu kampaniju i nie pijaryłasia. Ja vykłała ahulnadastupny post i kamientary bieź piersanalnych danych».
Što adbyvajecca ŭ kamientarach
Tym časam karystalniki Treds stali na bok dziaŭčyny, jakaja vykłała post. Chtości iranizuje:
«To bok niepiśmiennaja jana, a vinavatyja vy?»
Chtości stavić pad sumnieŭ isk:
«U paście biznes nie zhadvaŭsia».
Inšyja adkryta vyśmiejvajuć situacyju:
«Sama źniasłaviłasia, sama vystaviłasia na ŭsieahulny ahlad, sama pakryŭdziłasia».
«Kali źniasłaviłasia ŭ internecie, ale hetaha było niedastatkova i vyrašyła źniasłavicca jašče i ŭ žyćci».
Sama Dubroŭskaja na krytyku adkazvaje łakanična: «Sud vyrašyć».
I praciahvaje ŭstupać u sprečki:
«Vy pa isku ni adkaźnik, ni śviedka. Prosta rochknuli ŭ treds».
Jość niuans
Praź niekalki hadzin paśla hučnych zajaŭ pra sud Dubroŭskaja raptam źmianiła ton. Adchapiŭšy novaj krytyki, u kamientarach jana napisała:
«Ja ŭžo napisała joj, što nie budzie nijakaha pazovu. Mnie niama kali».
I dadała doŭhi emacyjny pasaž pra toje, što «pierš čym «zabivać» biznes», treba «stvaryć svoj i pahavaryć praz 5 hadoŭ».
Pry hetym sama Dubroŭskaja kaža, što skandał pajšoŭ joj navat na karyść:
«U mianie nikoli nie było takoha anšłahu pa zajaŭkach. Dziakuj, treds».
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja22
Kamientary