Patryjarch Kirył zaklikaŭ pravasłaŭnych śviataroŭ: «Rabotajtie, braťja!»
Vystupajučy ŭ Breście, patryjarch Kirył, kiraŭnik Ruskaj pravasłaŭnaj carkvy, zaklikaŭ pravasłaŭnaje duchavienstva Rasii i Biełarusi pracavać nad umacavańniem viery ŭ metach «abarony Ajčyny», i vykarystaŭ pry hetym miem, jaki zvyčajna prymianiajecca ŭ dačynieńni da supracoŭnikaŭ represiŭnych siłavych struktur.
«Źviartajučysia da našaha jepiskapatu, da duchavienstva, jakoje nie tolki tut znachodzicca, a da ŭsiaho jepiskapatu i duchavienstva, jašče i jašče raz chaču skazać: «rabotajtie, braťja», — skazaŭ Kirył.
«Naša budučynia — jak naroda, tak i carkvy — šmat u čym zaležyć ad taho, jak budzie sfarmiravana śviadomaść moładzi, nakolki jana budzie addanaja Radzimie i carkvie», — zajaviŭ patryjarch.
Pryjezd patryjarcha Kiryła ŭ Brest prymierkavany da 85‑j hadaviny pačatku «Vialikaj Ajčynnaj vajny». U noč na 22 červienia Kirył naviedaje Bresckuju krepaść, dzie adsłužyć lityju i dałučycca da tradycyjnaha mitynhu-rekvijema.
Patryjarch Kirył ciesna źviazany sa śvieckimi rasijskimi ŭładami i viadomy svajoj aktyŭnaj, adkrytaj i adnaznačnaj padtrymkaj raźviazanaj Maskvoj kravapralitnaj vajny va Ukrainie.
Śviadoma vykarystanaja im fraza «Rabotajtie, braťja!» aktyŭna vykarystoŭvajecca ŭ Rasii i Biełarusi najpierš u militarysckim i represiŭnym kantekście.
Upieršyniu jana źjaviłasia ŭ lipieni 2016 hoda ŭ rasijskim Dahiestanie i źviazanaja z hibiellu małodšaha lejtenanta palicyi Mahamieda Nurbahandava. Kali bajeviki-isłamisty zachapili jaho ŭ pałon i zapatrabavali, kab mužčyna źviarnuŭsia da svaich kaleh i zaklikaŭ ich pakinuć słužbu ŭ siłavych orhanach, Nurbahandaŭ pahladzieŭ u kamieru i skazaŭ: «Rabotajtie, braťja!», paśla čaho byŭ zastreleny.
Paśla hetaja fraza była rastyražavanaja dy papularyzavanaja pucinskimi prapahandystami i pieratvaryłasia ŭ šyroki ideałahičny štamp. Jana stała nieaficyjnym devizam rasijskich siłavych struktur (Rashvardyi, AMAPa, śpiecnaza, palicyi) i časta źmiaščajecca na płakatach, banerach i šaŭronach. Hetymi słovami rasijskija vajskovyja błohiery, prapahandysty i ŭvohule prychilniki vajny i represij padtrymlivajuć i natchniajuć siłavikoŭ.
Tamu ŭ sučasnym kantekście vykarystańnie hetaj frazy ŭsprymajecca jak nieadjemny elemient vajennaj prapahandy i militaryzmu. Jana časta ŭžyvajecca pry ŭchvaleńni žorstkich dziejańniaŭ siłavikoŭ pry razhonie mirnych mitynhaŭ abo vajennych złačynstvaŭ. U tym liku šyroka hučali i hučać hetyja słovy dla padbadziorvańnia ŭdzielnikaŭ represiŭnych struktur režymu Łukašenki.
Pierad vizitam patryjarcha Kiryła ŭ Brest miascovych śviataroŭ adpraŭlajuć zdać analizy
ES płanuje ŭklučyć u novy pakiet sankcyj abmiežavańni ŭ dačynieńni da patryjarcha Kiryła i śviataroŭ RPC
Patryjarch Kirył u krasaviku pavinšavaŭ viernikaŭ sa śviatam, jakoje adznačajuć u studzieni. I heta nie była ahavorka
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča2
Kamientary