Biełaruskich biaspraŭnikaŭ padzialili na dźvie katehoryi. Štrafy dla ich buduć roznyja
Kali pravy zabrali ci ich nikoli i nie było — adna sprava. A kali prosta skončyłasia paśviedčańnie, to možna abyścisia mienšym pakarańniem.
Stała viadoma pra novaŭviadzieńni, praduhledžanyja zakonam «Ab źmianieńni kodeksaŭ pa pytańniach administracyjnaj adkaznaści». Dakumient, užo padpisany Alaksandram Łukašenkam, ale pakul aficyjna nie apublikavany, unosić źmieny ŭ tym liku ŭ Kodeks ab administratyŭnych pravaparušeńniach.
Pakul što luby čałaviek, jakoha złavili za rulom i jaki nie maje dziejnaha paśviedčańnia kiroŭcy, atrymlivaje štraf u pamiery ad 5 da 20 bazavych vieličyń.
Kali jaho złavili paŭtorna na praciahu hoda, to štraf zastajecca takim samym, ale možna zamiest jaho trapić na hramadskija pracy ci atrymać administratyŭny aryšt — da 15 sutak.
Ciapier kiroŭcaŭ biez pravoŭ dzielać na dźvie katehoryi.
Kali ŭ čałavieka nikoli nie było paśviedčańnia kiroŭcy ci jon byŭ pazbaŭleny prava kiravańnia, adkaznaść zastaniecca raniejšaj.
A voś kali kiroŭca prosta zabyŭsia praciahnuć paśviedčańnie, to pakarańnie dla jaho źmiakčyli. Jamu daviadziecca zapłacić ad 2 da 5 bazavych vieličyń (ad 90 rubloŭ da 225 rubloŭ).
Kali ž jaho aštrafavali, a jon tak i nie aformiŭ novaje paśviedčańnie, to ŭ nastupny raz štraf budzie ŭ takim samym dyjapazonie.
Źmieny ŭstupiać u siłu praz dva miesiacy z dnia aficyjnaha apublikavańnia.
Kamientary