Z ekanamistaŭ — u miedsiostry i zubnyja techniki. Jak biełarusy inšych prafiesij pieravučvajucca na miedykaŭ
Niekatoryja biełaruski kidajuć pracu ŭ banku, kab uładkavacca na chutkuju dapamohu ci ŭ stamatałohiju.
Historyja žančyn, jakija pastupili pieravučvacca ŭ Biełaruski dziaržaŭny miedycynski kaledž, apisvaje «Narodnaja hazieta».
Z ekanamista — u zubnyja techniki
25‑hadovaja Viktoryja Sonič vučycca na druhim kursie pa śpiecyjalnaści «zubaprateznaja sprava». Dziaŭčyna, kolki siabie pamiataje, chacieła stać miedykam. U škole jana była vydatnicaj, dobra razumieła i chimiju, i bijałohiju. Adnak strach nie prajści na biudžet u mieduniviersitet uziaŭ vierch. U vyniku jana pastupiła na fakultet finansaŭ i bankaŭskaj spravy ŭ BDEU.
Paśla ŭniviersiteta pa raźmierkavańni pajšła pracavać u bank kredytnym ekśpiertam u adździeł chutkaha lizinhu.
Praz hod Viktoryja pieraraźmierkavałasia ŭ pryvatnuju arhanizacyju, dzie ŭładkavałasia na čverć staŭki ekanamistam. Paralelna dziaŭčyna šukała pracu, nie źviazanuju ź finansami. I niejak ubačyła vakansiju administratara ŭ stamatałohiju.
Pracujučy tam, dziaŭčyna daviedałasia pra prafiesiju zubnoha technika. Vyrašyła pastupić u miedkaledž, ale spačatku sabrać finansavuju padušku, bo vučoba dzionnaja.
«Ja ŭładkavałasia na druhuju pracu — u centr dermatałohii. Hrafik 2/2 na abiedźviuch. Vychadnych nie było. U takim režymie žyła vosiem miesiacaŭ. Zvolniłasia z abiedźviuch klinik 31 žniŭnia, a 1 vieraśnia pajšła na liniejku ŭ kaledž. Ale ŭžo ŭ siaredzinie vieraśnia pajšła padpracoŭvać u kaviarniu kala doma. Mnie było niekamfortna siadzieć biez dachodu. Adnak paśla pieršaj siesii syšła adtul i skancentravałasia na vučobie i praktycy».
Uletku dziaŭčyna vypuścicca i pojdzie pracavać pa prafiesii.
Pa prykładzie syna — u fielčary
Iryna Krapivina 15 hadoŭ prapracavała buchhałtaram. I praciahnuła b, kali b nie prablemy sa zdaroŭjem: upaŭ zrok, usio čaściej źjaŭlalisia prystupy mihreni…
«Doktar skazaŭ, što kali praciahvać u takim tempie, a ja pracavała pa 14 hadzin u dzień, to moža zdarycca insult, — adznačaje Iryna. — Ja daviała siabie da stanu, kali za kampjutaram mahu siadzieć nie bolš za paŭtary hadziny, potym pačynajecca mihreń. Tady i zadumałasia, čaho ž mnie chočacca. A ja ź dziacinstva lubiła čytać miedycynskuju litaraturu, raźbiracca ŭ chvarobach, vyvučać, jak ich lečać».
Kančatkovaje rašeńnie pajści ŭ miedycynu Iryna pryniała dziakujučy synu. Jon hod tamu skončyŭ kaledž, ciapier pracuje na chutkaj dapamozie.
Praŭda, muž Iryny hetuju ideju nie ŭchvaliŭ, maŭlaŭ, jak paciahnie dvuch studentaŭ na adzin zarobak. Astatniaja radnia taksama skieptyčna pastaviłasia da naviny. Adnak syn i siabroŭka-miedyk žančynu padtrymali.
Zaraz Iryna na trecim, apošnim kursie. U žniŭni pačnie aficyjna pracavać na chutkaj dapamozie, kudy atrymała raźmierkavańnie.
«Na chutkaj ja ŭžo prachodziła praktyku plus tam pracuje syn, tak što dobra ŭjaŭlaju, jak usio ŭładkavana. I mnie padabajecca hety šalony temp, pastajanny ruch. Ja heta sapraŭdy lublu».
Stać miedsiastroj u ankacentry
U svaje 37 Julija Hajdo zakančvaje treci kurs pa śpiecyjalnaści «siastrynskaja sprava» i ŭžo atrymała raźmierkavańnie ŭ Minski haradski kliničny ankałahičny centr.
«Ja rasła ŭ miedycynskaj siamji, zdavałasia b, šlach nakanavany. Ale z-za taho što vučyłasia ŭ himnazii ŭ ekanamičnym kłasie, vyrašyła pastupać u BNTU na ekanamista-mieniedžara, paśla adpracavała paru hadoŭ pa śpiecyjalnaści. Nie majo heta było, pačała šukać kirunak, jaki loh by na dušu. Kim ja tolki nie była — i fitnes-instruktaram, i stylistam, i masažystam… Razam z hetym mnie padabałasia stavić ukoły, kropielnicy, dahladać, kali chtości ź blizkich chvareŭ. Tak mnie na rozum pryjšła dumka, što treba atrymać miedycynskuju adukacyju».
U vyniku Julija vyrašyłasia padać dakumienty ŭ miedkaledž i prajšła na biudžet. Prachadny bał u hod pastupleńnia supaŭ ź jaje siarednim bałam atestata — 8,7.
Padčas vučoby praktyku prachodziać u minskich balnicach i paliklinikach. Tak, Julija trapiła ŭ ankałahičny centr, dzie bližejšyja dva hady budzie pracavać miedsiastroj.
Ci šmat takich prykładaŭ?
Volha Katova, dyrektarka Biełaruskaha dziaržaŭnaha miedycynskaha kaledža, adznačaje, što ciapier u ich vučycca 39 čałaviek, jakija vybrali miedycynu ŭ śviadomym uzroście. Pracavali jany ŭ roznych śfierach — ekanomicy, jurysprudencyi, achovie pracy, piedahohicy i hetak dalej.
«Usie jany pastupajuć pa siarednim bale atestata i vučacca na dzionnym adździaleńni. Heta značyć, patrabavańni da ich dakładna takija ž, jak i da našych navučencaŭ, jakija pastupili paśla 9-ha, 11‑ha kłasaŭ».
Bolšaść studentaŭ navučajucca za košt biudžetu, paśla čaho ich čakaje abaviazkovaje raźmierkavańnie.
-
Na Biełastoččynie prajšoŭ fiestyval biełaruskaj tradycyi Soncahraj FOTY
-
Žonka Alaksandra Milinkieviča raskazała pra jahony stan: pamiać zachavałasia, ale z ruchalnym aparatam vialikija prablemy
-
«Ja ŭ kałonii byŭ bolš volny». Były palitviazień Tamaz Pipija raskazaŭ pra 6 hadoŭ za kratami i novuju paranaidalnuju biełaruskuju realnaść
Kamientary